Къызыл октябрны тиширыуларына. Белые стихи 60-х г

Джырчы Сымайлны сёлешгени да назмуча эди да, амал табхан адамла айтханын джаза тургъандыла. Насыб болуб, ол адамланы игилигинден, джолда-къолда айтыб кетген сёзюнден бир юзюкле бюгюн  сюйген халкъыбызны дараджалы адамларындан таба барабыз. Аллах барысына да, туугъанына, туудугъуна дери  насыб берсин! Юйдегиси барысына да бек бюсюреулюдю. 

ДЖОЛДА ОЗГЪАН САГЪАТДА ЁРГЕ ТУРГЪАН ТИШИРЫУЛАГЪА
/Кызыл Октябрь элини тиширыуларыны айтыуундан, Тамбиладан алынганды. 1968дж./

«Эй, къой барады къая юсюн, сырт юсюн,
да къырылыб барабыз бу намыс ючюн, бет ючюн» -
дегенди бир эски халкъ, талкъ болурундан алгъа,
сора къарагъанды,  дейди,  джау къолуна,
алай бла, джау халкъны арасында  бара – бара джутулгъанды,
аты - чуу  да сагъынылмай, кёрмеге табылмай, тас болуб  къалгъанды.

Эй, миллетни миллет этген адетлери, тёрелериди,
Адетлени тутуучула да халкъны шамлылары, игилериди,
Сизге ушаш туусун, туугъан, тууар къызларыбыз,
Сизничалагъа аталсын ой  айтыуларыбыз, джырларыбыз,
Эркишини сыйлау,  ашхы  тиширыуну  адетиди,
Джюрек назиклигин танытыучу келбетиди,
Бу келбетигиз бетден кетмесин,
Аманлыкъ сизге джетмесин,
Тиширыуну бу халисиди эркишини къанатландыргъан,
Ташны сыгъыб суу алыр кибик кёлюн учундургъан,
Къызыл Октябрны  тиширыулары ариулукъдан артыкъ юлюшлю,
Джуукъгъа – тенге тыйыншлысыча  асыл джюрюшлю,
Назик къоллары беришли болур, болмаз алышлы,
Да быллайлагъа уа хар сый, хар махдау тыйншлы,
Эркишиге ёрге туруу болсун кёрюр къыйыныгъыз,
Баш юсюндеди сыйыгъыз,
Сыйлы болугъуз, олтуругъуз, Аллах сизге артыкъ ёмюр берсин,
Бу тёрелени  шам – Къарачайдан ёмюрде  кетмез этсин!