Алгъыш - 2. Начало 20 века

/Семенланы Арафатдан алыннганды/


Алгъыш деген - кёкге кюрен тартханлай,
Алам чакъгъа тилегинги атханлай.
Бу бал аякъ манга келе - келгенди,
Алгъыш айтыу сыйлы борчну берегенди.
Да, айтайым, джаншакъды деб кёлкъалдылы болмагъыз,
Айтырымы эшиталмай къалмагъыз,
Эй, ашыкъгъан сылджырасын,
Ашыкъмагъан тынгыласын.
Иги келин дарий – дамха сайлатыр,
Аман келин борчун – къарчын санатыр.
Къозуну бакъсанг къой болур,
Келин келгенде  той болур.
Тепсеу, ойнау – къызла бла джашлагъа,
Сый берилир акъ сакъаллы къартлагъа.
Ой, алгъыш, алгъыш этейик, алгъыш!
Джетмесин бу юйге къаргъыш!
Тиймесин бедиш!
Онгуна айлансын хар иш!
Алгъыш кетмесин! Къаргъыш джетмесин!
Сюймегенле айтхан кибик джаратхан Аллах этмесин!
Ой, боза, боза,
Кёб ичсенг – буза,
Ой, сыра – сыра,
Кёб ичсенг - къыза,
Ой, джалдан джалдан,
Татлыды балдан,
Кючлюдю туздан,
Ариу къызны - сохуран минчагъындан,
Къарт кишини - акъыл ушагъындан,
Сюрюучюню - таягъындан,
Келген келинни уа - аягъындан.
Келин келгенди башында джибек ауу бла,
Да берне бергенди ёлгени сауу бла,
Акъ чилледенди келинчикни джаулугъу,
Кёб айтылсын келтирген джашны саулугъу,
Сырма кюмюшденди келинчикни тюймеси,
Ой, къайынлары джаратыр болсун халиси.
Бозаны - сюзмеси,
Кертмени - эзмеси,
Балны - балаузу,
Татлы болсун келинчикни тили, аузу.
Эй, быланы сюйгенлени мелхум болсун кирилери,
Сабий-балыгъы болсун дунияны тирилери,
Сюймегенлеге уа Аллах акъыл берсин,
Сюер кибик кёллерин, джюреклерин керсин,
Алтын къуршакъды келинчикни кямары,
Къуанч бла насыб болсун аны бу юйде табары,
Мурсалайданды чебгенини  дженглери,
Игиле, ашхыла болсун апсынлары, тенглери,
Суу къундузданды юс къабламасыны джагъасы,
Ой, узакъ ёмюрлю болсунла келинчикни ата - анасы,
Тюймесинде болур къумукъ устаны тамгъасы,
Улан туудукъла бла ойнасынла аны аккасы бла аммасы.
Къайын атасы, къайын анасы –
Келинчикни алтын къаласы.
Да кеси да болсун уланла анасы.
Ой, келин, келин!
Ишлеб талмасын белинг,
Санга разы болсун элинг.
Иги кюнде келсин, ашхы кюнде келсин,
Умут этгенлеге толу берне берсин,
Берне джетмегенле да теке оюнланы кёрсюн,
Сюйгенлери дарий кийим кийсинле,
Сюймегенлери агъач атха минсинле,
Келген келинни хар ким эркелетиб сюйсюнле!
Кийген кийими акълы болсун,
Эки дуниягъа да татлы болсун,
Атлыла ойнар арбазы болсун,
Межгитинде азаны болсун,
Бугъала бишер къазаны болсун,,
Къатында джуукъ базары болсун!
Джелинли болсун ийнеклери,
Къабыл болсунла тилеклери,
Къой, къозусу джюнлю болсун!
Сюйген адамлары кюнлю болсун!
Стауаты, юйю кенг болсун!
Игилеге, ашхылагъа тенг болсун!
Бутун буруб олтурсун,
Бутлай урчукъ толтурсун,
Къайын атасына, къайын анасына аман болса уа,
Сокъурана олтурсун!
Наратдан болсун тепсиси,
Алтындан болсун аягъы,
Кюмюшден болсун къашыгъы,
Дарийден болсун джастыгъы,
Тёшеги болсун къанауат
Акъылы, джигери болсун барындан да аламат.
Хар джанындан да болсун ырысхылы, табышлы,
Къайын атасына, къайын анасына болсун намыслы!
Къайынларына болсун хурметли,
Къайын къызларына болсун  адебли,
Джуукъну тенгни да аман кёрмесин,
Андан къыйынлыкъ бу келиннге Аллах бермесин,
Этген иши сёгюлмесин, махдалсын,
Кесине да шам-келин деб аталсын,
Таймаз болсун босагъасыны ташы,
Халкъгъа айтылсын муну къызы, джашы,
Узакъ ёмюр барсын бу юйдегини джашау ызлары,
Айры тишли болуб бу экиси бирге къартайсынла,
Игилик бла бютеу Къарачайгъа айтылсынла!