Мурат-1-2. Стихи 60-х г. 20в

/Бу назмуну да эки тюрлюсю барды: бири - кеси джаздыргъанларында, бири да Къызыл Октябрь элде табылгъанды. Экисинде айрылыкъ барды, алай шаирни ёз тили ачыкъ танылады, аны ючюн къошулгъан сёзле "аныкъы тюлдю" деген акъыл орунлу болмаз. Эки тюрлюсюн да сыйлы Окъуучуну тёресине салама/

1-чи тюрлюсю:

МУРАТ

Къарангы кечени ай джарыкъ джырады,
Ашхы умут эт деб, оюм алдырады,
Къарангыны джыргъан айны нюр сыфаты,
Болур джашагъанны ёмюрлюк мураты.

Не палах келсе да - иги мурат керек,
Иги джора - олду сен таянныкъ терек,
Олду аджашханнга джол усталыкъ этген,
Олду джыгъылтмайын сени алгъа элтген.

Ким биледи, бир кюн сен муратсыз къалсанг,
Мугурлукъну шартын джюрегинге салсанг,
Къыйын джашау атса сени аякъ тюбге,
Баш кёлтюр да къара сен джулдузлу кёкге.

Къарангы кечени ай джарыкъ джыргъаны,
Анга билек болуб джулдузну джаннганы,
Санга къарыу берир, джангы мурат тууар,
Ачыуну сындырыб джюрегингден къууар.

Къарангы кечени ай джарыкъ джырады,
Ашхы умут эт деб, оюм алдырады,
Карангыны джарыкъ, хар заман джарлыкъды,
Аманны иги да таймай хорларыкъды.




2 тюрлюсю:

МУРАТ

Къарангы кечени  Ай  джарыкъ джырады,
Абынмазлай этиб,  акъыл  табдырады,
Хар къыйын заманда  анга къарарыкъса,
Болумгъа тирелир кючню табарыкъса.

Не  палах  келсе да – ашхы мурат керек,
Игиге ышаныу – таянныгъынг терек,
Олду аджашханнга джол усталыкъ этген,
Олду  тюшюрмейин алдан – алгъа элтген.

Ким биледи  бир кюн  сен  умутсуз  къалсанг,
Мугурлукъну  уун  джюрегинге салсанг,
Къыйын джашау быргъаб  атса  аякъ  тюбге,
Баш  кёлтюр да къара  сен джулдузлу кёкге.

Уллу къарангыны  гитче  Ай хорлайды,
Джюрекли адам да зулмуну байлайды,
Къыйыннга тюшгенде оюм этериксе,
Мурат кючлю болса, анга джетериксе.

Джюреги джаннганнга Аллах кюч береди,
Тарлыкъдан чыгъарлай болумун кереди,
Ашхы муратлыгъа  Хакъ хурмет джаяды,
Къыйнагъан къыйын да аллынгдан таяды.

1968. Къызыл Октябрь.