Бюгюн ауруу кючлегенди санымы,
Къутулургъа, эшда, болмаз мадарым,
Къаты сагъыш айландыргъанд башымы,
Кёрюннгенди аджашдырмаз къадарым.
Ёмюр деген, кюч сынагъан, тик джарды,
Ким насыблы къарар аны башындан?..
Мен табмадым чыгъар джолну, ол хакъды,
Джыгъылдым да къобалмадым джангыдан.
Джашауумда кёб къыйынны сынадым,
Инджиу чекдим, табылмайын керегим,
Аллах бериб - учуз болмад муратым,
Сансыз къалмад тюзлюк тутхан джюрегим.
Терсни, тюзню, элек кибик себелей,
Заман кеси мухур салыр джаулагъа,
Зарлыкъ джетиб, сёз кёлтюрюб кетгенле,
Эштилирле энтда Джерде саулагъа.
Ким болса да Сымайылгъа ойлатыр,
Мени сёзюм джюрегине байланыб,
Мени джырым Къарачайда айтылыр,
Миллетими ауазына саналыб.
Бюгюн ауруу кючлегенди санымы,
Къутулургъа, энди, джокъду мадарым,
Тюз джашауум таза сакълар атымы,
Туудукълагъа джетер керти хапарым.
Кёл басама. Стихи 80-х г. 20в
© Copyright: Исмаил Семенов-Джырчы Сымайыл, 2020
Свидетельство о публикации №220102900998
Свидетельство о публикации №220102900998
Рецензии