Октябрь элде. Стихи 60-х г. 20в

Сабий – балыкъ къурмач кибик тёгюлгенлей,
Ойнадыла, кенг арбазда, керилгенлей,
Тёгерекде Къарачайны шам-таулары,
Кёз алдагъан джашил чегет, тау-тарлары.

Кёгю, джери, суу, тауу, эсден кетмей,
Ненча джылны термилген эм, къуанч этмей,
Ненча кере атланнган эм артха тебрей,
Ненча кере тыйгъан элле, бошлукъ бермей.

Таза хауа кёкрегими кергенине,
Джаным саулай бу джерлени кёргениме,
Бу байлыкъны, бу насыбны берген манга,
Шукур санга, сыйлы Аллах, махдау санга!

Эй, кюмюшге къарасаут салыннганча,
Къая раннга джур, джугъутур джарашханча,
Хар бир адам туугъан джерге джарашыбды,
Айырылгъан къара джер бла къарашыбды.

Ол ачыуну мен кёб джылны сынагъанма,
Бу джерлеге тюшде, тюнде таралгъанма,
Кёб адамны ахыр сёзю эсимдеди,
Сары къумда къабыр топракъ, кёзюмдеди.

Эй, кёргенме кёб ёхдемни ийилгенин,
Джарлы халкъны туугъан джерге термилгенин,
Ташын джалаб, суун ичиб турур элле,
Къум тюзледен къайталмайын джан бергенле.

Шам-миллетни джангы келген тёлюлери,
Сынамагъыз биз сынагъан, ол кюнлени,
Къарачайда табсын джашынг насыбын!
Къарачайда табсын къартынг къабырын!

1962.Кызыл Октябрь эл. Къарачай.