Тыбыр сагъыш. Стихи 70-х г. 20в
Келиб тохдадым, санларым талыб,
Айланч - буланчлы джолума къарай,
Кесим - кесиме сейирге къалыб.
Уллу муратны кёнгден сымарлай,
Кесими салдым аны ызына,
Кюлтюмню сылай, сыннганны байлай,
Бардым, кюусюнмей шамны азына.
Ышаныр болуб билек кючюме,
Таджал тарталмаз бир джюк ташыдым,
Джеталмагъанлай алыр ёчюме,
Тая да тюше ачыр - ачыдым.
Къаты къадарым арымаз болуб,
Алгъа атлатмай, тартды ызына,
Энди уа кёлюм джарымаз болуб,
Келиб киргенме заман къынына.
Кёлюм такъырды, бойнум бюгюлюб,
Сакълау къалмады, джашау джоюлду,
Умут, мурат да тюйюм тюйюлюб,
Тёнгегим хылеу болуб къуюлду.
Заман мухурун салгъанды манга,
Туу джашны эгеб, сер къарт этгенди,
Генджа тай кибик талмаз джашлыгъым,
Артха къайтмаздан узакъ кетгенди.
Энди ушагъым кеси - кесим бла,
Энди къууанчым - тыбыр тынчлыгъым,
Къартлыкъ келгенди тайгъан эси бла
Башыма атыб къалын башлыгъын.
1979. Терезе.
Свидетельство о публикации №220103001146