Ахыр кюнюм-1-2. Стихи 70-х г. 20в

Ёмюр ётдю, джилтин учхан
тёрелей,
Джазыу барды, бузну джаргъан
кемелей,
Къайыгъымы бели джамау,
ичи джокъ,
Мындан ары толкъун джырыр
кючю джокъ.
Къол кереме, джюзалмайма,
не этейим?
Къыйналама талпыугъа кюч
джетмейин,
Джаш ёмюрюм - джанкъылычны
чырагъы,
Къарт ёмюрюм - Минги тауну
тарагъы.
Джаш кюнюмде джазыугъа бой
салмай эм,
Къартлыкъ деген затны эсге
алмай эм,
Хорлам алыб чыгъыучан эм
эришде,
Баджарыкълы, джити эдим
хар ишде.
Энди уа бой салдым "къартлыкъ"
дегеннге,
Кёб бармайын ол джатдырыр
джегеннге,
Кёб турмайын кёзкёрмезге
кетерме,
Шам-халкъыма осиятны
этерме.
Сау къал - дерме, ой, джаралы
миллетим,
Аллах берсин, санга, сыйлы
хурметин,
Ёлгенингден къошулгъанынг
кёб болсун,
Кюуден эсе къуанч джырынг
кёб болсун,
Къайгъы сёзюнг алгъыш сёз
бла джабылсын,
Бушууларынг къайтмазлыкъдан
къабылсын,
Хар юйюнгде къарачай сёз
эштилсин,
Кёкню нюрю шам-джуртунга
тешилсин!





2 ТЮРЛЮСЮ:
АХЫР КЮНЮМ

Ёмюр ётдю, джилтин учхан тёрелей,
Джазыу тартды, бузну джаргъан кемелей,
Къайыгъымы бели джамау, джаны джокъ,
Мындан ары толкъун джырыр кючю джокъ.

Къол кереме, джюзалмайма, не этейим?
Къыйналама талпыугъа кюч джетмейин,
Джаш ёмюрюм – джанкъылычны чырагъы,
Къарт ёмюрюм – Минги тауну тарагъы.

Джаш кюнюмде джазыугъа бой салмайын,
Къартлыкъ деген затны эсге алмайын,
Хорлам алыб чыгъыучан эм, эришде,
Уучу къушлай, джити эдим,  хар ишде.

Энди уа  бой салдым къартлыкъ дегеннге,
Кёб турмайын ол джатдырыр чегеннге,
Кёб турмайын кёзкёрмезни кёрюрме,
Къарачайгъа  олджан салам берирме.

Сау къал – дерме, ой, джаралы миллетим!
Аллах берсин санга сыйлы хурметин!
Ёлгенингден къошулгъанынг кёб болсун!
Кюуден эсе, къуанч джырынг кёб болсун!

Къайгъы сёзюнг алгъыш сёз бла джабылсын!
Хар юйюнгде Къарачай сёз   айтылсын!
Къабыр топракъ тау этекде табылсын!
Сыйлы атынг сау дуниягъа айтылсын!

1979. Терезе.