Ахыр сагъыш. Стихи 80-х г. 20в

Талашалла орамлада къач джелле,
Къуу чапракъла, джыламукъча, тюшелле,
Мени ашыра келген кибик кёкледе
Кёк булутла тизгин болуб келелле.

Кёб турмайын мен атларма тышына,
Сёз таркъайта, джылау къоя ызымдан,
Он сабийден къайсы болур къатымда,
Ким тюшюрюр келамымы къолумдан?

Ким чыгъарыр ахыр сёзню багъасын?
Ким тюзетир учхараракъ джерлерин?
Къайсы кёзде къалыр ахыр сыфатым?
Кимге атар арт къарамын кёзлерим?

Джашчыкъ десем - окъа сёзню иеси,
Къызчыкъ десем - чомартлыкъны тёреси,
Гитчечик а - джангы аякъ тиреген,
Ханафийим - джюрек джылыу излеген,
Маруа десем - онгусузгъа таянчакъ,
Сара десем - такъыр кёллю, джумушакъ,
Арапыстан - алкъын эси къатмагъан,
Абидиним - сабийлигин атмагъан,
Суфи, хариб, замансызлай уллайгъан,
Абдурасул - ауур юй бла байланнган.

Къайсы болур ол заманда къатымда,
Арт сёзюмю, тылпыууму ким алыр?..
Ёлюм къолдан сылджыратхан келамгъа
Багъа бериб, сыйлы джерге ким салыр?

Талашалла орамлада къач джелле,
Къуу чапракъла, джыламукъча, тюшелле,
Мени ашыра келген кибик кёкледе
Кёк булутла тизгин болуб келелле.

1981