Къуугъун. Стихи 40-х г. 20в

Тюзлюк бла Терслик къачанда джау элле,
Энди терслик джалкъа къайырды,
Къазауат ёртени, булутлагъа дери,
Тюз бла Терсни чегин айырды.

Джау джаулугъун этиб, къара ишин чертиб,
Хатер этмей чекден ётгенди,
Джюрюген джолларын къара къан бла джуа,
Да Украинагъа джетгенди.

Германия-Ганс бла сёз бегиген эди,
Дау болмайын он джыл джашаргаъа,
Джыл бла джарым озду, ол да сёзюн бузду,
Тартынмайын уруш башларгъа.

Уруш этгени  уа алай бош тюйюлдю,
Кесе да, тонай да, джандыра,
Хар бир кёрген адам ирият берирча,
Джолларында ызла къалдыра.

Джауну мурдар къолу хатер этмей джаннга,
Адам къандан джерни сугъарды,
Даулет башчыбыз да, бютеу барыбызны,
Джан уруш этерге къобарды.

Джауну бетсизлигин, кючюн айтды ачыкъ,
Анга ёчюкдюрдю миллетни,
Да турайыкъ  бирден, артха салмай джанны,
Къуалайыкъ немса итлени.

Тенгиз къобхан кибик биз алай къобайыкъ,
Бар къарыуубузну джыяйыкъ,
Совет джуртубузну джауу Гитлер итни,
Туура тарбууннга тыяйыкъ.

Рахат джуртубузну, чуакъ кёгюне уа,
Ибилис къаранчха  тагъылды,
Аны къуруу бла къалыууну борчу
Совет адамлагъа салынды.

Хайда биригейик, бирден тирилейик,
Джанауалдад совет къралыбыз,
Джауну къоймай къысдау, аны чекден быргъау,
Да бу болсун бюгюн антыбыз!
1941.