Чалкъыда. Стихи 40-х г. 20в

ИССИДИ-ДЕБ,ТАЯНЫБ КЮН АЙЛАНЫРЫН САКЪЛАГЪАН ДЖАШ ЧАЛКЪЫЧЫ ДЖАШЛАГЪА
/Зленчук районда  атамы чалкъычы джыйыны алчы болуб, саугъа алгъан эди, ол газетде да джазылгъан эди.  Ол заманда чалкъыда этилген чамладан бири. 1961дж./

Эй, джашла, да иш юсюгюзге ёрге туруб,
Сиз да алай джатыб, мыйыкъ буруб, кёз уууб,
Да юйюгюз къурумазлыкъла, Къарачайда ёсген шойсуз да, тууб?!
Бу не джатыу кюнню арасында,
Дюрюню джагъасында,
Ханс дегенинг булчукъ силке, баш чайкъай,
Сизден колхозубуз  да хайырлы иш сакълай?!
А марджа, туругъуз, эринчек болуб бет уялмасын,
Бу гелеу чат чалынмагъанлай къалмасын,
Заман бизден заманыбызны алмасын,
Да иш юсюнде бет джойгъаныбыз болмасын,
Бошбел аталыб, джыйынны бети онгмасын!
Эй, табланган чалкъы тынч тартады, чалкъы табламагъан къалмасын,
Колхозгъа сёз бергенбиз, джашла, арыгъан-талгъан болмасын,
Исси кюн дюрюню олсагъат къурутур, хайдагъыз марджа, атылайыкъ,
Белни тартыб, къолланы  джаныулайыкъ,
Мен къарт  болсам да, сёз береме, баш дюрюню салыргъа,
Бу гелеу хансдан юлюшюбюзню алыргъа,
Хайда джигит уланла, майрышыу-къыйышыу болмасын,
Джигерликден киши юлюшсюз къалмасын!
Кюн бойунну кюйдюрмесин, кийиз бёрклени  тулудан  джелкеге атыгъыз,
Бюрек таймасын, алгъа бёчениб, белигизге беллик тартыгъыз,
Керилген сагъатда  солуу алыгъыз, тартхан сагъатда-тышына юрюгюз,
Бёченги тургъанлай, уакъ атлай, акъырын чала-чала джюрюгюз.
Чалкъычыны  арытхан зат - солуууду,
Солуугъа сакъ болугъуз, ол тёнгекни къуруууду.
Солуун табсыз алгъан дженгил арыр да, туракълаб сусаб ичиучю болур,
Солуун эсебли алгъан талмаз, джыйынга юлгю бичиучю болур.
Да, бизни джыйын, юлгю бичгенледенди, эгерледен,
Чалкъыгъа джангы чыкъгъан джаш джигерледен,
Къызыл байракъны  ычхындырмай,  биринчи болуб  алайыкъ,
Да, Азаматны алчы джыйынына,   мыйыкъ бура алай  къарайыкъ!