Джармалыкъгъа бардыкъ. Белые стихи 60-х г. 20в

Хахай-туай, джармалыкъ барды Къарданыкъда-деб, элни сагъайтыб,
Эртден бла къатынла джортуул этдиле,  эркишилени уятыб.
Да, сыйыт-къычырыкъ, арбасы болгъан - арба бла, арбасы болмагъан-джаяу,
Бардыкъ, дейсе, джармалыкъгъа, болмай джан-сан аяу.
Да, барсанг аллайгъа бар, сатыу кёз алдай,
Сатхан алгъанга шогъай,
Джаш адамла бир-бирине джити къарай,
Къартла да юй джарыллыгъына джарарны излей,
Учузуракъ, деменгили затны кёзлей.
Орус къазакъла чебген, хазыр, къамалы,
Тиширыулары да джасамма, джюзюклю, сыргъалы,
Джармалыкъны арасында тырхык къуруб,
Алайдан халкъгъа джырлайдыла, ёрге туруб.
Джармалыкъны къыйырында уа джауда бишген тишмекле,
Мазаллы-мазаллы ётмекле,
Барысы да алайына бериле,
Халкъ да сюйгенича алыб, кериле.
Хар ким къара къуанч болуб, сатыу-алыугъа сингенди,
Къочхарны багъасында ханшум  бир алыуучуну дженгенди,
Тул-тубан келген миллет джармалыкъ джерни толтурады,
Биягъы Сымайыл а кеси-кеси бла сёлеше, джан джаллаб олтурады.

Бу кёз байлауну, омакълыкъны артында уа барды бир таша магъана,
Бош сёлешмеди тырхыкдан, партия башчысы, джангы тамаданы сагъына.

Эй, джангы райком ишин кёргюзтгенлиги болур,
Ким билир, хар заман былай болубму турур?

Джармалыкъ бла халкъны кёзюн-кёлюн джазыу – ашхы бетликди,
Алай паспорт орнуна справка бериб, джерчини къул этиб туруу - итликди.

Хахай "тенглик" – деб,  патчах бла къанлы сермешдик,
Джангы властха къаршы болгъанла бла демлешдик,
Сёзде бютеу халкъла бла  тенглешдик,
Алай кертиси бла, бу джерчи джарлы халкъ, къул кибик къалды,
Къолуна да, паспорт орнуна, "крестьян справка" деген къагъытны алды.

Мунда тенглик къайда, дюрюслюк  дегенинг -къайда?..
Эресей, сени къызылынгдан, агъынгдан да бу зауаллы халкъгъа не файда?

Эй, тюшюнмеген насыблы джашайды,
Кёр  кирни кёрмей ашайды,
Аны ючюн да нени не болгъанын билмейди,
Билмеген а тюшюнмейди.

Да, табсыз затны кёрсе билгенни сарыуу кесер,
Билмеген а къуанч бла джашауун джашаб кетер.

Эй, Аллахым, ачыу ашатхан бу тюшюнюулени акъылыма келмез эт,
Тюзелтирге кючюм джетмеген аманны кёзюм  эслемез эт.