Ач джылда. Стихи 40-х г. 20в

Джаш ёмюрюм – генджа чарсха баргъанлай,
Къарт ёмюрюм – терен кюртню джыргъанлай,
Мурат десем – къыргъый джелле къыргъанлай,
Джашау десем – тюрме юйде тургъанлай.

Джаш ёмюрюм учду кетди къайтмаздан,
Къарт ёмюрюм - хайыр хапар айтмаздан...
Шам - Къарачай  Азиягъа атылды,
Атыбызгъа "бандит", "кадет" аталды.

Къанат кердим, онг тутмады, "учмадым",
Юсге тюшген тубан чарсны чачмадым,
Джакъ болалмай бу инджилген миллетге,
Кёб къыйналдым, сёзюм ётмей советге.
 
Къара булут, къарартырлай, басханды,
Ачлыкъ, зорлукъ, амалсызлыкъ къысханды,
Джыр эштилмей,  хар кюн салах эштиле,
Кёкрекледен къаджау - сезиу тешиле.

Не этейик, бизге болур болгъанды,
Ит зулмучу бизге тамгъа салгъанды,
Джерни, малны, мюлкню, сыйны алгъанды,
Джан зор тургъан азгъын тёрт сан къалгъанды.

Джел ауруу бла къартлыкъ мени тутханды,
Джер юйчюкден чыкъмаз этиб атханды,
Ашхы умут бары къалмай батханды,
Башчылыкъгъа джюрек къата – къатханды.

1947.