Къабырлагъа къарай. Стихи 80-х г. 20в

Ханс кючлеген тар джолчукъ бла, ауур атлай,
Кючден чыкъдым къабырлагъа, кюн туракълай...
Тёгерекде къач къатдыргъан мыдых кырдык,
Кырдык джарыб, анда - мында, къабыр тырхык.

Сын ташлары къатыб - къатыб сюелелле,
Джазыулары кючден - бутдан эсленелле...
Ой, бу ёлюм бийлик этген къуу - шуу джерге,
Мен келгенме, орун излей, боллукъ кёрге.

Былайдаса, мен сюймеген ёмюр джауум,
Джокъду санга, ол дуниягъа, энди дауум...
Былайдаса, татлы тенгим, джан татахым,
Былайдаса, джандан сюйген эт къарнашым.

Заман келди, мен да болдум бери джуукъ,
Эсим тая, кёлюм аза, саным суукъ...
Келдим бери сизге хоншу болайым - деб,
Сизге джуукъ къабыр орун алайым - деб.

Джашау кюнде адам бары не - шох, не - джау,
Джангыз мында этмез биреу биреуге дау...
Бу дуббурда барыбыз да, айырмай - тенг,
Джокъду мында алим, не да акъылы кем.

Бу джер бизни чунгуруна бирча къуяр,
Эзер, сыгъар, теблер, бурур, къысар, джаяр...
Адам сандан эмиб - эмиб кемик алыр,
Топракъ этиб ол топракъгъа ёсюм салыр.

Фатиханы сизге окъуб багъышладым,
Сын ташлагъа къарай терен сагъышландым...
Джашау деген кёз - алдауду, алджау берген,
Азраилди бу дунияда "керти" деген.