Кёкде учхан уллу кёллю болма сен,
Джулдузлагъа джуукъма деб махданма,
Къара Джерни бир да этме келепен,
Джетеме – деб Айгъа, Кюннге алданма.
Джазыу келир, къанатынгы сындырыр,
Сен тюшерсе джерге чапракъ акъгъанлай,
Ёмюр деген кюн санауун тындырыр,
Джансыз санынг къалыр Джерге къатханлай.
Джер боллукъду эштген ахыр сёзюнгю,
Ол боллукъду санынга ау атарыкъ,
Аралгъанлай къалгъан эки кёзюнгю,
Ол боллукъду бауру бла джабарыкъ.
Сууда джюзген, учхан, Джерде джюрюген,
Барыбыз да къошуллукъбуз топракъгъа,
Барыбз да батыллыкъбыз тар кёрге,
Керти джолну тутуб уллу Аллахха.
Кёкде учхан уллу кёллю болма сен,
Джулдузлагъа джуукъма деб махданма,
Къара Джерни бир да этме келепен,
Керексизге – Айгъа, Кюннге алданма.
Мийикдегине. Стихи 70-х г. 20в
© Copyright: Исмаил Семенов-Джырчы Сымайыл, 2020
Свидетельство о публикации №220110301351
Свидетельство о публикации №220110301351
Рецензии