Джолум. Стихи 70-х г. 20в

1-ЧИ ТЮРЛЮСЮ:

Ой, беш – алты джылымда, дуния – алтын билезик,
Онеки – онбеш джылымда, тойгъа – оюннга илешиб.

Джыйырмагъа киргенлей,  къаугъалагъа къатыша,
Джыйырма бешде башладым,  джыйынлагъа   джараша.

Отуз джылым толгъанда - аслан кибик кекелим,
Андан сора билинди,  джашауумда  этерим.

Къыркъ джылымда джалладым, бош шогъайдан, залимден,
Эллиу джылда джюрюдюм, илму ала алимден.

Джылым келе алтмышха, акъыл кетди сагъышха,
Тёнгек – джукъа, сан – хылеу, джарашырлай  ныгъышха.

Джылым келди джетмишге – инчиклерим кангишге,
Умут – аслам, болум – аз, назик болдум хар ишге.

Ой, сексеннге келгенде – сенгкилчекде учханча,
Онга – солгъа сёлеше,  халкъ да менден къачханча.

Тюшюм – тюнюм къатыша, токъсан джылгъа келгенлей,
Сюек чёгюб, сырт тутмай, болдум эмгич эмгенлей. 

Аякъ сала джюз джылгъа, болмагъан сёз гырылдай,
«Кёрюн табсын» - дедиле, бу  джуукъ – тенг, шыбырдай.

Джан джашаудан тоймайды, бир джюз он джыл джашадым,
Гюнахымы кеч, Аллах, бир сабийге ушадым.






2 ТЮРЛЮСЮ:

ДЖОЛУМ

Беш джылымда - къоюнда,
Он джылымда - ойунда,
Джыйырманчы джылымда -
Тийрелени тойунда.

Джыйырма бешге келгенде,
Чам-накъырда сёзлерим,
Отузгъа джуукълаша -
Къама кибик кёзлерим.

Отуз бешден атладым,
Къаблан кибик, кекелим,
Къыркъдан атлай билинди,
Мындан ары этерим.

Эллиу джылда - эл сагъыш,
Алкъын шатык, атламым,
Алтмыш джылда - джан сагъыш,
Мыдахыракъ къарамым.

Джетмиш джылда - тёр къайгъы,
Тынчлыкъ излеб санларым,
Сексен джылда - кёр къайгъы,
Ашыкъдырыб заманым.

Токъсан джылгъа киргенлей,
Ауа-сауа  атлагъан,
Джюзге келе,  тентирей,
Ахыр кюнню сакълагъан.

Джюзден атлай тебредим,
Сабийликге къайтханча,
Джашаб ётген ёмюрюм,
Къысха таурух айтханча.

Ёмюр деген - джилтинди,
Уф - дегенлей джукъланыр,
Мени кибик бу джерге,
Энтда, ненча сукъланыр.
1973дж. Терезе.