Джаш джырчы бла сёлеше. Стихи 60-х г. 20в

Эсимдеди кёчкюнчюлюк заманларым,
Къум тюзледе дигил-мигил мадарларым,
Ачдан кёбюб адамланы джатханлары,
Эмчек болмай сабийлени къатханлары.

Хоншум, Кокай, экиджыллыкъ къызын сатыб,
Аны ючюн машок мюрзеу къалын алыб,
Къазакълыны арбазында джыгъылгъаны,
Къазакъ юйде ол сабийни джылагъаны.

Унутмайма: ауушдур деб, балаланы,
Серикбай деб хоншум манга къадалгъанын,
Унутмайма миллетге ат аталгъанын,
Баш мадарсыз халкъны алай атылгъанын.

Ким-терс, ким-тюз, заман айтды, багъа берди,
Саулай дуния артыкълыкъны бетин кёрдю,
Миллет къайтды Къарачайгъа, джара байлай,
Джюрекледе залимликни ууу къайнай.

Келсек а не - урияла джерибизде,
Юйле кючлеб, фатар салыб элибизге
Тура элле кетер акъыл аз да болмай,
Бизге хыны къарам ата, чырт онгсунмай.

Сёз бла айтыу джерибизни бошатмады,
Къонакъ миллет иелени ушатмады,
Къонакълыкъдан бюсюреулю кеталмады,
Хош келдинг - деб инджилгеннге айталмады.

Тюйюш болду-джюреклеге джангы ачыу,
Ёрелешиу, бедиш айтыу, фатар чачыу...
Талай кюнню гъыр-мыр барды, да сорушду,
"Къонакъ" кетди, къонакъбай да къурулушду.

Бу затланы барын чекген къарт Сымайыл,
Джарыкъ джырла къалай этсин, джыламайын?
Ёмюр батды, джюрек къатды, эй Азамат,
Энди тийсин сиз джашлагъа нюр керамат!