Джау чырагъым. Стихи 80-х г. 20в

/ПАТИМАТХА/

Джау чырагъым, джана – джана  таусулдунг,
Тынч джашауум кара кюн  бла ауушулду,
Сен джукъландынг,  энди къайтыб джанмазгъа - деб,
Аякъ алдынг,  арбазынга къайтмазгъа - деб.

Билмей эдим саулугъунгу бошалгъанын,
Туу санынгы туура былай ашалгъанын,
Ауруйма – деб,  бир кере да эштдирмединг,
Ёлюр ауруу джабышханын билдирмединг.

Разыма мен манга этген джумушунга,
Адеб бла, намыс бла турмушунга,
Юйюр къурдунг, тул адамгъа,  джашлай келиб,
Ёге демей, ёксюзлеге джылыу бериб.

Оюн халда кёб сёз айтдынг, кете туруб,
Ашарыкъны хазыр этиб, алай къоюб,
Сезелмедим ахыр ушакъ этгенинги,
Больницадан сал агъачда келлигинги.

Эй, дуния!.. Эй, ёмюрюм!.. Эй, къартлыгъым!..
Ол джашауну джокъду энди табарыгъым!..
Мискин болуб джыйылгъанма къуу тыбыргъа,
Сен киргенли, эй Патимат, тар къабыргъа.

Джау чырагъым, джана - джана таусулдунг,
Тынч джашауум къара кюн  бла ауушулду,
Сен джукъландынг,  энди къайтыб джанмазгъа – деб,
Аякъ алдынг,  джарлы къартха  къайтмазгъа - деб.

1980. Терезе.