Нек туады бу джашаугъа бу къадар джан?
Джашар онга нек талпыйды чиририк сан?
Нек келебиз бу дуниягъа, къуанч эте?
Нек кетебиз джер юсюнден джылау эте?
Нек къургъанды, уллу Аллах, бу аламны?
Ёлюр саннга нек салгъанды ёлмез джанны?
Нек буюрду бизге Джерде тюгенирге,
Ёлюм кёрмей джашар онга термилирге?
Бу соруула джаш акъылда къайнайдыла,
Джуабларын таймагъанлай сакълайдыла,
Алай, Аллах ол ташаны билдирмейди,
Кётюралмаз затыбызны сездирмейди.
Бош тюйюлдю Дунияны къуралгъаны,
Адамны да келиб анга орналгъаны,
Барды мында Джаратханны бир къудрети,
Биз билмеген уллу затны бир адети.
Соруу сормай Хакъ - буйругъун толтурайыкъ,
Къуран – Керим билдиргенни оюмлайыкъ,
Ёмюр барсын дин айтханнга сыйыннганлай,
Бу керексиз сорууладан джанлагъанлай.
1967. Къызыл Октябрь.
Джаш адамны соруулары. Стихи 60-х г. 20в
© Copyright: Исмаил Семенов-Джырчы Сымайыл, 2020
Свидетельство о публикации №220110501878
Свидетельство о публикации №220110501878
Рецензии