Акътамакъ роман в стихах 1 глава Айшаханым-ариу...
/Джырчы Сымайыл/
1870-1981
АКЪТАМАКЪ
Сюймеклик дeстаны.
Макъамы, сёзлери да Исмаилны кесиникиледиле.
Къарт-Джуртда, Багъатырланы Даулет-Герийни къызы Айша-Ханымгъа (1889-1969) аталгъанды. Джазылгъан заманы-1910-1915 джылла арасыды.
СЕМЕНЛАНЫ ИСМАИЛ
/Джырчы Сымайыл/
1870-1981
АКЪТАМАКЪ
Сюймеклик дeстаны.
Макъамы, сёзлери да Исмаилны кесиникиледиле.
Биринчи башы
АЙША – ХАНЫМ АРИУ, АКЪТАМАКЪ
Айлана бардым да, джюрюй бардым да,
Ой, кёрдюм, тенгле, хан чабакъ...
Хей!
Тынч джюрегими къозгъады, алан,
Айша – Ханым ариу, Акътамакъ.
Балдыраджюз, дейме, – къышны къысханы,
Юсюнге джаууб джабалакъ...
Хей!
Хатхумда джанар шынкъарт джакъгъанды,
Айша – Ханым ариу, Акътамакъ.
Марал кийикни ызладым, алан,
Къаягъа аркъан атаракъ...
Хей!
Сер джашаууму сейир этгенди,
Айша – Ханым ариу, Акътамакъ.
Кюн ачылгъанды, джаз башланнганды,
Джел булутланы чачаракъ...
Хей!
Даулет – Герийни къызыды, дейле,
Айша – Ханым ариу, Акътамакъ.
Ой, джарыкъ тангым атады, дейме,
Танг белги кёкню сызаракъ...
Хей!
Учундургъанды бу джохар чачлы,
Айша – Ханым ариу, Акътамакъ.
Ой, Минги Тауда – марал кийигим,
Аугъа тюшмейди, къачаракъ...
Хей!
Чёрчек джаш кибик этгенди мени,
Айша – Ханым ариу, Акътамакъ.
Аны бир къараб кёргенлейиме –
Къалдым тюз сынлай къатаракъ...
Хей!
Да Сары Джашны армау этгенди,
Айша – Ханым ариу, Акътамакъ.
Бу маралгъа уа киши тиялмаз,
Ой, да кесине базаракъ...
Хей!
Бу кёкрегимде джаз чакъдыргъанды,
Айша – Ханым ариу, Акътамакъ.
Анга къалыннга джылкъы берликме,
Сыйлы келечи саларакъ...
Хей!
Тотур джиб бла тутханды мени,
Айша – Ханым ариу, Акътамакъ.
Сюек багъасы уллуду, дейле,
Халкъ айтыулада айтаракъ...
Хей!
Кёклеге тартхан мурат бергенди,
Айша – Ханым ариу, Акътамакъ.
Къуриентлеге энчи къарарма,
Хар керегине чабаракъ...
Хей!
Да, манга къанат битдирди, алан,
Айша – Ханым ариу, Акътамакъ.
Къуриент джашла къызджёнгер болуб,
Аякъгъа къалкъыб Шам Къабакъ...
Хей!
Хан Семенлеге алай келир да,
Айша – Ханым ариу, Акътамакъ.
Алтындан тюхтюй тюйдюрдюм, алан,
Чыгъар чачына тагъаракъ...
Хей!
Сюймекликни уа бир танытды да,
Айша – Ханым ариу, Акътамакъ.
Аны уа алай тутарма, дейме, –
Джумушха джалчы аларакъ...
Хей!
Ой, джохар джаллы, да генджа тайым,
Айша – Ханым ариу, Акътамакъ!
Къарнашына уа аджир берликме,
Алтын ат керек саларакъ...
Хей!
Сау Юч Ёзенге хапар болгъанды,
Айша – Ханым ариу, Акътамакъ.
Ой, аны мындан алыб кетерме,
Лабада юйле саларакъ...
Хей!
Джаннган хатхума аязча къагъад,
Айша – Ханым ариу, Акътамакъ.
Шейит – Ханым а ашхыды, дейле,
Анга кёл эте, айтаракъ...
Хей!
Джюрек кёзюмю ачдырды, тенгле,
Айша – Ханым ариу, Акътамакъ.
Аман – Ныхытдан ауарма, алан,
Къарт – Джуртну джолун тутаракъ...
Хей!
Бюгюлмез, тынмаз бир хал бергенди,
Айша – Ханым ариу, Акътамакъ.
Элине алай барырбыз, дейме,
Келин орайда тартаракъ...
Хей!
Ансыз болмазмазлай этгенди мени,
Айша – Ханым ариу, Акътамакъ.
Джюз атлы бла барырма, дейме,
Джюз пайтон байракъ тагъаракъ...
Хей!
Хауада Ташча тартханды, алан,
Айша – Ханым ариу, Акътамакъ.
Санчар сууда уа къош салдым, дейме,
Кичкине къолда чачаракъ...
Хей!
Джерайыгъымы кенге кергенди,
Айша – Ханым ариу, Акътамакъ.
Темир къадама болса да, алан,
Кёрюк эритир, джагъаракъ...
Хей!
Деу Сымайылны сезгек этгенди,
Айша – Ханым ариу, Акътамакъ.
Бугъоу Чат тау тик алай турады,
Бузундан суула саркъаракъ...
Хей!
Дунияны аулар бир кюч бергенди,
Айша – Ханым ариу, Акътамакъ.
Азау тенгизде кемеле, дейме,
Джелпекни джелге бураракъ...
Хей!
Туу джюрегими назик этгенди,
Айша – Ханым ариу, Акътамакъ.
Ой, Тогъуз кёлде чегетле, дейме,
Къанатлы гюрюн джаяракъ...
Хей!
Къаты хатхуму джукъартды, дейме,
Айша – Ханым ариу, Акътамакъ.
Садырла таугъа чыгъарса, алан,
Быкъылы таудан ауаракъ...
Хей!
Сюймеклик джолгъа чыгъарды мени,
Айша – Ханым ариу, Акътамакъ.
Уллу Къарт – Джуртда, ой, Къабхакъ Башы –
Багъатырланы кенг къабакъ...
Хей!
Тар дуниямы кенге кергенди,
Айша – Ханым ариу, Акътамакъ.
Эки Суу Ара алайды, дейле,
Суу къобса, беджен къураракъ...
Хей!
Тамам байлады нюр байлауу бла,
Айша – Ханым ариу, Акътамакъ.
Къылыян Аягъы – кенгирек, дейле,
Ой, Суу Джагъасы – тарыракъ...
Хей!
Башдан чыгъарды салпы кирпикли,
Айша – Ханым ариу, Акътамакъ.
Абишир таугъа чыпчыкъ къонады,
Къаяда уя саларакъ...
Хей!
Тюз учар кибик къанат бергенди,
Айша – Ханым ариу, Акътамакъ.
Белляула Къая кёзню алдайды,
Кесине къарам тартаракъ...
Хей!
Тюрлю сезиуню сездирди, алан,
Айша – Ханым ариу, Акътамакъ.
Гондарай сууда – чаукала, дейме,
Ой, Хурла кёлде – агъанакъ...
Хей!
Джибек бугъоула салгъанды манга,
Айша – Ханым ариу, Акътамакъ.
Хазар тенгизде кеме джюзеди,
Джелге джелпегин ачаракъ...
Хей!
Ой, джюрюр, учар, джюзер кюч берди,
Айша – Ханым ариу, Акътамакъ.
Сабыр тёнгекни уятыб, алан,
Хатхуда шынкъарт джагъаракъ...
Хей!
Тамам байлады бу джохар чачлы,
Айша – Ханым ариу, Акътамакъ.
Къалын деселе – болумум, дейме,
Тукъум деселе – Хан Къабакъ...
Хей!
Бизге аталмай къаллыкъ а болмаз,
Айша – Ханым ариу, Акътамакъ.
Сюймеклик деген а тюрлю кёре эм,
Тёнгекни чарпыу чарпаракъ...
Хей!
Дармансыз ауруу джукъдурду манга,
Айша – Ханым ариу, Акътамакъ.
Ой, Агъаштандан буз суу келеди
Черек суууна саркъаракъ...
Хей!
Акъылны, кёлню къыйгъанды, алан,
Айша – Ханым ариу, Акътамакъ.
Кёкге къарасам – джулдуз кёзбауу,
Джерге къарасам – керамат...
Хей!
Эслемеучюмю эслер этгенди,
Айша – Ханым ариу, Акътамакъ.
Ой, кёзден – кёзге бетлешалмайма,
Бугъуб къалады, къачаракъ...
Хей!
Къарт – Джурт джанына сагъайтды мени,
Айша – Ханым ариу, Акътамакъ.
Сюймеклик деген не тюрлю эди –
Ой, отдан суугъа атаракъ...
Хей!
Манга бир джангы бичим бергенди,
Айша – Ханым ариу, Акътамакъ.
Тепсесе - къарам къатаракъ, дейме,
Къараса - джюрек учаракъ...
Хей!
Обур ау бла тутханды мени,
Айша – Ханым ариу, Акътамакъ.
Аджикъол чатда кийикле ойнар,
Къаярда туякъ атаракъ...
Хей!
Да, джан джигиме битгенди, алан,
Айша – Ханым ариу, Акътамакъ.
Башха къызланы кёрмез болгъанма,
Тойдан – оюндан таяракъ...
Хей!
Ханс арасында лана гоккалай –
Айша – Ханым ариу, Акътамакъ.
Дуния кенге керилиб, алан,
Сагъышым – алам джыраракъ...
Хей!
Бир сейир халгъа тюшюрдю мени,
Айша – Ханым ариу, Акътамакъ.
Ой, Къадау Ташны къарасы, дейме,
Сагъышны кенге тартаракъ...
Хей!
Кёкден тюшгенча, алай башхады,
Айша – Ханым ариу, Акътамакъ.
Теберди сууда - агъанакъ, дейме,
Уллу Лабада – дууадакъ...
Хей!
Джумлай аламны сюер этгенди,
Айша – Ханым ариу, Акътамакъ.
Свидетельство о публикации №220110700556