Акътамакъ роман в стихах 5 глава Тюбедим сюйген...

Бешинчи башы
ТЮБЕДИМ СЮЙГЕН КЪЫЙЫННГА

Ой, беш джылымда – бешикге,
Да он джылымда – джыйыннга,
Хей!
Бу отузунчу джылымда, алан,
Тюбедим сюйген къыйыннга.

Бошбоюн болуб бошадым,
Атамы мюлкюн ташладым,
Хей!
Мермер къаягъа ёшюн салгъанлай,
Бир къыйын ишни башладым.

Ой, Къара  тауну – къаясы,
Арпа  бозаны – маясы.
Хей!
Да кёз алдагъан бу кёгюрчюнню,
Къарт – Джурт элдеди уясы.

Ой, Минги тауну – бузлугъу,
Этеклеринде – буулугъу.
Хей!
Багъатырлада кёреме, алан,
Бу ариулукъну  урлугъу.

Къыямут десенг – учхалакъ,
Балдраджюз десенг – джабалакъ.
Хей!
Хан Семенлагъа келин болурму,
Айтхылыкъ ариу Акътамакъ?

Хандар Къабакъда   кенгеш бар,
Борбай танытхан дженгеш бар,
Хэй!
Акътамагъымы огъурамайла,
Аны амалтын  демлеш бар.

Багъатырлары – адетге,
Айша – Ханым  а – адебге…
Хей!
Бу  Дууадакъны бизге атагъан,
Сормай кирдикди джандетге.

Ой, джазны чагъы башласын,
Джерни къыш суукъ ташласын,
Хей!
Сюйген нёгерим келечим  болуб,
Анга   сёлеше  башласын.

Ой, аны  кёрген – аралыр,
Да, аны сюйген – таралыр,
Хей!
Ол табылмайын къалса  уа,  алан,
Бу джашау деген къаралыр.

Къаягъа  ыргъакъ атханлай,
Багъыргъа ойуу къакъгъанлай…
Хей!
Джюрек иши  уа  къыйын кёре эм,
Боранда  джелпек   такъгъанлай.

Келечим  тура – туракълай,
Семенле мени – уракълай,
Хей!
Хан келин кибик аны кёреме,
Башхасы  къалсын – узакълай.

Тиленнген къызынг – излеген,
Сюйген джарлы  да  – тёлеген.
Хей!
Тийре келинле,  къошбаш кенгеше,
Манга къызланы  теджеген.

Ой, теджелгенле онгсунла,
Уллу насыбдан толсунла,
Хей!
Мен сайланныкъны сайладым, алан,
Башхала алай къалсынла.

Ой, Таштюйгенни –  къазгъаны,
Чокъуракъ кёлню –  сызгъаны.
Хей!
Акътамакъ  ишни  узакъгъа созду,
Болурму  башха базгъаны?

Умутум кенге  керилиб,
Къарамым анга тигилиб,
Хей!
Да зыраф болуб барама, тенгле,
Мадар этигиз  биригиб!

Ой, къолундагъы джюзюгю,
Зумурат ташлы, джашилли,
Хей!
Эки эшмеси табаннга джете,
Сыфаты десенг – акъ шилли.

Ол юсюндеги чебгени –
Сейир этдире кёргенни.
Хей!
Да  баш  юсюнде  тутар эм, алан,
Бу къызны манга  этгенни.

Чилле джайлугъу – тигилген,
Тигиую  кёзге илиннген.
Хей!
Да муну табсам  учхан  боллукъма,
Табалмай къалсам – сюрюннген.

Акъ Къыз кесине къаратхан,
Сау Юч  Ёзени джаратхан.
Хей!
Аны «хо» сёзю джюрек джарытыр,
«Огъайы» болур  къаралтхан.

Ой, Огъарыдан буз  эрир,
Секиртме суугъа тёгюлюр.
Хей!
Муну кёргенни,  бир башха къызгъа,
Къайдан  акъылы  бёлюнюр?

Талалы  Стауат – чегетде,
Кёксюл Кёл десенг – арада.
Хей!
Туз кибик алай себилди, тенгле,
Бу кеси салгъан  «джарагъа».

Ой, Таш Къаядан ёз алдым,
Бёгеклик  джолгъа  кёл салдым,
хей
Энди  уа «сюйген» хапар джайылыб,
Джунчуулу болуб  мен  къалдым.

Быкъылы тауда – минг кийик,
Аркъан атаргъа базмадым.
Хей!
Бу Юч Ёзенни къармаб айланыб,
Аны кибигин табмадым.

Ташлы  Къалада – кенг джолла,
Ташлы  Сырт десенг – отлаула.
Хей!
Башха къызны  уа  учундуруред,
Мен анга салгъан махтаула.

Тёшню орнатдым ортагъа,
Чалкъыны алдым табларгъа.
Хей!
Ой,  чыммакъ къыздан джара  алгъанма,
Джакъ табылмайын джакъларгъа.

Къуриент къызы болгъанды,
Бу Юч Ёзенни кюзгюсю,
Хей!
Чын табакъ кибик, алай сыйдамды,
Болмай къырыгъы, чизгиси.

Сюек саяуча – къоллары,
Кепге салгъанча – санлары…
Хей!
Тынгы табдырмай  алай  тарталла,
Къарт – Джуртну  айланч  джоллары.

Джалпакъ Къол Башы – тау джити,
Джалпакъ бла Мырды – ёзенле.
Хей!
Махдау  алыргъа тыйыншлыдыла,
Сюймеклик отха тёзгенле.

Джюрекден тыкъсыу кетмейин,
Акъылда алджау битмейин,
Хей!
Тёнгек акъылгъа джалкъа къайырыб,
«Тохда» дегенни эштмейин…

Танг десенг – мычыб атханлай,
Кюн  десенг – джанны сыкъгъанлай.
Хей!
Къара сюймеклик мени къысханды,
Туура да азар къысханлай.

Алтынкекелли тутулуб,
Джашил кёзледен  урулуб…
Хей!
Быллай  «залимге»  оноу джокъмуду,
Бир тёре кенгеш къурулуб?

Ой, сюйген болдум – кюерге,
Болджал – джаныма тиерге,
Хей!
Халими билиб, уста болгъанды,
Башымы чарсха иерге.

Ой, анга  таракъ  этдирдим,
Кюмюшге оюу сыздырыб,
Хей!
Абар устагъа  кюзгю  ишлетдим,
Юсюне атын джаздырыб.

Кямары келди  Къумукъдан,
Къубачы  уста,  Джумукъдан.
Хей!
Тюймеси бла сапинкалары –
 Алтын сатыучу чуутдан.

Белги джюзюгюн къырдырыб,
Атын джаздырдым юсюне,
Хей!
Къаншау нёгерим – ана джуугъу,
Элтиб берликди кесине.

Дарий алгъанма Согъумдан,
Бу хоншу – тийре къарашыр,
Хей!
Къара Тенгизден инджи келтиртдим,
Ол акъ бетине джарашыр.

Тиширыу деген  джан – джикди,
Эркиши деген –  къорукъду,
Хей!
Заманы бла бир – бирин табыу,
Халкъда джюрюген джорукъду.

Айланма Тауда джел барды,
Ёзен тюбюнде эл барды.
Хей!
Бу Сары Джашны  хатхусунда  уа,
Сезиу къайнагъан  кёл барды.

Кесине тюбер онг болмай,
Джюрек да  тёзюб – туралмай…
Хей!
Ой, «эр – намысдан, ат – къамчиденди» –
Халкъны адетин бузалмай…

Къысхач  Башында джар болур,
Тогъуз  Кёл  Башы – тар болур.
Хей!
Сюйген дегенинг сюйгенине  уа,
Джюрекден, кёлден  зар болур.

Ой,  Сюнгю тауну чыпчыгъы,
Салыннгыч суугъа эниучю.
Хей!
Акътамакъ ариу  кече  тюшюме,
Тюрлю сыфатда  келиучю.

Джантуугъан таугъа – тагъай бла,
Махдау, юсюне миннгеннге.
Хей!
Бу къыз  амалтын,  акъылым туруб,
Ушаб къалгъанма мискиннге.

Сюек багъасы уллуду,
Эллеге хапар джайылыб.
Хей!
Менден  а къалын алай барыр да,
Окъа сёзюм бла къайылыб.

Мен джерни къазыб кирейим,
Кёкге басхыч бла ёрлейим,
Хей!
Джерден – якъут таш, кёкден – джулдузну,
Алыб къолуна берейим.

«Тиленнген» хапар  джайылды,
Халкъ бир аууздан тиллениб.
Хей!
Акътамакъ ариу – бизге аталлыкъ,
Хан  мухуру  бла  энлениб.

Къама, кезлик деб айырмай,
Хар джерде эним танылгъан,
Хей!
Да манга ёшюн уруш этерми,
Бу Юч  Ёзенде эр, улан?

Сюймеклик деген – шынкъартды,
Джюрекни эмген аурууду.
Хей!
Джохар Акътамакъ – Трам - Семенледе,
Ханбийче болур ариуду.

Угъулту таууш келеди,
Огъары тийре табадан,
Хей!
Джикге  джетерлей алай согъады,
Бу Долаланы Абадан.

Сюйгеннге макъам – дарманды,
Ансыз къалыуунг аманды,
Хей!
Бир –  мыдах этген, бир – къуанч берген,
Бу «джашлыкъ» деген  заманды.

Ой, боз джылкъыгъа къараучу,
Къаблан ууна барыучу,
Хей!
Ёхдем Сымайыл энди  болгъанды,
Джохар Маралын мараучу.

Къаргъашил тауду – алаша,
Юсюнде болур – ауушу.
Хей!
Гара Ауузда къулакъгъа келе,
Акътамагъымы тауушу.

Бадыкъ Кёлледе – суу кюзгю,
Къарасанг кёзюнг тоймагъан.
Хей!
Къарт – Джурт элдеди, Акътамакъ ариу,
Мени джашаргъа къоймагъан.

Акъсаут суудан уртласам,
Орнуна келе къарыуум,
Хей!
Бу джандет джерде бир бек тутады,
«Акътамакъ» деген  ауруум.

Болджалла сала, атлата,
Не тарбууннга тыйылдым!
Хей!
Юйден ёнгелеб, хауле болуб а,
Туу санларымдан къыйылдым.

Тауда, ташдады туруум,
Къозу къулакъды – шхуурум.
Хей!
Бу эки тукъум тик турсала да,
Анга келмейди  сууурум.

Джюрек тебеди,  «атма» – деб,
«Бош чурумладан къатма» – деб,
Хей!
«Джаратхан санга эшик  ачханды,
Ол эшигинги джабма» деб.

Келечим джолда къалгъанды,
Талагъы тургъан  ат кибик,
Хей!
Элмырза  бла Таугерий, дейме,
Кёл этедиле, джакъ кибик.

Сакълауду, дейме,  джашауум,
Дыккыдан  ары – ашауум.
Хей!
Игиликге  уа  болурму, алан,
Сюймеклик джолну  башлауум?

Хаджибей Башы – булутда,
Джарлы джюрек да – умутда.
Хей!
Пайтон атланы талагъы турду,
Кюн - кече къала хамутда.

Мурсалай сата сатыучу,
Джабышыб ала алыучу.
Хей!
Бу Акътамакъны белгисизлиги –
Аякъгъа кишен салыучу.

Арбаз дегенинг – киришден,
Фатар дегенинг – кёрюшден.
Хей!
Бёгек Сымайыл муал болгъанды,
Къалыб турады хар ишден.

Акътамакъ ариу – тутханды,
Нюр керамат бла тартханды.
Хей!
Аны кёргенли ёхдем джюрегим,
Эски болумун атханды.

Ой, Айрымканны  бусагъы –
Джел урса болур ушагъы.
Хей!
Субай санлары, ариу сыфаты –
Джокъ Акътамакъны къошагъы.

Бетинден нюрю – агъарлай,
Ол чингке бели – сынарлай,
Хей!
Тейри адамы, бу къыз амалтын –
Къама къынындан чыгъарлай.

Мысты Башындан – Хатуука,
Ёзеннге ызын бурады.
Хей!
Къайры барсам да, не зат этсем да,
Акътамакъ эсде турады.

Къанауат къумач ёзлюдю,
Джиби тутарлай кючлюдю.
Хей!
Акътамагъымы  окъа бёркюнде,
Къулакъ такъгъысы ючлюдю.

Тогъуздан тюйген – тюймеси,
Бешден чалыннган – чалыуу.
Хей!
Сюймекликни уа  бола кёре эм,
Бергенден аслам – алыуу.

Малымы салдым – санаугъа,
Къарамаз болдум айтыугъа,
Хей!
Анга саугъала алыр ючюннге,
Тебредим уллу Батыугъа.

Анда  тюрк  базар – хапарды,
Миллет сатарын – сатарды,
Хей!
Сюймеклигинге саугъа къошулса,
«Сюймеклик арбанг» – тартарды.

Ой,  да  базаргъа  тебредик,
Ёгюз арбала джегилиб,
Хей!
Тенглерим къызгъа кёз – къулакъ болсун,
Ишим къалмасын сёгюлюб.

Согъумда – алтын сюзюучю,
Батыуда – толкъун кесиучю,
Хей!
Къарачайда  уа  – ариу Акътамакъ
Кёргенни армау этиучю.

Эрменли сартла – сатыучу,
Алалмагъанла – азыучу.
Хей!
Акътамагъымы къолан кёзлери –
Джанны, тёнгекни джагъыучу.

Чилле джаулугъу – кёз байлай,
Сапинкалары къалтырай,
Хей!
Ариу Акътамакъ алай тебседи,
Чолпан джулдузча джылтырай.

Тыхтеннге Башы тарытыр,
Узун Къол Джагъа арытыр.
Хей!
Джохарджаллыда аллай  нюр барды –
Кёзбайланнгыны джарытыр.

Чалылы Чатда батыу бар,
Джангылыч джолдан къайтыу бар.
Хей!
Джюрек ишинде,  «узайгъан болджал,
Ара бузар» деб айтыу бар.

Акъ Дууадакъгъа кёлюм зар,
Тюбешалмайма, болум тар.
Хей!
Салыб барыргъа джюрек тартады,
Акъыл  а дейди: «адет бар».

Лана гоккады кёз тартхан,
Тау джитисиди къаратхан.
Хей!
Акътамакъ ариу болгъанды, тенгле,
Кёрген – кёргенни аралтхан.

Аны бир кёрюб ким къалыр,
Мёлек сыфатха кёл салмай?
Хей!
Уста ишлеген сурат кибикди,
Къараб турурлай, кёз алмай.

Ой, къоркъакъ таргъа киралмаз,
Акгыллы  оюм  эталмаз.
Хей!
Эки джюрекни байлагъан болджал,
Ишни  къолайгъа элталмаз.

Кемсиз этеме, тёзмейин,
Кече,  кюн умут юзмейин.
Хей!
Ариуну сюйюб болджал сакълагъан,
Къалмаз джанындан безмейин.

Шорбат шыкъыртдан юркгенлей,
Кёгюрчюн аугъа тюшгенлей,
Хей!
Бети къызара  джунчуб  къалады,
Накъырда  сёзню  эштгенлей?

Эриген алтын созулур,
Андан да  окъа  согъулур.
Хей!
Сары Сымайыл – анга тутулгъан –
Ол  бургъан джары бурулур.

Суу секиртмеде бет джуудум,
Ыпчыкъ ауушда солудум.
Хей!
Джохар Мёлекни чокъуракъ сыйын,
Сёлешгенледен къорудум.

Маркъада – асыл отлаула,
Хауасы десенг – тин берир.
Хей!
Акътамакъ кибик алтын хазнаны,
Къарт – Джурт тышында ким кёрюр?

Джазлыкъ элинде – Юнюсдю,
Саз тартыб ийнар айтыучу.
Хей!
Келечилерим болдула, алан,
Джуаб алалмай къайтыучу.

Агана деген – ташлыкъды,
Джери тиклиди отлаугъа.
Хей!
Халал тенглерим, тёзалмаз болдум
Бу бошалмагъан сакълаугъа.

Сулахат Башы – къадама,
Бир талай тауну – битиши.
Хей!
Ол  алай  къулакъ салмайын турса,
Болур сезиуню  кетиши.

Таудан эннгенме ырбыннга,
Къошум джалчыгъа – аманат.
Хей!
Мени кёзюмде бу Джаз Тауукъну,
Хар халиси да аламат.

Садырла десенг – чыкълыды,
Чабыр джибийди тангында.
Хей!
Сюймеклик деген джашайды, алан,
Сюйген адамны джанында.

Нахара сууу къобханды,
Толкъуну къыжгъыл чёб болуб.
Хей!
Суратым анда къалгъа эд, тенгле,
Анычаларым кёб болуб.

Джарылгъан  бузну – чартлауу,
Ой, хан байракъны – къарлауу,
Хей!
Кёб адам айтхан  ариу къызны  уа –
Адетде кибик – чарлауу.

Кюн сюйген ёрге къараучу,
Мураты  кёкню аулаучу.
Хей!
Трамсемен  улу андан болгъанды,
Суу ариуланы сайлаучу.

Ой, къабакъ десенг – безгиси,
Сарай десенг а – кюзгюсю.
Хей!
Ариу Акътамакъ болур кибикди,
Къыз ариулукъну юлгюсю.

Къаяда къаблан джатханлай,
Къамагъа бичакъ такъгъанлай…
Хей!
Бизге  аталса  джашарыкъ  эди,
Талада  гокка  чакъгъанлай.

Дууадакъ кибик сюзюлген,
Къарагъан кёзге илиннген.
Хей!
Акътамакъ ариу башха тюрлюдю,
Чын сурат кибик ишленнген.

Джохар чачлары бурулуб,
Юсюне чачакъ къуюлуб…
Хей!
Халал тенглерим, кетер болгъанма,
Бу къыз амалтын джоюлуб.

«Дамсыз» – деб киши айтмаздан,
Джашадым  намыс  атмаздан,
Хей!
Муну кёргенли тёзюмюм къалмай,
Сабырым  кетди  къайтмаздан.

Гоначхир суудан къарасанг,
Кулухур  Башы кёрюне.
Хей!
Джанымдан тойдум, халал тенглерим,
Кече,  кюн мынга бёлюне.

Къору  Башыды – юркерлей,
Къарабек Аууш – ётерлей.
Хей!
Акътамакъ ариу мени алджатды,
Эл къозур тели этерлей.

Кърымгерий  къабакъ  къуу болду,
Энди алайы джеклиди.
Хей!
Акътамакъ бла сёлешдирмейле –
Сакълауллары беклиди.

Чынар бюртюкде – ёз тутуу,
Къарагёгенде – къат татыу.
Хей!
Болсун, болмасын, аны кёргеним –
Джаннган хатхума – минг асыу.

Къум  Башы тауда джел улуб,
Кулухур  Башы тик туруб.
Хей!
Сюймеклик  деген кючлю кёреме –
Ичинге тюшюб, джик буруб.

Ой,  джер салгъанма  генджагъа –
Тауну башында тангларгъа.
Хей!
Да,  кёзден – кёзге бир келелмедим,
Таша муратын англаргъа.

Къотур Бекленнген – къая ран,
Кёргенни сагъыш этдирген.
Хей!
Акътамакъ ариу онгуму алыб,
Хакъ зарауатлыкъ джетдирген.

Тартыш излесенг – чегетден,
Шхылды десенг – къаядан.
Хей!
Сингирим аслам тартылды, алан,
Гёджебле тартхан джаядан.

Айланма тауда джел барды,
Ёзен тюбюнде эл барды.
Хей!
Бу Сары Джашны хатхусунда  уа,
Сезиу къайнагъан кёл барды.

Ой, къагъай джелде «шуу» болур,
Сууургъан джери къуу болур.
Хей!
Сюймеклик ишде узайгъан заман,
Эки джюрекге уу болур.

Абу Миннгенни – къуу – шууу,
Гондарай сууну – шуу – шуу.
Хей!
Белги берилиб, белги алсакъ да,
Таймайды кёлню бушуу.

Къууанчда – шогъай, тенг болур,
Ачыуда джууукъ – дженг болур.
Хей!
Ариу Акътамакъ таргъа тартса да,
Алайы манга кенг болур.

Тангым атады алланыб,
Кюнюм батады таралыб.
Хей!
Аны узакъдан кёрмеген кюнюм –
Кёзбайланнгыча къаралыб.

Ой, ёхдем башым – къатышхан,
Тёнгегим десенг – къарышхан.
Хей!
Акътамакъ бла Сары Сымайыл –
Бир – бирлерине джарашхан.

Агъаштан таудан  буз эрий,
Малкъар черекге къуюла.
Хей!
Боллукъ иш  эсе, бир болса эди,
Джюрек сёнгюнчю, тыйыла.

Аджи Къол Чатда  чыпчыкъ гюр
Тютю сууунда эштиле...
Хей!
Терслик этсе да, тюзча кёреме,
Джюрегим анга тешиле.

Азап ауушда – турнала,
Лаба сууунда тюк  арта.
Хей!
Ол – джайдакъ,  мен  а джаурлу болдум,
Таджал кёлтюрмез джюк тарта.

Бодуркъу тауду  къаялы,
Габулу Чат суу – макъалы.
Хей!
Аны сакълагъан Сары ашыкъны,
Къырпакъ тутханды сакъалы.

Семенле десенг – кётенли,
Барыу – келиую четенли,
Хей!
Джулдузхан анам  аууз тутханды,
Хапарыбызны эштгенли.

Ой, Минги тауда гыйы бар,
Чегетде бёрю джыйы бар.
Хей!
Бу къыз тилеуде, тукъум тенглеуде
Бир кёб керексиз къыйын бар.

Азыкъап суучукъ – ётерлей,
Кенглиги – атлаб кетерлей.
Хей!
Нелляй гюнахым болуред, алан,
Сюйген къыйынлыкъ джетерлей?

Темир Хан Шура – талалы,
Бурунсат аууш – гаралы.
Хей!
Аны  кёргенли болгъанды, тенгле,
Бу джюрек  терен  джаралы.

Хасан Къой Сюрген – ауушду,
Джоллары ташлы – бурушду.
Хей!
Акътамагъымы туруу, тенгле,
Ханбийче кибик турушду.

Ой, Уллу Камда – берекет,
Хурзукга къуат салады.
Хей!
Учкулан десенг – Минги Таууна
Таяныб тургъан  къалады.

Къарт – Джурт десенг а – беш джикди,
Къарачай  джуртну – бешиги.
Хей!
Насыбмы берир,  мыдахмы этер,
Манга ачылгъан эшиги?

Ой,  сюйген ауруу тюрлюдю,
Кёзюнге джукъну эслетмей,
Хей!
Джюрек сюйгенни табхандан  башха,
Бир тюрлю бир зат излетмей.

Нарат чегетде солум бар,
Учкулан сууда толуу бар,
Хей!
Сюйген хапарны эштген тукъумда,
Борбайны, сырны соруу бар.

Джюрюучю болду келечи,
Тохдаусуздула  келиуле,
Хей!
Мени аузуму  къаты джокълайла,
Семен тийреде келинле.

Ой, Шам Къабагъым, сау болсун,
Айтхан  сёзюмдю – айтырым:
Хей!
Чексиз аламгъа чыкъгъанма, тенгле,
Джокъду джолумдан – къайтырым.

Джуукъ юй болсун – Къуриент,
Бизге аталсын – Акътамакъ,
Хей!
Да мындан ары мени къыйнамай,
Оноуун этсин Хан Къабакъ.

Ол  ариулукъну  урлугъун,
Алыб  бачхама себмесем…
Хей!
Тутхан ишими битдирмей къоймам
Белгили ёлюб кетмесем.

Джердеги джасар джарашмаз,
Кёкдегин алыб такъмасам,
Хей!
Да, берч джюрекли боллукъма, тенгле,
Айша – Ханымны табмасам.

Аны ол алдыр кёзлери,
Ол шош айтылгъан сёзлери…
Хей!
Аны кёргенлей  тебиб  тебрейле,
Бу джюрегими безлери.

Гебен сюйредим джатакъдан,
Болушлукъ алдым Аппакъдан.
Хей!
Эки сюйгеннге терс сёз айтыуну,
Эштир болурса  акъмакъдан.

Келиде бюртюк артылыр,
Тирменде джарма тартылыр,
Хей!
Джюрек да  билген  ишин  этеди –
Сюймеклик чарсха батылыр.

Сюймеклик деген – тенгизди,
Теренден – терен тартады.
Хей!
Кюнюм – умутсуз, кечем – джукъусуз,
Тангым  къыйналыб  атады.

Нарсана  джаны – наратлы,
Таууунда болур къанатлы.
Хей!
Ариу Акътамакъ джесир этгенди,
Болалмай къалдым азатлы.

Айтылгъан сёзню эштмейин,
Этер ишими этмейин,
Хей!
Кеси аллыма сёлешир болдум,
Бу джарсыуларым битмейин.

Батыу былай деб, батханма,
Алгъынгы халны атханма,
Хей!
Сюймеклик деген зем – зем суундан,
Гоппан толусу тартханма.

Башым тутмайды – оюмгъа,
Кёлюм бармайды оюннга,
Хей!
Энтда къаллай бир тёзейим, тенгле,
Керексиз сезиу джоюмгъа?

Сюймеклик ауруу – къуургъан,
Джанны, санны да суургъан,
Хей!
Бу  ёртен  алай бош джагъылмайды,
Болур бир Аллах буюргъан.

Алтын бетлиди мыйыгъым,
Кёкча кёксюлдю кёзлерим,
Хей!
Бу тау эллеге таурух болгъанды,
Мен анга айтхан сёзлерим.

Тёшню бегитдим батдырыб,
Чалкъы тапладым чакъдырыб.
Хей!
Да уллу кёллю этгенме, дейме,
Миллетге атын айтдырыб.

Ой, джаныу десенг – билеуден,
Май джыйыу десенг – гелеуден.
Хей!
Сюймеклик деген тюрлю ышанны –
Башхасы джокъду  тёлеуден.
               
Асыл дегенинг –  адетге,
Ийлениб  болур адебге.
Хей!
Акътамакъ ариу  хапар ийгенди –
Не айтыр, бу джол,  себебге?

Айгъыр  Суу  чёрчек болады,
Джаз бурнун  джерге  къаратса.
Хей!
Бу къыз къуанчмы этеди, алан,
Джанымы  кемсиз  таралтса?

Азмычды дейле,  билгичлей,
Сёлешген сёзю – дженгишлей,
Хей!
Мындан башхагъа урунуу болмаз –
Неси да манга тенгишлей.

«Кюйюз этеди кергичде,
Кийиз басады джегенде,
Хей!
Он бармагъында он чемер бар», деб,
Хапар джюрюудю ёзенде.

Ой, къыз дегенинг алайды –
Джашны тёнгегин ойнатхан.
Хей!
Акътамакъ болду мени хатхумда,
Сюймеклик къазан къайнатхан.

Талала   Стауат – тау шайлы,
Къышда да   бетин атмайды.
Хей!
Джуукъларындан тартыныб, тенгле,
Айтырын  ачыкъ  айтмайды.

Чегетде зыккыл гаммешле –
Мюйюзлери бар тийсили.
Хей!
Акътамакъ ариу аллай асылды,
Табылмаз кибик чийсили.

Ой,  Къум Къалада суу барды,
Къум  Суу дейдиле атына.
Хей!
Акътамакъ ариу уллу кёллюдю,
Джуукълашдырмай къатына.

Сёз чыгъа тёшден – къыйырдан,
Айтыу болмайын хайырдан,
Хей!
Бу сюймекликни джакълар амалтын,
Болгъанма  джалкъа  къайыргъан.

Эр болса джауум – сермешге,
Къарт болса – сабыр кенгешге.
Хей!
Агундалагъа  амал  табмайма,
Къалай тартайым дженгишге?

Сюйген сюйгеннге табыныр,
Арагъа кирген абыныр.
Хей!
Сезиу дегенинг бирде – сериуюн,
Бирде  топ  окъча къабыныр.

Кёб къуулгъан  уу – татыулу,
Кёб изленнген зат – асыулу,
Хей!
Сакълатхан къыз да – сыйлы болады,
Болджалгъа  болмам  ачыулу.

Бичакъ устасы – билеген,
Тери устасы – илеген,
Хей!
Сюйген деген а – иш – кюч демейин,
Болур сюйгенин излеген.

Азау Тенгизге барады,
Къобан суу  толкъун къайнатыб.
Хей!
Акътамакъ Ариу  бир кёб турады,
Бу болджал сёзню чайнатыб.

Муху суу алай келеди,
Ауазы кибик, шош саркъа.
Хей!
Къачаннга дери былай турайыкъ,
Мен айта, ол да  баш тарта?

Келинчик шахар – тенгизде,
Джагъагъа кеме тагъылыр.
Хей!
Айтхан сёзюме къулакъ салмаса,
Къызгъан сезиуле чагъылыр.

Келген келинни – аягъы,
Тукъум тёрени – «таягъы».
Хей!
Къуриент къызы – гинасыу кибик,
Тынгылагъанды биягъы.

Махар  суу  десенг –  асыулу,
Уллу Кам  сууу – батыулу.
Хей!
Да "онгдан" тайыб "солгъа" баргъанны,
Джашауу болмаз татыулу.

Бир – кирпик къагъа, джандыра,
Бир – тынгылау бла  къандыра.
Хей!
Ариу дегенинг къыйышма болур,
Тюрлениую бла талдыра.

Ариу дегенинг ёч болур,
Айта да, къайта турургъа.
Хей!
Не саз джетмейди, не сёз ётмейди
Муну акъылын бурургъа.

Кёклеге ыргъакъ атмасам,
Андан бир саугъа тартмасам…
Хей!
Боллукъ тюйюлме, джаннган джулдузну,
Алыб, бойнуна такъмасам.

Ёзенги эзе аякъны,
Эки къолум да –  джюгенде...
Хей!
Джюрекни басар асыу табама
Аны узакъдан кёргенде.

Сюйгенни сюйген сезеди,
Сюймеген сёз бла эзеди.
Хей!
Быллай ауруугъа тутулгъан,  алан,
Джан тебрениуге тёзеди.

Танг белгисинде –  тюш къууу,
Къушлукъ заманда – иш тутуу.
Хей!
Сюер заманда сюймей къалгъанны,
Хатхусун буар  кёб бушуу.

Къайгъым,  сагъыш ым  битмейин,
Джюрегим сабыр этмейин…
Хей!
Бу  ауруудан  а къутулуу  джокъду,
Сапыран Турнам джетмейин.

Эки Арасы – ышыкъды,
Уу хайуан энер къышларгъа.
Хей!
Аур болса да сюймеклик джюгюм,
Кёзюм   къыймайды  ташларгъа.

Ой,  балдыраджюз  кетгенлей,
Буз сюммеклери эрирле.
Хей!
Аны джюрегин джумушатырлай,
Джазгъы кюнле да келирле.

Ышаныу барды,  сёз тутар,
Тирелиуюн да бир атар.
Хей!
Джаз чагъы джерге хауасын джайса,
Аны кёлю да джумушар.

Малкъар  таулагъа  атландым,
Мермер таш алыб къайтыргъа.
Хей!
Кёлюнге джетер сёз табылмайды,
Муну махтауун айтыргъа.

Аргъыш дегенинг – бир къышлыкъ,
Бачха байлыгъынг – джыл ашлыкъ.
Хей!
Акътамакъ  ариу тынгылаб тура,
Озуп  барады  бу джашлыкъ.

Санларым тюрлю джаналла,
Джюрек  а – андан бытдырды.
Хей!
Тыйгъыч дегенинг – гебенча болду,
Иш тюзелиу а –  лыппырды.

Джашаялмазлай болгъанма,
Бир башха хыйсаб этмесем.
Хей!
Адам къозурукъ тели болама,
Джан – Чакъны алыб кетмесем.

Сюйген джюрекде ёз барды,
Сюймегенледе  кёз барды.
Хей!
Акътамакъ кибик тартхан ариула,
Сау дунияда да аз барды.

Акътамакъ ариу алайды,
Иссиси дженген джай кибик.
Хей!
Тепсерге  чыкъса  алай  чыгъады,
Кюренлеб тийген   Ай  кибик.

Белимде алтын къамам бар,
Ой,  джыргъа уста анам бар.
Хей!
Эжиучюлери – эки эгечим,
Баджаралмайды келечим!

Тыхтеннге  Башы,  Минги  тау –
Бир – бирлерине ушагъан.
Хей!
Да менден сора ким болур, тенгле,
Ёртенлеб  джана джашагъан?

Гондарай  бла  Нахара,
Абу  Миннгенден  саркъыучу.
Хей!
Бу келечим да  хый – мый болгъанды,
Тюбсюз – башсызча  айтыучу.

Ючкюл  Сууунда – Тапанта,
Гара  Аузда –  Малкъарды.
Хей!
Муну кёзлери  тау кёлле кибик,
Чачлары десенг  джохарды.

Сюйген ауруудан сытылдым,
Суу кёмюк кибик джутулдум.
Хей!
«Акътамакъ бла  Сымайыл» деб  а
Айланч сёзлеге тутулдум.

Хурзукда  Гюрджю тукъумду,
Согъумда  сатыу  этиучю.
Хей!
Сюймеклик ауруу, ауурду, алан,
Тёнгекге, саннга  ётюучю.

Узункъол – Джагъа  джар  болур,
Къуршоу  Башында   къар болур.
Хей!
Былай сюйюб да, табмай къалгъанны,
Ёмюр джашауу  тар болур.

Ой,  белиндеги кямары,
Сырма кюмюшден къуюлуб.
Хей!
Тойубузгъа  уа   келирле, алан,
Юч  Ёзен бирден джыйылыб.

Агъач келини – къакгъычы,
Тыйын тонланы – такъгъычы.
Хей!
Хан Семенлени мекамында  уа
Ойма темирден басхычы.

Сюйген джюрекни кёмюрю,
Туу  къазанланы къайнатыр.
Хей!
Тюзелген ишни зауукъ ёмюрю
Бал чайырланы чайнатыр.

Къашха  Аджир  тау – джатакъды,
Ыпчыкъ  Ауушу –  белинде.
Хей!
Бу сюймеклик бла джашар болгъанма,
Тамам аманны кеминде.

Кюкюртлю тауда – кюкюртдю,
Нызылы Къолда – зыкала.
Хей!
Акътамагъымы джырын джырласам,
Эжиу этелле шоркъала.

Эмилик атха  мингенме,
Аузлукъ  истем этмеген.
Хей!
Джюрекде сюер тамыр джокъ эсе –
Сёзлерим анга  джетмеген.

Тамаллы сезиу – джыллагъа,
Учхара сезиу – айлагъа.
Хей!
Алтынджал ариу,  уста кёреем,
Кесин сюйдюрюу хыйлагъа.

Эрчох Тау десенг – кёрюннген,
Джолоучат бла къараша.
Хей!
Акътамагъымы субай санына,
Не зат кийсе да джараша.

Ой, маздыкъланы  сабаны,
Джылында эки орулгъан.
Хей!
Биз экибизден башха ким болур,
Быллай бир ушаш  согъулгъан?

Ол – бийче дейме,  мен – хандар,
Джарашыу деген – кёр бизден…
Хей!
Анга,  эриксе  тынгылай турур,
Чокъракъ келтиртдим  тенгизден.

Элбашы Тауда – къанатлы,
Джазда уясын этеди.
Хей!
Джазыу бергенни алалмагъандан,
Насыб ёнгелеб кетеди.

Сёзюме къулакъ тикмесе,
Бир башха болур табары.
Хей!
Сюймеген бла джашау къыйынды,
Ол заман болур азары.

Ору  Башында – буз джатар,
Топал  Къаяда –  кюч  азар.
Хей!
Акътамакъ ариу,  тынгылаб турса,
Бу джазыу бизге не джазар?

Кычкыдар гыйы буз тауду,
Къылыч  Къар  Къая – тюрленмез.
Хей!
Марагъан къауум  бош марайдыла,
Менден башхагъа терилмез.

Тыйылсын  анга  илешген,
Джолдан джалласын  эришген.
Хей!
Ариу Акътамакъ – бизге аталлыкъ,
Бош кюрешеди кюрешген.

Биреуге  барыб  джалынмам,
Керексиз атлаб – абынмам.
Хей!
Мал, мюлк, кириде кемлигим болуб,
Бир башхалагъа табынмам.

Ат керек десенг –  кюмюшлю,
Арбазым десенг – киришли.
Хей!
Аллыма чабхан болуб къалмасын,
Халкъ арасында бедишли.

Ыпчыкъ Ауушу – Къышхыда,
Къатында болур  эки суу.
Хей!
Болджал салыу бла бираз алджатды,
Акътамакъ деген  гинасыу.

Беллаула  Бузлукъ эрий  да,
Алибек  Суугъа къуюлур.
Хей!
Сюймеклик деген бу чарпыудан  а,
Не чёрчек сан да къыйылыр.

Уллу Малкъарда  Нарт – Уста,
Атын чарышда ойнатыр.
Хей!
Бу Айсуратлы,  бу Джулдузкёзлю,
Кёблени къанын  къайнатыр.

Юч джылым ётдю  джоргъача,
Кюнле акъдыла  шоркъача.
Хей!
Сакълатыу бла этгенди мени,
Къаядан  къобхан  уркъача.

Сакълаудан болмай табарым,
Суу – салам болду санларым.
Хей!
Да «Сары  Джаш»  дер  къуат  къалмады,
Тынгысыз ата тангларым.

Танг аласында тау башла,
Булут  аууна  кирелле.
Хей!
Эки тукъумну чола сёзлери,
Ишни  серине  иелле.

Бал чибин десенг – къауздан,
Англашыу десен – аууздан.
Хей!
Кеси бла бетден – бетге келелмей,
Турама джуаб  алмаздан.

Чалкъыгъа чыкъдыкъ  Урумгъа,
Къуру  ханс джайдыкъ дорбуннга.
Хей!
Кюнаман джетмей къалырмы, алан,
Деу джашла салгъан дырыннга?

Акъылым Къарт – Джурт джолунда,
Тапланнган  чалкъым – къолумда,
Хей!
Джюрекде десенг – ариу Акътамакъ,
Джыры айтыла  аузумда.

Накъырда эте тенглерим,
Ишге хылеудю билегим,
Хей!
Джулдузгъа ушаш къызгъа урундум,
Джетерми Кёкге тилегим?

Дёлю ёзенде шыкъырт бар,
Келин келгенде чыкъырт бар.
Хей!
«Акътамакъ ариу джылы къарайды
Сары Джашха» деб, шыбырт бар.

Ой, бетим десенг – бурушда,
Юйдегим десенг – урушда.
Хей!
Акътамагъымы огъурамайла,
Хансеменланы турушда.

«Ариуда ауруу – къош» дейле,
«Сюймеклик хапар – бош» дейле.
Хей!
«Юйнгю тутар бирин келтирсенг,
Джашауунг болур хош» дейле.

Джумушчу сюйген – джалчыгъа,
Къуллукъ излеген – алчыгъа.
Хей!
Манга ханбийче керекди, алан,
Бий чибин кибик – балчыгъа.

Ашыкъ делле да,  саз тартдым,
Алгъыш делле да,  сёз айтдым.
Хей!
Сюйген хапаргъа ийнанмай эдим,
Энди тобагъа мен къайтдым.

Ариу къызланы тенгсинмей,
Кесими таудан кемсинмей,
Хей!
Асыры чуубаш  болгъан  эм, тенгле,
Айтылгъанланы  кюйсюнмей.

Акътамакъ ариу онг алды,
Хауалылыгъым кенг къалды.
Хей!
Бютеу къызланы дертин алырлай,
Манга кишенни ол салды.

Энди къалгъанма сюйюнмей,
Кёзюм башхагъа илинмей.
Хей!
Тойгъа – оюннга, ишге – кючге да
Алгъынча эсим  бёлюнмей.

Ой,  гюнах къайтыб урады,
Кёбню гюнахын алгъанма.
Хей!
Айтылгъанланы излемей, алан,
Кесим изленмез болгъанма.

Аманаузда – буу джыйы,
Сауру  Джуху – гыйыды.
Хей!
Къыз тиширыугъа берилген сый  а,
Берген адамны сыйыды.

Ой,  эркишиге – не джашау,
Тиширыууна къырылмай?
Хей!
Джюрек дегеннге не  тебиу барды,
Сюймеклик бла  джырылмай?

Джугъутурлу  Кёл – уучугъа,
Турна  Ауз  а – къушчугъа.
Хей!
Ариу Акътамакъ манга джарашыу –
Саз  джарашырлай   джырчыгъа.

Сулахат  Башы –  кириш тау,
Алибек – сууну  тазасы.
Хей!
Акътамагъымда бир  сюйюм  барды,
Болурлай халкъны хазнасы.

Кёз тиер кибик ишленнген,
Хар къарам анга бёлюннген.
Хей!
Керти ариулукъ бола кёре эм,
Нюр кераматха бёленнген.

Къызны къолунда эшиу бар,
Уланда темир тешиу бар.
Хей!
Ол тынгыласа, санларым тюшюб,
Хатхуму тутхан юшюу бар.

Аджи Кетгенде – бир  къышлыкъ,
Сары суу  андан тёбенди.
Хей!
Не "хо" болмайын, не "огъай" болмай,
Бу мени армау этгенди.

Къарачай  тилни  эштмейди,
Энди  арабча  джазмасам.
Хей!
Аны излерге таукел болмаз эм,
Адамлыгъыма базмасам.

Архызда салдым джазлыкъны,
Андан  таб джерни ким табар?
Хей!
Акътамакъ ариу  бизге келгенлей,
Ол сюймегенле тил къабар.

Гулухор Аууш –  джырыкъча,
Гоначхир анга джуукъча.
Хей!
Мен ёртен болуб  джаныб бошадым,
Акътамакъ  алкъын суукъча.

Ой,  Бугъой Чатды кёз тартхан,
Бузундан суула къуюлуб.
Хей!
Аны кёргенлей тюрлю болама,
Бютеу санларым къыйылыб.

Къуандыр бла Сакин  суу,
Араларында –  ауушу.
Хей!
Суу таушундан къулакъгъа келе,
Джохарджаллыны тауушу.

Сулджа Къалада – аскерле,
Сафда туралла, эр кибик.
Хей!
Къуриент къызда бир сюйюм барды,
Кёкден тюшгенди дер кибик.

Ой,  Къарамыкъда – кенг къабакъ,
Къырымгерийни  патары.
Хей!
Мени не тюрлю байлагъанындан,
Джокъду  Джан Джикни  хапары.

Тубанлы Кёлде  бабуш бар,
Гидам суунда  таууш бар.
Хей!
Акътамагъыма барыр джолумда,
Аякъ таярлай  аууш бар.

Аман - Ныхытды къыш тайгъакъ,
Джазда таш къоркъуу салыучу,
Хей!
Къарт - Джурт элине джюреги тартхан
Болур бу джолну алыучу.

Ишлеялмайма ишими,
Ашаялмайма ашымы.
Хей!
Аны амалтын кермез болгъанма
Бу алтын сары къашымы.

Юйюрю – халкъда  махдалгъан,
Акътамакъ десенг – айтылгъан.
Хей!
Эки тукъум да тенгиш  эдиле,
Болса сёзледен къайтылгъан.

Кёз къакъмай  кечем кетиучю,
Кёл джазмай  кюнюм  ётюучю.
Хей!
Болуб болмайын, къоюб къоймайын,
Бу къыз джанымдан этиучю.

Джазда къарасанг – джанкъозду,
Джайда къарасанг – тюртюдю.
Хей!
Аллах джаратхан бютеу джанладан,
Муну  сюйюмю тюрлюдю.

Кёргенлей бетге къан ура,
Къайгъымы къуанч чачмайды.
Хей!
Муну кирити  лагъымлы болду –
Этген ачхычым  ачмайды.

Ой, абезекге чыкъмайды,
Къол джабхычларын иймейин,
Хей!
Тепсеген джашла кемсиз  этелле –
Къоллагъа  къолу  тиймейин.

Башха къызлача юркмейди,
Ол абезекден къачмайды.
Хей!
Салпы кирпигин джарым джабханлай,
Талгъыр кёзлерин ачмайды.

Накъырда сёзню – эштмезча,
Джашлагъа кёз – къаш тешмезча.
Хей!
Ариу Акътамакъ алай турады
Ата юйюнден тепмезча.

Ана къарнашы – тышында,
Тукъум келини – джанында.
Хей!
Сакълаууллары  сакъ  турадыла,
Кёз – къулакъ болуб, къатында.

Джуукълашыргъа болмайын,
Муратым  толуб, онгмайын.
Хей!
Ийне джутханнга ушадым, тенгле,
Санымда этим къалмайын.

Узункъол Джагъа джар болур,
Къуршоу Башында къар болур.
Хей!
Былай сюйюб да, табмай къалгъанны,
Ёмюр джашауу тар болур.

Хутий  Дуппурда  аууш бар,
Хутий Дорбуннга барырлай.
Хей!
Да былай болуб мен къалай къалдым,
Бир аны сакълаб къалырлай?

Къашха Аджир тау  джатакъды,
Ыпчыкъ Ауушу – белинде.
Хей!
Бу сюймеклик бла джашар болгъанма,
Тамам аманны кеминде.

Беллаула Бузлукъ, эрир да,
Алибек суугъа къуюлур.
Хей!
Сюймеклик деген бу ауруудан а,
Не чёрчек сан да къыйылыр.

Кяфыр суу – толкъун бурмайды,
Къызылчыкъ  ырмакъ – толмайды.
Хей!
Адетге кёре, эки сюйгеннге,
Тюбеб  сёлешиу болмайды.

Акътамакъ мени асхатты,
«Болур», «болмазы» билинмей.
Хей!
Менден къалгъанла бир тынч туралла,
Бу сюймекликге бёлюнмей.

Ой, чепкен десенг – боюнга,
Юзгере десенг – къоюнга.
Хей!
Юйлениу десенг – джюрек тартханнга,
Миллет басыныб тоюнга.

Нызылы къолда – бал четен,
Архызда – джылкъы отлауум.
Хей!
Иш былай барса, тейри, тенглерим,
Болур  къыйынны  къатлауум.

Юй – юйюр бола тенлерим,
Табылалмайын – керегим.
Хей!
Кёз башхаланы эслемей, алан,
Ауруу табханды джюрегим.

Джохар чачлары – эшмеде,
Окъа бёрк джаба къашларын.
Хей!
Акътамакъ ариу  армау этгенди,
Бу Юч Ёзенни джашларын.

Нартджол Ауушду – мал сюрюр,
Нахара сууду – ыз керир.
Хей!
Джангыз Акътамакъ болгъанды, тенгле,
Манга насыбны келтирир.

Аман Ныхытды джол кесген,
Къары юзюлюб къуюлса.
Хей!
Акътамакъ ариу таукел боллукъ эд,
«Оноучулары» тыйылса.

Ой,  анга юйле ишледим,
Тенглерим маммат болгъанлай.
Хей!
Насыбым тутуб къаллыкъ эд, алан,
Аны тёрюме салгъанлай.

Къошну кёчюрдюм  Чучхурдан,
Алайда джаллы кёб чабар.
Хей!
Акътамакъ ариу бизге келгенлей,
«Оноучулары» тил къабар.

Бетлешиу десем – тартына,
Джууукълашдырмай къатына.
Хей!
Не «огъай» демей, не «хо» болмайын,
Бу ишни ийди артына.

Бугъой Чатыды къаратхан,
Юсюнден буз суу саркъытхан.
Хей!
Битмеген болджал болуб турады,
Бу ишибизны чарпытхан.

Аны кёргенли болгъанма,
Джюрек ауруу бла шагъырей.
Хей!
Болджал салыуу – къыз оюн болуб,
Сынай болурму, безирей?

Къыз адетиди сый тартыу,
Ёз тыбырына бек къатыу.
Хей!
Тилеген джашны халын сынарлай,
Тутхучсуз сёзню кёб  айтыу.

Къуриент бийче аджашмаз,
Башха бла кёзю къарашмаз.
Хей!
Ариу Акътамакъ – Хан Къабакъгъады,
Башха къабакъгъа джарашмаз.

Ой,  да аллыма чабханла,
Тил даурбазны къакъгъанла.
Хей!
Махдана туруб болуб къалмагъыз,
Сермеш джеринден къачханла!

Аллыма чабхан тёлленмез,
«Болур» джууаб бла кёлленмез.
Хей!
Тау къушну тутар болгъан ариуну,
Шорбатха кёзю илинмез.

Къайсыды  мени  джыгъарыкъ,
Билек кючюмю сынарыкъ,
Хей!
«Акътамакъ бла Сымайыл»  деген
Джулдуз кёпюрню къырарыкъ?

Тохана юйге тыйыншлы
Джатмагъа разы болалмаз.
Хей!
Ашыкъ Трам - Семен айта тургъанлай,
Башха адамгъа баралмаз.

Джетсинле, дейме, тенглерим,
Бурун  урмасын  кенглерим.
Хей!
Ишни узатмай этер ючюннге,
Къайырылгъанды дженглерим.

Кюкюртлю  тауда  къазыу бар,
Ой, Тар – Ауушда  азыу бар.
Хей!
Юйлениу деген сыйлы тёреде,
Насыб бериучю джазыу бар.

Джазыу бергенни – алыуду,
Халиге – бичим салыуду.
Хей!
Не да къадаргъа къулакъ тикмейин,
Джолундан тайыб къалыуду.

Эки джаны да  ойлаша,
Акъыл, оюм да къайнаша,
Хей!
Ёмюр дегенинг алай джашалыр,
Кёзле кёзле бла къараша.

Ой,  бизге  джандаш  болгъанла,
Шогъайым бла тенгимди.
Хей!
Бу ишде манга ёрге турмагъан
Башха болмайын – кенгимди.

Джуукъ дегенинг тайгъанды,
Ушатмагъанын айтханды.
Хей!
Да алай бла  Семен Къабагъы
Сары  Сымайын  атханды.

Къаршчы чыкъгъанны унамам,
Ансыз мен юйюр къурамам.
Хей!
Джуукъ да, тенг да муну эштсинле,
Эштмеучюлеге къарамам.

Келечим кетди сёз алыр,
Джуаб келтирди, кёл салыр.
Хей!
Аны адебли джуабын эштиб,
Анга джан атмай ким къалыр?

Джюз пайтон бла барлыкъма,
Къарт – Джуртха тизгин салдырыб.
Хей!
Ат туякъ таууш, келин орайда,
Халкъны сейирге къалдырыб.

Атаны сёзю –  онгартхан,
Ананы сёзю –  ойлятхан.
Хей!
Акътамагъымы  джылы сёзлери –
Джюрек джигими ойнатхан.

Кичкине къол бла Акъ Тёбе,
Акъ Киштик таудан келелле.
Хей!
Акътамагъымы берген джууабы,
Муратны джууукъ этелле.

Ой, Тогъуз Кёлде – тогъуз нюр,
Ичинге хузур сингдириб.
Хей!
Акътамакъ Ариу хапар ийгенди
Оюмун манга билдириб.

Гедеж суу десенг – эмилик,
Къобса, ташланы аудура.
Хей!
Джохар  Акътамакъ белги бергенди
Манга насыбны джаудура.

Узун джюрюдюк бу джолну,
Энди къыйыры кёрюндю.
Хей!
Юч джылдан аслам сакълаб тургъаннга
Насыбдан юлюш бёлюндю.

Пайтонга окъа тизилсин,
Ичи джибек бла тигилсин.
Хей!
Акътамагъыма  айтхан сёзлерим
Юч Ёзенге да билинсин.

«Ата, ана» дей тиллендим,
«Элим», «джуртум» дей тёллендим.
Хей!
Къуриент Къызны кёргенли бери,
Алам чагъына  кёллендим.

Штулу  Суууду   ыз бузмаз,
Акъ  Суудан сусаб ёз тутмаз.
Хей!
Анга айтылгъан бу сёзлени  уа
Ёмюр кетсе да джер джутмаз.

Къуанчда къанат битеди,
Кюнюм учуна ётеди.
Хей!
Да кюз артына болджал салгъанды,
Энди заманым  джетеди.

Мысты, Хатука – тар аууш,
Кенгден эштиле суу таууш.
Хей!
Къуриент къызны кемсиз излейме,
Джаратхан Аллах,  сен болуш!

Таулада тагъай  салмасам,
Тюзде пайтон бла бармасам.
Хей!
Да ёлюб кетсем эки джылагъыз,
Ол Акътамакъны  алмасам!

Ой,  суу джоргъагъа минейим,
Темирден кюбе киейим.
Хей!
Аны  дуниягъа къошхан анагъа
Джюз минг бюсюреу этейим!