Акътамакъ роман в стихах 14 глава Джан Ёзек

Онтёртюнчю башы
ДЖАН ЁЗЕК

Джюрек  Джигимсе, Джан  Ёзегимсе,
Сенсиз болмазлай болгъанма,
Хей!
Болуб болалмай, суууб къалалмай,
Туура палахха къалгъанма.

Ой, «болур» десенг – болур адамма,
«Болмаз» десенг а – сынарыкъ,
Хей!
Сен – насыб толу алтын къаласа,
Мен – эшиклерин ачарыкъ.

Акъ булут бла тау джити кибик,
Бир – бирибизге джарашыб,
Хей!
Ёмюрюбюзню джашарбыз, алан,
Сюйген  кёз бла  къарашыб.

Семен тийреде джашарса, ариу,
Илячин къушча керилиб,
Хей!
Джюрегинг сюйген не зат болса да,
Бары  къолунга берилиб.

Башынгда чилле джаулугъунг, дейме,
Чилле тигиую джылтыраб,
Хей!
Мен – темир къармакъ, сен – алтын чабакъ,
Къолгъа тюшмейин, сылджыраб.

Джюрек  Джигимсе, Джан  Ёзегимсе,
Мёлекча тургъан кёзюмде,
Хей!
Сенден башха уа бир сагъыш джокъду,
Сен  арсар этген эсимде.

Чынар терекди  – джайылгъан, дейме,
Нызы десенг а – къыйылгъан.
Хей!
Сени кёргенли болгъанма, ариу,
Эски халимден тыйылгъан.

Ой, ашыкъ эдим халкъ тынгылагъан,
Чакъырылыучу  къуанчха,
Хей!
Алтынкекелли энди къалгъанды
Къуриент къызгъа,  джубанчха.

Да мындан ары сакълатма, алан,
Гюнахым ауур тиймесин,
Хей!
Мени ачытсанг къарагъан Аллах,
Санга бир сынау иймесин.

Акътамакъ ариу, Гинасыу – Бийче,
Джибек  бауунг бла тутханса,
Хей!
Да сырты джерге тиймеген деуню,
Джаралы этиб атханса.

Джюрек  Джигимсе, Джан  Ёзегимсе,
Джандет хауаны келтирген,
Хей!
Ариулугъунг бла, асыллыгъынг бла,
Кесинге сейир этдирген.

Ой, кёкге басхыч салыр болгъанма,
Андан джулдузла  тартаргъа,
Хей!
Бютеу аламны  хазнасын джыйыб,
Сени аллынга  атаргъа.

Санга айтханла бардыла, дейле,
Къабарты, Ногъай, Абаздан,
Хей!
Сени амалтын уруш болса да,
Тиш сюелликме,  таймаздан.

Сени джазыуунг бизгеди, алан,
Ары, бери да къарама,
Хей!
Санга тутулгъан ашыкъ Сымайны
Сен бош джырчыгъа санама.

Ой, чарс устасы атлыма, дейме,
Джар къыйырындан атлаучу.
Хей!
Деу Сымайылны къалай да этдинг,
Сенден бир хапар сакълаучу?

Джюрек Джигимсе, Джан Ёзегимсе,
Ычхыныр къарыу болмайын,
Хей!
Манга джашар онг къалмады, алан,
Этген муратым толмайын.

Кенге къарасам – мийикден, дейме,
Къурманлыкъ этсем – кийикден.
Хей!
Хан Семенлагъа  «тигим»  излейме,
Багъатырланы бийликден.

Махар сууунда – къум балыкъ, дейме,
Джаланджюк сууда – каскала.
Хей!
Бу джюрегими ауур басалла
Санга айтыллыкъ тахсала.

Кел, узатмайыкъ, сёзню созмайыкъ,
Адетге кёре барайыкъ,
Хей!
Бу талпыу буугъан эки джюрекни
Бирлешдирирден болайыкъ.

Ой, обур ауунг барды, дейдиле,
Нюрюнг бар – дейле, тартаргъа,
Хей!
Тутмакъ этгенсе, кючюм джетмейди,
Бугъоуларынгы атаргъа.

Джюрек  Джигимсе, Джан  Ёзегимсе,
Мени насыбха элтирик,
Хей!
Къанатсызгъа да къанат битдириб,
Аны учарлай  этерик.

Сени амалтын  армау болгъанма,
Къараб тураса кёрмейин,
Хей!
Джюрек джагъаргъа уста кёре эм,
Кесинг джаныуну билмейин.

Кёб къууулгъан уу сыйлы  болады,
Кёб тиленнген да алайды,
Хей!
Кюнлей къыйыным болсанг да, ариу,
Халинг халиме джарайды.

Ой,  ау  тюбюнде башынг ийилиб,
Джан – джандан къолгъа кирилиб,
Хей!
Семен Къабакъгъа алай келирсе,
Къарагъан санга терилиб.

Анам, Джулдузхан  сайлаучу, дейме,
Эки эгечим – сыйлаучу,
Хей!
Къарнашым десенг пайгъамбар кибик,
Ашхыгъа  джанын байлаучу.

Джюрек  Джигимсе, Джан  Ёзегимсе,
Сёз бла айтыб – айтылмаз,
Хей!
Джулдуз джолуна чыкъгъанбыз, алан,
Энди ызына къайтылмаз.

Ой, мен асыры уллу кёллю эм,
Айтылгъанлагъа къызынмай.
Хей!
Гюнах тёленмей къалмайды, дейле -
Турама санга базынмай.

Ой, къыз дегенни дертин алгъанса,
Болджалны узун созгъанлай.
Хей!
Чагъар бачхамы къаран этгенсе
Таймай сёзюнгю бузгъанлай.

Кюренли ариу, сылыт этгенсе,
Мени джылла бла сакълатыб,
Хей!
Сени къачырыб алыбмы кетсем,
Къарачай джуртдан атлатыб?

Келечи джюрюй, джумулуб, алан,
Кючден къачама, къутулуб.
Хей!
Мени заманым озуб барады
Сен нек тураса тутулуб?

Этген антыма ёлтюрме, дейме,
Сюйгеннге бушуу этдирме,
Хей!
Аллынга келген насыбны кёрмей
Башынга  заран джетдирме.

Джюрек  Джигимсе, Джан  Ёзегимсе,
Джандан багъалы болгъанса,
Хей!
Не байламайын, не бошламайын
Мени тузакъгъа салгъанса.         

Ой,  таугъа чыкъдым талмайын, дейме,
Болум талпыудан къалмайын,
Хей!
Энди дунияда джашамаз болдум,
Джан Джигим, сени алмайын.

Трам - Семенледе сыйлы боллукъса,
«Ханбийче» дерле атынга,
Хей!
Анам къучакълай, тийре ийнакълай,
Алай келирле къатынга.

Шалакъ дуббурда биченлик барды,
Къаялыны  уа  – буулугъу.
Хей!
Къарт – Джурт элинде кёре эм, алан,
Хакъ ариулукъну урлугъу.

Ой, гелеу болур чаллыгъым, дейме,
Тору ат болур - джерлерим,
Хей!
Башха къызланы джюрек тутмайды,
Джангыз сен болдунг  излерим.

Джюрек  Джигимсе, Джан  Ёзегимсе,
«Ой,  боллукъ эсенг, бол»  дейме!
Хей!
Джазыу тутдургъан  алтын  аякъгъа,
«Да тола эсенг, тол»  дейме.

Джайдакъ генджагъа  мингенме, алан,
Бёрю джортуу, джыгъарлай.
Хей!
Манга бир заман келлик болурму,
Бу тюрлю халдан чыгъарлай?

Ой, Наууш тауда тау шайлыкъ чагъа,
Суу секиртмеден суу  агъа,
Хей!
Махар сууундан джырынг эштиле,
Нарат чегетле харс къагъа.

Къайры къарасам – сени кёргенлей,
Не эштсем – сени эштгенлей,
Хей!
Джюрекге, кёлге терен битгенсе,
Тамам  амалсыз этгенлей.

Къайдан тюбедим, къайдан да кёрдюм,
Джашауум болду – къатышыу!
Хей!
Кел, мындан ары созуб турмайын,
Болсун арада  англашыу.

Джюрек  Джигимсе, Джан  Ёзегимсе,
Да мындан ары  джарсытма,
Хей!
Ол сени бузгъан агундаланы
Зар ауузларын балсытма.

Танг аласында Учкулан эли,
Къанатлы гюрден толады.
Хей!
Джюрек бир - джырлай, бир - сызлай, алан,
Кюнде джюз тюрлю болады.

Ой, чын сюекли,  ой  джибек бетли,
Обур ауунга тюшюрдюнг,
Хей!
Кесинг къайнатхан сезиу къазанда,
Бишиу былай – деб биширдинг.

Сени амалтын этмезим джокъду,
Сени амалтын – ётмезим,
Хей!
Да сен ариуну табалмай къалсам,
Болур муратха джетмезим.

Учкулан башы – Джалан  Къол, дейме,
Нажюйню башы – деббанды.
Хей!
Семен келинле бош кюрешелле –
Ашыкъ табарын табханды.

Джюрек  Джигимсе, Джан  Ёзегимсе,
Мени къолунга джыйгъанса,
Хей!
Бир киши джолун кесалмагъанны,
Тамам да таргъа тыйгъанса.

Ой, бу хатхуда бир кёрюк барды,
Темир эритиб  бюгерлей.
Хей!
Бизге аталсанг эрке боллукъса,
Бютеу тукъумум сюерлей.

Сени тюшюнюу ауруу болгъанды,
Джиликлериме джетерик,
Хей!
Халингде – асыл, сёзюнгде – акъыл,
Бютеу халкъ сейир этерик.

Мен – ташны къырыб, тохана саллыкъ,
Къаяны ёзюн ачаллыкъ.
Хей!
Деу бла ариу бек джарашалла –
Болаллыкъ тюлсе къачаллыкъ.

Ой, танг алада булут чачалла,
Тикли тауланы башлары.
Хей!
Кюеу нёгерге хазыр туралла,
Бу Юч Ёзенни джашлары.

Джюрек  Джигимсе, Джан  Ёзегимсе,
Бир тюрлю хауа  джетдирген,
Хей!
Башха сагъышны башымдан алыб,
Кесинги сагъыш этдирген.

Ой, Тогъуз кёлде – нарзан кёзлеуле,
Ичсенг,– тин кире тёнгекге.
Хей!
Кюнтиймез бийче, бу тынгылауунг
Ушатды мени тентекге.

«Киштикге – оюн, чычханнга – ёлюм»
Дегенлей этиб турма да,
Хей!
Болджалны учун минде, ариуум,
Ишни терсине бурма да.

Сюймеклик деген – джандет къанатлы,
Ол хар имбашха къонмайды,
Хей!
Аны сынагъан джукъа болады –
Ачытхан адам онгмайды.

Аман – Ныхытны джолу тар болур,
Тау джалпакълары къар болур.
Хей!
Сюйген  улан  а сюйген къызына,
Джюрекден, кёлден зар болур.

Джууабсыз къоюб,  баш  булджутсанг да,
Семен Къабакъды келиринг,
Хей!
Манга этгенинг – борчунгду, ариу,
Артда тёленир тёлеринг.

Джюрек  Джигимсе, Джан  Ёзегимсе,
Сен болмай – чархым тутмазлыкъ,
Хей!
Сени амалтын сезиу къозгъалды,
Энди мен тынгы табмазлыкъ.

Махар суунда айланч бар, дейме,
Махар гарада татыу бар.
Хей!
Сюйгенин сакълаб тургъан сюйгенни,
Джаш джюрегинде джарсыу  бар.

Санга тутулуу  тёлеу  кёре эм,
Джан сынчыу бла тёленнген,
Хей!
Бу ишни арты ёлюм болса да,
Болмам джолумдан бёлюннген.

«Аш бермесенг да, къаш бер» дейдиле,
Джылы сёзюнгю къызгъанма,
Хей!
Сенден башхагъа урунуу болмаз,
Джазыугъа чекни сызгъанма.

Джюрек  Джигимсе, Джан  Ёзегимсе,
«Огъайынг» болур – шыбыла,
Хей!
Бу сени сюйген керти адамны,
Айтхан сёзюне тынъыла.

Келчи, ариуум, оноу этейик,
Болджалгъа кишен салайыкъ,
Хей!
Бу джортуб баргъан джалгъан джашаудан,
Насыб юлюшню алайыкъ.

Уллу Лабада  суу джагъасында,
Гокга ханс чакъгъан талада,
Хей!
Хыйсабын этиб бичим салгъанма,
Санга ишленник къалагъа.

Алтынбаш  мекам  саллыкъма, алан,
Ариулугъунга джарашыр,
Хей!
«Акътамакъ  къала» деб айтылырлай,
Миллет сейирге къарашыр.

Терезесине  джабхыч саллыкъма,
Кюн кюйдюрмезлей этинги,
Хей!
Трамсеменлеге  келликсе, ариу,
Дарий  ау  джабыб бетинги.

Джюрек  Джигимсе, Джан  Ёзегимсе,
Хатхуму керген солуулай,
Хей!
Айтчы, ариуум, не зат этейим,
Оноуунг дженгил болурлай?

Сени кёргенлей бир тюрлю болуб,
Тартхан нюрюнгде джутулдум.
Хей!
Ариулугъунгдан артха къалмагъан,
Акъыл сёзюнге тутулдум.

Ол кесинг джагъыб, кесинг ышыргъан,
Ёртен отунгда къуурдунг,
Хей!
Деу кёкрегимден джанымы, алан,
Туура да джауча суурдунг.

Бышлакъны ёзю маяды, дейме,
Ой, эрни ёзю – джорукъду.
Хей!
Боллукъ иш эсе билдир, ариуум,
Тынгылагъанынг боллукъду.

Къызгъан темирни – чёгючге, дейле,
Къылыкълы  атны – къамчиге.
Хей!
Кёб узатмайын, Акъ Кёгюрчюнюм,
Саначы мени энчиге.

Джюрек  Джигимсе, Джан  Ёзегимсе,
Бютеу тёнгекге къайылгъан.
Хей!
Сезиу боранда бурулдум, алан,
Насыбым  болуб тыйылгъан.

Трамсеменледе  ёз барды,  дейме,
Тутурукъ кибик сёз барды,
Хей!
Сенде – байларлай  алдыр ариулукъ,
Бёгекни бюгер кёз барды.

Сарасан кийик къаягъа чыгъар,
Тюлкю атылыр къамишге.
Хей!
Ариу сюйгени болгъан улан а,
Хазыр турады сермешге.

Джалгъан шохлагъа къарама, ариу,
Алагъа чегинг чертилсин,
Хей!
Дуния джыйылыб, сыйынг – сырынг бла,
Тоюбуз алай этилсин.

Сени амалтын тартыша, алан,
Тюшюу да болду, туруу да,
Хей!
Бизге аталмай къалгъанынг болса,
Ёлюм да болур,  къуруу да.

Джюрек  Джигимсе, Джан  Ёзегимсе,
Кюнде кюнюмю джарытхан,
Хей!
Да мындан ары болмагъын, алан,
Сюйген джанымы арытхан.

Башынгда кюпес джаулугъунг, дейме,
Ой, арасында – джибеги.
Хей!
Сени кёрюб да къозгъалмагъанны,
Таш болур, тейри, джюреги.

Джасаулу джыйгъыч этдирдим, алан,
Сен керегинги салырлай,
Хей!
Да дарий – дамха, алтын алдырдым,
Халкъ сенден юлгю алырлай.

Сен бизде эркин джашарса, алан,
Сюйгенинг кибик керилиб,
Хей!
Къайынларынгдан чюйре сёз эштмей,
Оноуунг къолгъа берилиб.

Джюрегим, кёлюм сагъайды санга,
Тёнгегим талпыб учунду,
Хей!
Да къарам тартхан кёб ариу кёрдюм,
Джюрек  а санга тутунду.

Джюрек  Джигимсе, Джан  Ёзегимсе,
Джандан, тёнгекден айырмаз.
Хей!
Аллах буюруб  хынчлы къадарым,
Манга джалкъасын къайырмаз.

Хурзук джанында къобуз согъула,
Той таууш кенге  джайыла.
Хей!
Сени кёрюрге ашыгъыш бола,
Кёрсем тылпыуум тыйыла.

Ой, муратыма джеталмай къалсам, –
Ёзен гёзеннге ушарыкъ.
Хей!
Тейри Адамы,  Аллахды шагъат,
Болалмам сенсиз джашарыкъ.

Энчинг болайым, сен ойнар, дейме,
Нёгер болайым, сыр ачар,
Хей!
Да былай мычый мени сууутсанг,
Керти насыбынг кенг къачар.

Кюмюшбаш юйюнг, айбат сарайынг,
Терезелери джасалыб,
Хей!
Да сен ариуну къачан кёрюрме,
Хан Семенлеге аталыб?

Джюрек  Джигимсе, Джан  Ёзегимсе –
Юч Ёзен бирлай джаратхан,
Хей!
Бир – учундура, бир – ахсындыра,
Болдунг кесинге таралтхан.

Ой сыгын отну ышыргъан кибик,
Джюрек джанмаса джылыу джокъ.
Хей!
Да, Джюрек Джигим,  санга тутулдум,
Бу муратымдан къайтыу джокъ.

Кёзюм кёргенден тоялмаз, дейме,
Джюрек да сенсиз болмайды.
Хей!
Джанынг тартмайын къурулгъан юйюр,
Чыртда насыбдан толмайды.

Джулдузхан анам – къараучу, дейме,
Семен Къабагъы – джараучу.
Хей!
Бизге аталсанг алай боллукъса,
Мийик сенчадан къараучу.

Ой,  къабакъ эшик болумдан айтыр,
Ат керек эрни танытыр.
Хей!
Сюйгенин табыб, юйюр къургъанны
Джашауун насыб джарытыр.

Джюрек  Джигимсе, Джан  Ёзегимсе,
Мени ичимден ишлеген.
Хей!
Сюймеклик деген тюрлю кёре эм,
Бютеу санынгы кючлеген.

Къыйынлы агъач – къакъгъычха, дейле,
Къыйынлы темир – эгеуге,
Хей!
Къыйынлы адам – сюймеклик борчха,
Джюрегин  бериб  тёлеуге.

Чакъ заманынгда юйлениу барды,
Къарт заманынгда – ахсыныу.
Хей!
Кёзиу келгенде  юйюр къурмасанг,
Джюрекде къалыр тыкъсыныу.

Мен – хандарладан, сен – асылладан,
Бал бла джауча джарашхан.
Хей!
Сени амалтын бир кёб болгъанды,
Бир – бири бла талашхан.

Мен Семенлада къала къурлукъма,
Аркъауу болуб темирден.
Хей!
Сени бла бирге  бир кюнюм ашхы,
Сенсиз джашаллыкъ ёмюрден.

Джюрек  Джигимсе, Джан  Ёзегимсе,
Сен – абджыгъанда, мен – таяр.
Хей!
Сюймеклик бла атлам этгенни,
Чырмаула салыб ким тыяр?

Ой, тилде сюек джокъду, дейдиле,
Айтхан – айтырын айтырыкъ.
Хей!
Чыммакъ Кёгюрчюн санга атландым,
Болмайын артха къайтырыкъ.

«Ачыулу – айтыр, ач – ашар», дейле,
Сюйген, сюймеген табылыр,
Хей!
Ныгъыш сёзлеге акъыл бёлгенни
Насыб эшиги джабылыр.

Ой, нюр келбетинг азмайын, дейме,
Керексиз заман озмайын.
Хей!
Келечилеге джылы джууаб бер,
Мындан узакъгъа созмайын.

Ай,  джыл сакълата  онгсуз этгенсе,
Не узун сюрдю сагъышынг!
Хей!
Джулдузгъа ушаш кераматынг бар,
Болурму кёкден къатышынг?

Джюрек  Джигимсе, Джан  Ёзегимсе,
Ёмюрде чыкъмаз эсимден,
Хей!
Къаршчы турургъа кюч табалмайма –
Кесими алдынг  кесимден.

Ол ариулукъ бла къалай да туудунг,
Хар кёрген сени сайларлай?
Хей!
Ол назиклик бла къалай болалдынг,
Деу джюрегими байларлай?

Ой, патчах тархха чыкъгъанлай, дейме,
Къуанчда дюккюч  джакъгъанлай,
Хей!
Бу хапарыбыз джайылды, алан,
Тёбенги джелле къакъгъанлай.

Бу къобхан сезиу – азмазлыкъ, дейме,
Сюйген – джалгъан сёз айтмазлыкъ,
Хей!
Санга тутулгъан ашыкъ Сымайыл,
Айтхан сёзюнден къайтмазлыкъ.

Ой, сени ариу ауазынг, дейме,
Бийче къонгурау къакъгъанлай,
Хей!
Джасаныу халынг, саяу сюегинг -
Лана гокгасы чакъгъанлай.

Джюрек – Джигимсе, Джан – Ёзегимсе,
Кёз тийирмейим кемсизден.
Хей!
Хан Семен Къабакъ онглу къабакъды,
Тюлме джууукъсуз, тенгсизден.

Башым сагъышха кетгенлей, дейме,
Джюрегим эсе – тебиннген.
Хей!
Ариулугъунг  а  аслам  кёре эм,
Сени бу къаты халингден.

Ой,  кече сайын джукълаялмайма,
Башым сагъышха тыйылыб,
Хей!
Кюндюз ишими ишлеялмайма,
Санларым бирден къуюлуб.

Теджелген къызны мен не этейим,
Джюрегим аны  джакъсынмай?
Хей!
Бир къараб кёрген  къалырмы, алан,
Сени кесине табсынмай?

Кёлтюрюб тургъан гаммешим,  алан,
Къурманлыкъгъады – кенгешим.
Хей!
Да мен къадаргъа ёшюн салгъанма,
Хорлам бла битсин дженгишим.

Джюрек  Джигимсе, Джан  Ёзегимсе,
Джиликге дери джетгенсе,
Хей!
Къабханнга тюшген аслан кибикме –
Манга этерни этгенсе.

Джел къозгъалмайды урумсуз, дейме,
Джауум джаумайды булутсуз.
Хей!
Сакълай да тура мыдых болгъанма,
Джан  Джигим, сенден умутсуз.

Джаралы айю джыртыучу болур,
Джаралы аслан мараучу,
Хей!
Джюреги сыннган чек танымайды
Болмагъын аны сынаучу.

Ой, сыйлы ташха алтын керекди,
Джасарда джаныб турурлай,
Хей!
Ариу къызгъа да улан керекди
Насыб къаласын къурурлай.

Сен башхалагъа  алданма, дейме,
Багъангы билген – «мен» деген,
Хей!
Дуниядагъы бютеу джанладан,
Джюрегим тартхан – «сен» деген.

Джюрек  Джигимсе, Джан  Ёзегимсе,
Дуния тыйса – тыйылмам,
Хей!
Уста «къыбдынг» бла къыйгъанса мени
Башха «къыбды» бла къыйылмам.

Гитче Къаншаудан  белги  ийгенме,
Белги алыргъа ышаныб,
Хей!
Джууабсыз къалсам  мыдах боллукъма,
Джюрек джарала ашланыб.

Семен  Къабакъда  чыракъ томурау,
Хазыр турады джанаргъа,
Хей!
Да тоюбузгъа Юч Ёзен келир,
Бийче келиннге къараргъа.

Ингичгетабан чурукъларынг бла,
Къарагъанланы аралтыб,
Хей!
Семен Къабакъгъа алай кирирсе
Джыйылгъан миллет джаратыб.

Джюрек  Джигимсе, Джан  Ёзегимсе,
Мени мийикге талпытхан,
Хей!
Сёз кесаматны буза да тура,
Болдунг джанымы арытхан.

Ой, кюнню бетин булут джабханды,
Джюрек да, кёл да – алайды,
Хей!
Булутну чачар – джангыз сёзюнгдю –
Сары Джаш аны сакълайды.

Согъумда барды мал базар, дейме,
Ауушдан аууб барыргъа.
Хей!
Санга  джасаулу  кюбюр алгъанма,
Къол керегинги  салыргъа.

Ой, Нарсанада туз сатылады,
Пашот от – Кепкей – Къалада.
Хей!
Джюрюген былай деб джюрютгенсе,
Келечи эки арада.

Белимде алтын къамам бар,
Къолумда мермер къалам бар.
Хей!
Бу Сары Джашны кенг джюрегинде,
Сени ойнатыр  алам бар.

Джюрек  Джигимсе, Джан  Ёзегимсе,
Сени амалтын джоюлур,
Хей!
Керти сюйгенни ыхдырсанг, ариу,
Ёмюр джашауунг оюлур.

"Узалгъан къолдан тут" - деген нарт сёз,
Къалубаладан келгенди.
Хей!
Биз экибизни сынаргъа, Аллах,
Бу сюймекликни бергенди.

Джазыу блмаса сени кёрмез эм,
Буйрукъ болмаса сюймез эм.
Хей!
Сен да менича бир ёртенлесенг,
Джангыз башыма кюймез эм.

Сыгын от кибик мыдыхса, алан,
Ариулугъунга джарашмаз.
Хей!
Алай не тюрлю болсанг да, ариу,
Кёзюм башха бла къарашмаз.

Ой, Акъ Къаяны –  тешиги, дейме,
Бу Бурунсатны – джагъасы.
Хей!
Англашалмасакъ болуб къаллыкъбыз,
Агундаларынг табасы.

Сен – ариулагъа  баш  болур, алан,
Мен – Юч Ёзенде  билиннген,
Хей!
Келир къабагъынг – Семен Къабакъды,
Кёбле  болса да илиннген.

Ана къарнашдан туугъанынг болур,
Мени джан шохум, базгъаным,
Хей!
Джылы джуабынг аны бла келсин,
Болду джюрекден азгъаным.

Кечем – джукъусуз, кюндюз – умутсуз,
Тёзюуден тола - толгъанма.
Хей!
Да мараб туруб, Джан Джигим, сени,
Алыб кетерлей болгъанма.

Джюрек – Джигимсе, Джан – Ёзегимсе,
Айтыуда айтыр байладынг,
Хей!
Не – джарытмайын, не – суутмайын,
Къыйнаб турууну сайладынг.

Алабулукъду  ол эки кёзюнг,
Джашилли – морча  кёрюне,
Хей!
Сен къарам атхан адамны, алан,
Олсагъат эси бёлюне.

Алырым болур  – мийикден, дейме,
Шогъайым болур – бийликден,
Хей!
Сезиуге сезиу излейме, алан,
Трам Къабагъына  келликден.

Чегетни  чагъы башласын, дейме,
Джаз джабалагъы битгенди,
Хей!
Да мерекеби джюрекден саркъгъан,
Къагъытым санга кетгенди.

Ёмюр дегенинг – садакъ окъ кибик,
Джашау дегенинг – джортханлай,
Хей!
Къысха ёмюрню бирге джашайыкъ,
Бир къол бир къолну  тутханлай.

Джюрек  Джигимсе, Джан  Ёзегимсе,
Теджелгенлеге ушамай.
Хей!
Сени табмасам, кетер кибикме,
Бу дунияда джашамай.

Къылыкълы ариу, джангыз сен болдунг,
Мени чархымы ойнатхан,
Хей!
Джанны ортагъа салырлай этиб,
Джулдуз саугъала сайлатхан.

Мени кёзюм бла къарасанг, алан,
Хар къылыгъынг да сюйюмлю,
Хей!
Да санга чюйре келген зат бары –
Манга да чюйре, тюйюмлю.

Илишан алдым тау тикге, дейме,
Джая садагъым тартылыб.
Хей!
Сен бир тюз оноу этсенг а, ариу,
Гинасыулукъдан  артылыб?

Тюрсюнюнг  бирде джаз джилек кибик,
Бир башха заман – акъ къаймакъ,
Хей!
Кетмез аурууну бергенсе манга,
Учханкёз ариу Акътамакъ.

Джюрек  Джигимсе,  Джан  Ёзегимсе,
Да мындан ары созмагъын,
Хей!
Аллынга келиб тургъан насыбны,
Эслемегенлей озмагъын.

Мени къадарым чомарт болгъан эд,
Сен – ариу бла тюбетиб,
Хей!
Энди санга да бир дерс  берсе  эд,
Мени сюерге юретиб.

Белимде кескин къамам бар, дейме,
Анга тагъылыб кезлиги,
Хей!
Сени излеген  алтынбаш джашды
Болмай "къалайы", "джезлиги".

Минги тау десем – кёкге тартады,
Миллетим  десем – ёргеге.
Хей!
Биз экибизни джарыкъ тоюна,
Юч Ёзен келир кёреге.

Ой нарт джуртунда  ариу къыз кёбдю,
Хар бири – бирер кюн таякъ.
Хей!
Къарамымы уа  джангыз сен тартдынг,
Айтхылыкъ  ариу,  Акътамакъ.

Ой, «ата» десем – ёзюнгю къыйгъан,
Ана – джанынга  къайылгъан.
Хей!
«Акътамакъ» десем джыр айтылады,
Кёкге, Джерге да джайылгъан.

Ой, джети кёкге басхыч тиредим,
Джулдузну тартыб алыргъа,
Хей!
Да Семен къабакъ ашыкъсын, дейме,
Аны Трам тёрге салыргъа.

Алтын ат керек этдирдим, алан,
Ёшюнлюгюнде – хан  ышан.
Хей!
Да тюз атаргъа Аллах буюрсун,
Алгъанма керти илишан.