Акътамакъ роман в стихах 21 глава Байлыгъыбыз

Джыйырма биринчи башы
БАЙЛЫГЪЫБЫЗ

Тюз байлыгъыбыз – сабандан,
Тау балыгъыбыз – чегетден.
Хей!
Сюймеклик деген аламны, алан,
Хауасы – джети джандетден.

Тюз байлыгъыбыз – ишлеудю,
Тау байлыгъыбыз – ёрлеудю.
Хей!
Сюймеклик деген бу сезиу, алан,
Къозлаулу борчну тёлеудю.

Тюз байлыгъыбыз – зынтхыды,
Тау байлыгъыбыз – тартышды.
Хей!
Болджал салыныб сакълагъан, алан,
Сер адам кибик, къатышды.

Тюз байлыгъыбыз – будайды,
Тау байлыгъыбыз – дыгъылен.
Хей!
Сен эталмазлыкъ зат джокъду, ариу,
Сюймекликге да бир юрен!

Тау балыгъыбыз – такъызюк,
Тюз байлыгъыбыз – джюзюмдю.
Хей!
Сюймеклик ишде эм бек керекли –
Таукеллик бла тёзюмдю.

Тюз байлыгъыбыз – речкады,
Тау байлыгъыбыз – тюртюдю.
Хей!
Сюймеклик ишде муратха джетиу,
Сюйген джюрекни дертиди.

Тюз байлыгъыбыз – джемишди,
Тау байлыгъыбыз - кёгетди,
Хей!
Сени сезиуюнг - джангыз тереклей,
Меники - къалын чегетди.

Тюз байлыгъыбыз - шибижи,
Тау байлыгъыбыз – наныкъды.
Хей!
Сен да менича къайгъысын кёрсенг,
Ишибиз алгъа барлыкъды.

Тау байлыгъыбыз – турнады,
Тюз байлыгъыбыз – турмады.
Хей!
Бу сюймекликни джашил тереги,
Джандет кёгетден зырмады.

Тау байлыгъыбыз – джабышмакъ,
Тюз байлыгъыбыз – сарсмакъды.
Хей!
Биз сюймекликни кёгетин табдыкъ,
Этеригибиз – татмакъды.

Тау байлыгъыбыз – таш кертме,
Тюз байлыгъыбыз – тарыды.
Хей!
Сюймеклик деген бу тюрлю  "ауруу"
Хар саусузлукъдан  арыды.

Тау байлыгъыбыз – штанкъылды,
Тюз байлыгъыбыз  –  къаб болур.
Хей!
Сен джюрегинги киритлеб турмай,
Ача башласанг  таб  болур.

Тау байлыгъыбыз – чёртлёуюк,
Тюз байлыгъыбыз – принч болур.
Хей!
Башынгы былай тартыб турмасанг,
Сёзюмю эштиу тынч болур.

Тау байлыгъыбыз – уу малды,
Тюз байлыгъыбыз – гин  болур.
Хей!
Ашыкъ дегенде, фахмудан сора,
Аллахдан келген тин болур.

Тау байлыгъыбыз – маралды,
Тюз байлыгъыбыз – арпады.
Хей!
Асыл асылгъа урунур, алан,
Хар ким да тенгин тартады.

Тау байлыгъыбыз – гуждарды,
Тюз байлыгъыбыз – быхыды.
Хей!
Сюймеклик деген – эрлайын къобхан,
Тентиретиучю ырхыды.

Тюз байлыгъыбыз – джуркады,
Тау байлыгъыбыз – мандалакъ.
Хей!
Айтханны тюрте,  нюрюнг да кете,
Болуб къалмагъын къуу талакъ.

Тюз байлыгъыбыз – бачхады,
Тау байлыгъыбыз – тыхденди.
Хей!
Да бола эсенг бол, Лана Гоккам,
Чагъар заманынг джетгенди.

Тау байлыгъыбыз – къаяла,
Тюз байлыгъыбыз – талала.
Хей!
Хан Семен усум тутса уа, ариу,
Къалырса кенгден  арала.

Тау байлыкъ – къозу къулакъды,
Тюз байлыкъ десенг – будайды.
Хей!
Не кече, не кюн, тынгы табмайын,
Сюйгенни халы алайды.


Тау байлыгъыбыз - чынарды,
Тюз байлыгъыбыз – джыгыра.
Хей!
Арабызгъа уа бир бек сугъулад
Ол Хапсат деген къуджура.

Тау байлыгъыбыз – тюлкюдю,
Тюз байлыгъыбыз – къобуста.
Хей!
Мени сюймеклик джолгъа нек салдынг
Боллукъ тюл эсенг джол уста?

Тюз байлыгъыбыз – чюгюндюр,
Тау байлыгъыбыз – мусхотду.
Хей!
Сени кёргенли бу хатху деген,
Башха болмайын – пашотду.

Тау байлыгъыбыз – доммайды,
Тюз байлыгъыбыз – къудору.
Хей!
Сен джюрек джюкден башынгы ала,
Манга джюкленди  эм зору.

Тюз байлыгъыбыз - итбурун,
Тау байлыгъыбыз – буу улакъ.
Хей!
Мени джюрегим шынкъартды, дейме,
Сеники – мутхуз джау чыракъ.

Тау байлыгъыбыз – къарагёгенди,
Тюз байлыгъыбыз – алмала.
Хей!
Джохар эшменги учун бууаргъа
Алгъанма алтын  чалмала.

Тюз байлыгъыбыз – гардошду,
Тау байлыгъыбыз – джилекди.
Хей!
Джюрек ишинде эки джаны да
Бирча талпыргъа керекди.

Тау байлыгъыбыз – тау къушду,
Тюз байлыгъыбыз – соханды.
Хей!
Эки тукъумну гынтдыларындан
Бу джарлы джаным тойгъанды.

Тау байлыгъыбыз – джур болур,
Тюз байлыгъыбыз – эрикди.
Хей!
Мен, былай эте, аджашыб кетсем,
Халкъ санга не зат дерикди?

Тау байлыгъыбыз – чум кёгет,
Тюз байлыгъыбыз – эллелле.
Хей!
Сени сюегинг – нызы тереклей,
Кёзлеринг эсе – кёллелле.

Тюз байлыгъыбыз – шорбатды,
Тау байлыгъыбыз – кёгюрчюн.
Хей!
Сюйсенг – тутмакъгъа, сюйсенг – асмакъгъа
Баралыр болдум сени ючюн.

Тюз байлыгъыбыз – исси кюн,
Тау байлыгъыбыз – салкъынды.
Хей!
Биз экибизни сёз бла сюзген -
Мыйы джанындан чылкъынды.

Тау байлыгъыбыз – Къобанды,
Ол тюзледе да байлыкъды.
Хей!
Сюймеклик деген, экеуню элтген,
Толкъун чайкъагъан къайыкъды.

Джер байлыгъыбыз – Минги Тау,
Ийман байлыкъды – динибиз.
Хей!
Шам байлыгъыбыз – халкъыбыз, дейме,
Тин байлыгъыбыз – тилибиз.