Акътамакъ роман в стихах 25 глава Мин кемеге...

Джыйырма бешинчи  башы
МИН, АКЪТАМАГЪЫМ, КЕМЕГЕ


Мин, Акътамагъым, пайтоннга,
Къарамны кенге керейик,
Хей!
Атам джюрюген Кяба джолу бла,
Биз да бир джюрюб кёрейик.

Мин, Акътамагъым, пайтоннга,
Къара  тенгизге  барайыкъ,
Хей!
Джелпе  къайырыб, толкъунну джыра,
Дунияны кёрюб къайтайыкъ.

Мин, Акътамагъым,  кемеге,
Ай, Кюн да бизге тийсинле,
Хей!
Юнюс балыкъла  джан – джаныбызда
Секире, ойнай  джюзсюнле.

Мин, Акътамагъым, кемеге,
Хызыр Илияс тюбесин,
Хей!
«Бу экисине бир болуш!» – деб а
Сыйлы Аллахдан тилесин.

Мин, Акътамагъым, кемеге,
Кемеден тюшсек – къайыкъгъа,
Хей!
Заманы бла иш этилмесе,
Башыбыз къалыр айыбха.

Мин, Акътамагъым, кемеге,
Азау тенгизден – къарагъа,
Хей!
Ойнай  кюле уа къайтырбыз, алан,
Гурушха болмай арада.

Джолоучу дууа этербиз,
Къара тенгизден ётербиз,
Хей!
Уллу Стамбулда Аясофьягъа,
Бир кёз джетдире кетербиз.

Мин, Акътамагъым, кемеге,
Чыгъайыкъ Мермер тенгизге,
Хей!
Сейир – тамаша бола барырбыз,
Мермерден ётсек – Эгейге.

Мин, Акътамагъым, кемеге,
Ара тенгизде джюзерге,
Хей!
Джаным саулукъда болаллыкъ тюлме,
Ой, сенден умут юзерге.

Кеме Афиннге баргъанлай,
Темирин атар тереннге,
Хей!
Афина Румну – ара шахары,
Сейир этдирир кёргеннге.

Эгейден ары – Киритге,
Тюрк кемечи бла келише,
Хей!
Тенгиз толкъунла кемени чайкъай,
Биз сюймекликден сёлеше.

Мин, Акътамагъым, кемеге,
Тунусну сейир этейик,
Хей!
Былада алтын, кюмюш къазалла,
Кёрмючлюк алыб кетейик.

Мин, Акътамагъым, кемеге,
Алджир да джолну юсюнде,
Хей!
Джуртланы кёрюб, халкъланы таныб,
Сейир эте Джер джюзюне.

Мин, Акътамагъым, кемеге,
Гибирал  Тардан ётейик,
Хей!
Андалузлагъа къайта айланмай,
Ингилиз таба кетейик.

Алайда къонакъ болайыкъ,
Кереклибизни алайыкъ,
Хей!
Барыр джолубуз узакъ боллукъду,
Тамам къуралыб барайыкъ.

Мин, Акътамагъым, кемеге,
Атлан тенгизге къараргъа,
Хей!
Толкъуну уруб, кеме чайкъалса,
Хазыр турлукъма тутаргъа.

Мин, Акътамагъым, кемеге,
Ой, тенгиз бетли кёзлеринг,
Хей!
Къулакъгъа – асыу, кёлге – джарашыу –
Ол сени айтхан сёзлеринг.

Джангурдан сора, джанкъылыч,
Тенгиз бла кёкге келише,
Хей!
Керилиб санга къараб турлукъду,
Ариулугъунга эрише.

Джанкъылыч  кёкге джайылыр,
Ой, санга кёзюн къарата,
Хей!
Не къадар нюрюн джайыб турса да,
Ариулугъунга хорлата.

Атлан тенгизни – аязы,
Сыртынга тыйын къаблатыр,
Хей!
Кёрюнмегенлей кези, богъазы,
Бу джол бир азны сакълатыр.

Тюш, дерме, ариу, кемеден,
Атлан тенгизден ётгенлей,
Хей!
Джаратхан Аллах кеси болушуб,
Америкагъа джетгенлей.

Мин, Акътамагъым, кемеге,
Башха джол бла кетерге,
Хей!
Магъриб табагъа бурулмагъанлай,
Мадагаскаргъа ётерге.

Мин, Акътамагъым, кемеге,
Апон даулетин таныргъа,
Хей!
Дин къалалары тюрлюдю, дейле,
Алагъа барыб къараргъа.

Апонну джанынг джаратыр –
Анда сыйлыды билмеклик,
Хей!
Апонла бизни хаман танырла –
Анда да барды сюймеклик.

Тюш, дерме, Ариу, кемеден,
Токиа бизни сакълайды,
Хей!
Ариулугъунга худжум болур деб,
Джюрегим тынгы табмайды.

Мин, Акътамагъым, пайтоннга,
Чыгъайыкъ джангы джоллагъа,
Хей!
Да ойнай – кюле къайтыб келирбиз,
Нарт Къарачайгъа, таулагъа.

Кенг джоллу болур Акла тюз,
Тар болуб, чыкъмаз къаугъала,
Хей!
Баргъандан ары,  ала  кетербиз,
Кесинг джаратхан саугъала.

Чынагъа салам берейик,
Ала – сермешни билгенле,
Хей!
Хиндий а бизни иймей да къояр,
Ала сюйгенни сюйгенле.

Санга дунияны кёргюзте,
Ой, тенгиз аяз къакъгъанлай,
Хей!
Сен онг джанымда турурса, Ариу,
Кёлде суу гокка чакъгъанлай.

Мин, Акътамагъым, кемеге,
Джууукъ – тенг бла къол тута.
Хей!
Биз ызыбызгъа къайтыб келирбиз,
Къара тенгизге джол тута.

СЁЗЛЮГЮ:
КЁРМЮЧЛЮК - образец для показа.
АПОН - Япония.
КИРИТ - Крит.
ХИНДИЙ - Индия.
ЮНЮС БАЛЫКЪЛА - дельфины.
СУУ ГОКГА - лилия.
ЧЫНА - старое название Китая, времени династии Чинь.
ГИБИРАЛ ТАР - Гибралтар.
ЭГЕЙ ТЕНГИЗ - Эгейское море.
АРА ТЕНГИЗ - Средиземное море.
АТЛАН ТЕНГИЗ - Атлантический океан.
МЕРМЕР ТЕНГИЗ - Мраморное море.
КЪАРА ТЕНГИЗ - Черное море.