Акътамакъ роман в стихах 29 глава Халкъда дж...

Джыйырма тогъузунчу башы
ХАЛКЪДА  ДЖЫРЛАННГАН  КЪЫСХА  ДЖЫРЫ

Мин, Акътамагъым, пайтоннга,
Байду да келир  нёгерге,
Хей!
Мен джюз пайтоннга буйрукъ бергенме,
Сени биргенге  тебрерге.

Мин, Акътамагъым  пайтоннга,
Адебли атлай, сюзюлюб,
Хей!
Кюеу джёнгерле алай келирле,
Асланла кибик тизилиб.

Къаяда къаблан джатханлай,
Къамагъа бичакъ такъгъанлай…
Хей!
Бизге аталсанг алай джашарса
Талада гокга чакъгъанлай.

Мин, Акътамагъым, пайтоннга,
Ау бла джабма бетинги,
Хей!
Пайтон чайкъалса дарий ашар да,
Ол ариу чыммакъ   этинги.

Мин, Акътамагъым, пайтоннга,
Манга ышаныб, сюйюнюб,
Хей!
Мен сол джанынгда алай барырма,
Илячин кибик, сюзюлюб.

Мин, Акътамагъым, пайтоннга,
Чолпан джулдуздан нюрлюлей,
Хей!
Мен сол джанынгда алай барырма,
Ой, кёксюл бухар  бёрклюлей.

Мин, Акътамагъым, пайтоннга,
Тоюнга миллет джыйылыб,
Хей!
Мен сол джанынгда алай барырма,
Алтын къылычлай къыйылыб.

Мин, Акътамагъым, пайтоннга,
Сен кёксюл тыйын джагъалы,
Хей!
Мен сол джанынгда алай барырма,
Ой, сары алтын къамалы.

Мин, Акътамагъым, пайтоннга,
Джюрегинг манга терилиб,
Хей!
Да сол джанынгда алай барырма,
Ой, аслан кибик, керилиб.

Мин, Акътамагъым, пайтоннга,
Чына гинджилей сюзюлюб,
Хей!
Кюеу джёнгерле алай келирле,
Сынджыр салгъанча, тизилиб.

Мин, Акътамагъым, пайтоннга,
Дарий байракъла титирей.
Хей!
Хансеменледе ойнай джашарса,
Туура кюбюрчек гинджилей.

Мин, Акътамагъым, пайтоннга,
Пайтон атларынг – джоргъала.
Хей!
Сени джырынгы бузмай айталла,
Махар сууунда шоркъала.

Мин, Акътамагъым, пайтоннга,
Дуниягъа саугъа бергенлей.
Хей!
Мен сол джанынгда алай барырма,
Илячин къанат кергенлей.

Мин, Акътамагъым, пайтоннга,
Бирге минейик аудурмай.
Хей!
Къургъакъ джашаугъа къаратыб къоймам,
Черноморланы саудурмай.

Мин, Акътамагъым, пайтоннга,
Чалыб тутайыкъ къолланы.
Хей!
Къаяны чачыб, кесим ишлетдим,
Пайтон джюрюрюк джолланы.

Мин, Акътамагъым, пайтоннга,
Толгъан Ай кибик джарытыб.
Хей!
Ат ойнатханла байракъ алырла,
Къантор атланы арытыб.

Мин, Акътамагъым, пайтоннга,
Ой,  чакъгъан балий терегим.
Хей!
Ай  кераматлы, джулдуз сыфатлы –
Сенсе дунияда керегим.

Мин, Акътамагъым, пайтонга,
Джанында джортар эгерим.
Хей!
Ат ойната да, орайда тарта,
Биргеме ёсген тенглерим.

Мин, Акътамагъым, пайтоннга,
Эл кёпюр бла ётейик.
Хей!
Ой, бу харс таууш ёзенни джара,
Тёбен Къабакъгъа  джетейик.

Мин, Акътамагъым, пайтоннга,
Къыз джёнгерлеринг – ызынгдан.
Хей!
Башха айтханла къуру къалсынла
Даулет – Герийни къызындан.

Мин, Акътамагъым, пайтоннга,
Боюнга боюм джарашыб.
Хей!
Бютеу Юч Ёзен сейирге къалсын,
Биз экибизге къарашыб.

Мин, Акътамагъым, пайтоннга,
Пайтон атларынг джасалыб.
Хей!
Хан Семенлада келин болурса,
Атынга Бийче аталыб.

Мин, Акътамагъым, пайтоннга,
Тейри эшиклей ачылыб.
Хей!
Мен сол джанынгда алай барырма,
Юсюме нюрюнг чачылыб.

Мин, Акътамагъым, пайтоннга,
Джыйылгъан халкъны аралтыб.
Хей!
Сени джырынгы джырлай барырбыз,
Джаш джюреклени таралтыб.

Мин, Акътамагъым, пайтоннга,
Къызыл къыналай къызарыб.
Хей!
Салам бергеннге саугъа берирбиз,
Терезесинден узалыб.

Мин, Акътамагъым, пайтоннга,
Къонгураулуду атлары.
Хей!
Биз экибизге алгъыш этсинле,
Шам Къарачайны къартлары.

Мин, Акътамагъым, пайтоннга,
Басхыч салдырдым алаша,
Хей!
Ёрге созулмай ариу минерсе,
Аягъынг анга джараша.

Мин, Акътамагъым, пайтоннга,
Миллет басыныб джолунга,
Хей!
Накъут джюзюкле, алтын бууунлукъ
Такъсынла саяу къолунга.

Мин, Акътамагъым, пайтоннга,
Хамыт салгъанма сары атха,
Хей!
Ой, джай чилледе безгек боллукъса,
Алыб кетмесем Наратха.

Мин, Акътамагъым, пайтоннга,
Тенг олтурайыкъ, дженгдирмей.
Хей!
Джюрек сырынгы  манга айтырса,
Башха адамгъа билдирмей?

Мин, Акътамагъым, пайтоннга,
Бетинги кёзден джашыра.
Хей!
Ой, ана, ата, джашагъан элинг, –
Сени арбаздан ашыра.

Мин, Акътамагъым, пайтоннга,
Керам нюр тартыб кёзлеринг.
Хей!
Мен сол джанынгда алай барырма,
Джырда айтыла сёзлерим.

Мин, Акътамагъым, пайтоннга,
Окъа чепгенинг джылтырай.
Хей!
Ой, ызыбыздан  джюз пайтон тебрер,
Кюпес байракъла къалтырай.

Мин, Акътамагъым, пайтоннга,
Ой, гокка ханслы биченлик.
Хей!
Сен – тюрленмезлик, онгмаз ариулукъ,
Мен – сени джашнар этеллик.

Мин, Акътамагъым, пайтоннга,
Пайтон атларынг – торула,
Хей!
Хан Семенлеге келин болурса,
Ой, сыйынг – сырынг сорула.

Ой, кёкге джулдуз себгенме
Кече сен чыгъыб къараргъа,
Эй!
Оюу салдырыб таракъ ишлетдим
Джохар чачынгы тараргъа.

Кёклеге басхыч салгъанма
Андан  джулдузну  тартаргъа,
Эй!
Джулдуз ариугъа, джулдуз саугъа-деб
Элтиб аллынга атаргъа.

Мин, Акътамагъым, пайтоннга,
Кёрюклей ура джюрегим.
Хей!
Башха сюйгенле алай къалсынла,
Сенсе дунияда керегим.