Стихи 30-х годов 20 века. Закутну эскериу

ЗАКУТНУ ЭСКЕРИУ

Джаз ёте да, джай кете да,
Тубанлыда чарс болду,
Гаталаны Закут, хариб,
Энчиликде тас болду.

Джай къошчугъу – ёргеде эд,
Къыш къошчугъу – тюбюнде,
Тагъай салыб чала эди,
Джаб - джангыз  тик  кюллюмде.

Эртден сайын, джангызлай,
Мал ызындан бара эд,
Джангызлыкъдан,  къошунда,
Ашсыз – суусуз къала эд.

Кюндюз ишде къылланыб,
Кече  «ох – ох»  эте  эд,
Джаны, саны  солумай,
Танг атаргъа кете эд.

Ауур ишде тюгениб,
Чий темирча бюгюлдю,
Тюз аманны кеминде,
Кёб заманны сюрюндю.

Бир кюн  Закут  чыкъгъан эд,
Бичен тартыб тюшерге,
Кюрес этиб, хазырлаб,
Гебенчигин сюйрерге.

Эй, не медет, онгмады,
Ол кюн ёлюм табхан эд,
Эниб келе, юсюнден,
Къызгъан кюрес басхан эд.

Ой, джангызлыкъ  аманды,
Аны эсге алайыкъ,
Энчиликге кёл салмай,
Халкъ болгъанча болайыкъ.

Колхоз болуб джашайыкъ,
Олду керти базымлы,
Айры болуб ишлеген,
Болуб къалыр ажымлы.


КЮРЕС - гебен тартхан сагъатда тюбюне салыннган агъыч, бутакъ тартхыч.
КЮЛЛЮМ - кюнбет. Тик кюллюм - тауну, чалыргъа къыйын болгъан, бек тик джаны.
ТАГЪАЙ -таймаз ючюн аякъгъа кийилген темир тырнакъла. Эскиде таулагъа джигитле алай чыгъыб тургъандыла.