Халкъ байрамда. Стихи 30-х годов 20 века

Олимпиада адет болгъанды,  крайда,
Той – оюн эте, халкъ джыйылады хар къайдан,
Ары хар миллет кеси оюнун келтиред,
Джыйылгъан халкъгъа кеси болумун билдиред.

Биз чакъырылдыкъ быйыл да ары, оюннга,
Да салыб бардыкъ ара шахарны тоюна,
Джулдуз джанганча шахары, юйю, орамы,
Къызыл къумачда акъ бла джазылыб саламы.

Ариу тизилиб салынгандыла юйлери,
Адамы – джарыкъ,  кёлюнгю  ала сёзлери,
Биз анда турдукъ ой, оюн ойнай, той эте,
Къарагъан халкъны бизни адетге юрете.

Бизни тепсеуге харс къагъыла эд, кюкюреб,
Бизни джырлагъа джюрекле эриб, титиреб,
Джыйылгъан миллет эжиуге ортакъ бола эд,
Учундурурлай,санынга талпыу сала эд.

Эришиуледе кёб къонакъ бар эд, хар къайдан,
Тул – тубан эди халкъ басынгандан кенг майдан.
Чёб атылды да биринчи болду Дагъыстан,
Оюн кёргюзтдю  сейир болурча къарагъан.

Къарачай чыкъды экинчи болуб  арагъа,
Оюн кёргюзтдю - балхам салыуну  джарагъа,
Сора – тыйыншлы – дерлей нартланы сырына,
Сейир этдирди тепсеую бла джырына.

Ючюнчю болуб ортагъа чыкъды Къабарты,
Бир мыдах джыр бла миллетни этди сагъышлы,
Малкъар джигитле, ат ойнатыуну салдыла,
Айырма болуб сыйлы саугъа да алдыла.

Черкес джунчуду,  алай а  белин къатдырыб,
Джашлары алды айырма ёчню, окъ атыб,
Къумукълула уа джыджым тартдырыб арагъа,
Аны юсюнде ариу бардыла джангызгъа.

Тегей кёргюзтдю къыз тепсеу бла атышыу,
Терк Башы этди, ойнагъан халда, тутушуу,
Къазакъ аскер а, саф – саф тизилиб, аламат,
Джыйылгъан халкъгъа кёргюзтдю оюн – къазауат.

Къарачай къартла, Гюргокъа бла Науруз,
Ауузгъа тюшюб  махдау алдыла, тохдаусуз,
Биринчи ёчню бизге тыйыншлы кёрдюле,
Арагъа алыб  кёб сый, махдау да бердиле.

Сора, кетер кюн, аэропланла учдула,
Кёкден миллетге сейир къагъытла чачдыла,
Ол къагъытлада  орус тарх бла джазылыб,
Аламат сезле: "шохлукъ", "къарнашлыкъ", "мамырлыкъ".

Дуния джыйыб ол къагъытланы ала эд,
Джангы джашаугъа кёлюнден багъа сала эд,
Той - оюн эте эки кюн турдукъ,сыйландыкъ,
Ариу шахарны орамларында айландыкъ.

Джабылыу сёз бла крайны башчысы сёлешди,
Халкъ къаумлагъа сыйлы саугъала юлешди,
Да алай бла олимпиада бошалды,
Бизни област да край биринчиге саналды.

Джыйылгъан  бары кеси джуртуна атланды,
Бу джангы властха разылыгъыбыз къатланды,
Да, къайтыб келдик  Шам–Къарачайгъа къарашыб,
Биринчи саугъа борбайыбызгъа джарашыб.