Трам - Семенни джашы эдим. Белые стихи 60-х г. 20в

/ЧАМЛАРЫНДАН/


Эй, Трам – Семенни джашы эдим,
Къарачайны къадау ташы эдим,
Назмучуланы башы эдим.

Бир заманда джашнаб чакъгъан терек эдим,
Хар кимге да керек эдим,
Къарыусузгъа билек эдим.

Да не этгин, кърау урду, къатдырды,
Ёрге, энгишге чабдырды,
Айтмаз сёзюмю айтдырды.

Октябрь элде джашайма,
Шай бла ётмек ашайма,
Къарыусуз къартха ушайма.

Юй салгъанма самандан,
Хайыр табылмайд сабандан,
Ийнек акъ бермейд, амандан.

Бу сабий–балыкъ, кебекча,
Юй бийче десенг, сернекча,
Ырысхым тутмайд, элекча.

Арбазым десенг, тар кибик,
Огъары джаным, джар кибик,
"Шохларым" десенг, зар кибик.

Аргъышым десенг – къыйнагъан,
Биченим десенг – байлагъан,
Юйдегим десенг – сайлагъан.

Эй, Хан – Семенни джашы эдим,
Къарачайны къадау ташы эдим,
Назмучуланы башы эдим.

Да не этгин, кърау урду, къатдырды,
Ёрге, энгишге чабдырды,
Айтмаз сёзюмю айтдырды.

Муну айтхан Семенланы Сымайыл,
Айыб этме да бу сёзлени бир айыр.

1964дж.
Къызыл Октябрь. Къарачай.