Биченлик. Белые стихи 60-х г. 20в

/ЧАМЛАРЫНДАН/

60 джыллада, Октябрь элни тамадасы, халкъгъа биченлик юлешген сагъатда, Исмаилгъа "динчисе"– деб, асыры джан басмай, хаман лыбыта ханс аслам ёсген бир табсыз джерни теджеб тургъанды. Бир джыл а, Исмаил ачыуланыб, чыгъыб, кюнбетдеги бир иги биченликни сайлаб, эркинликсиз чала тургъанлай, колхозну тамадасы, район башчысы да, биргелерине талай атлы нёгер бла джетгендиле.  Элчиле Исмаилгъа джукъ айталмай, ат юсюнде тынгылауну басхандыла,  район башчысы уа,  хыныракъ:  "сен кимсе, не этесе, къарт?" – деб соргъанды. Джырчы да былай джууаб бергенди:


Э-э,  алгъа  салам бериу  адетибиз эди  къызыл  властыбыз киргинчи,
Да мен санга салам береим, иги джаш, сен манга салам бергинчи.

Огъары орамда  дагъанлы юйчюгюм  къалтырай къалгъанды, ауама – деб,
Ол  юй бийче да  кюреше къалгъанды  ол арыкъ ийнекни  саума – деб,

"Сен кимсе?" – дейсе,  да келбетибиз  танытмай эсе атымы,
Ишекли  болма  джукъалыгъына  мени ашагъан хантымы.

Кёчюб келгенбиз  Октябрь элге  мында джашау этер муратда,
Да биченлигим учхара болуб, мал ашым –  сары лыбыта.

Юйюм битмейди, тирелелмейди, агъач керегим табылмай,
Бир кюн къалмайды  зауаллы бийче  мени юсюме алынмай.

Сабий – балыкъ да тамышыб турад  бу май къазанла къайнат – деб,
Колхоз башчыда айтдырыб турад  лыбыта  бетни сайла – деб.

Гелеу кырдыкны  менден къызгъаныб  да  башхалагъа  берелле,
Мени малымы  къалгъан  малладан  ишексиз  айры кёрелле.

Чингкеаякъ ийнек сют баджармайды  лыбыта хансдан ёнгелеб,
Уакъ къауум  да хантус ичмейди «сютю джокъду»  – деб, ёбгелеб.

Да не этейим,  тёзе – тёзе да,  тёзюм дегенден бошадым,
Да алай бла закон бузгъаннга, самовольныйгъа  ушадым.

Мен «терс» болайым, «динчи» болайым, сиз  мени тюртер, тышларлай,
Джарлы ийнекни гюнахы неди лыбыта бла къышларлай?

Муну айтхан Семенланы Сымайыл,
Айыб этме да, иги джаш кибик, бу сёзлени бир айыр.

/Джырчы сёзюн бошар – бошамаз, райондан келгенле  атладан тюшюб, саламлашыб,  район башчы да кечкинлик тилеб, къол тутуб,  – "айыб этме, Сымайыл, таныялмагъанма, сыйынг башымы юсюнде, къалайын сюйсенг, алайын чал" – деб бары да алай кетгендиле. Ол джолдан сора  Сымайылгъа  лыбыталы бетни эл тамада чыртда  теджемегенди/.