Джамбул Джабаевге. Стихи 40-х г. 20в

Айтхылыкъ  акын,  Джамбул, къарнашым,
Мен,  Сымайылма, эски джолдашынг,
Джыр  айтыу  бла танышхан эдик,
Джюрек джылыуну байлашхан эдик,
Къарнаш - дегеним,  Къазакъ - Уллусу,
Къралыбыз болуб къара джаулусу,
Юсюне джалгъан мухурну уруб,
Советле ата джуртундан  къууб,
Сизге келгенди Къарачай халкъым,
Мен да тутулуб, къарады атым.

Айтчы, къарнашым, кимге джырладыкъ?
Джан - къан  аямай кимни махдадыкъ?
Совет властха не питна этдик?
Неден бу мискин халлагъа  джетдик?
Бош бир чам ючюн джеза салдыла,
Эркинлигими къолдан алдыла,
Сизни тюрмеде турама алай,
Терезе кёзден тышына къарай,
Тышда уа миллет - комендант чекде,
Кими - Джамбулда, кими - Чум - Кентде.

Уланларыбыз - Къызыл Аскерде,
Къалгъанларыбыз - сизни джерледе,
Сабий, къарт, къатын  къуулгъан болду,
Джурт сыйырылыб, мал талан болду…
Тюрмеде бары  манга - баштёбен…
Гюнахсыз миллет - «хашкен», «келепен»…
Сарнайды халкъым,  бу зорну чекген,
«Насыблыды» - деб,  «джуртунда ёлген!»
Совет Выластны ачылды ёзю –
Бир тюл кёре эм  иши бла сёзю!

Джурту ариуну - кюню къарангы,
Ол болмай къалмаз былай талангы,
Минги тау кёбню кёзюн къаратыр,
Чокъуракъ суула кёбню аралтыр,
Ата - бабаны ёмюрлюк джери
Ким билир,  халкъгъа къайтырмы кери!..
Къазакъ - Уллусу, тилегим барды,
Быллай хал бла аллыбыз - джарды,
Акъыл сёзюнгю къызгъанма  бизден –
Властха  сёз джетдир халкъны юсюнден.

Мен  къызыл къралгъа кертичи  эдим,
Джырда, айтыуда сёзлюсю эдим,
Хар хорламына джыр эте, джырлай,
Аны махдадым, насыб джоралай,
Энди ол джырла  унутулсунла,
Аланы орнун кюуле алсынла,
Миллет къырылыб барады тамам,
Бизге джан басмай джангыз бир адам!..
Сенден тилейме, джаз уриягъа,
Бу зулму айгъакъ болсун дуниягъа!