Уллу Аллах манга берген хаух джанны узаймайын сыйырлыкъды, аллыкъды,
Мен кетсем да айтханымы барысы, ёллюк тюлдю, миллетим бла къаллыкъды.
Мутхуз кюнюм чыгъарыкъды булутдан, тюз аллыкъды терсден мени хакъымы,
Шам - Къарачай энтда манга сый бере, ажым эте айтырыкъды атымы.
Джырларыкъла къуанчлада, тойлада "Акътамакъны", "Минги тауну", "Анамы"...
Къарачай тил тас болмаса дуниядан, унутурукъ тюлдю халкъым аланы.
Маулутлада зикирлерим айтылыр, къуанчлада алгъышларым этилир,
Бюгюн манга джол бермеген зарлыкъны, тамамы бла тамырлары кесилир.
Джашау чакъда адамлыкъны тас этмей тырнакълагъыз, кюрешигиз джашаргъа,
Халкъыбызны джашаууна джарарча къолугъуздан келген затны къошаргъа.
Уллу Аллах манга берген хаух джанны узаймайын сыйырлыкъды, аллыкъды,
Мен кетсем да айтханымы барысы, ёллюк тюлдю, миллетим бла къаллыкъды.
Аламгъа тебрей. Стихи 70-х г. 20в
© Copyright: Исмаил Семенов-Джырчы Сымайыл, 2020
Свидетельство о публикации №220111500807
Свидетельство о публикации №220111500807
Рецензии