Чыкъдым кёклеге учунуб, учуб,
Мийикден къараб дунияны кёрдюм,
Мен эшталмагъан таууш къалмады,
Джашаугъа "сейир-тамаша" - дедим.
Манга келген эд аллай бир кёзюу:
Джумлай аламгъа айтдым сёзюмю...
Къарачай тилни сыйлы этдирдим,
Къарачай джырны кенге эштдирдим.
Алай, не келсин, къадар буюрду -
Учхан къанатым сыныб къуюлду...
Бош ышаннган эм джазыу - джибине -
Тёнгереб тюшдюм аякъ тюбюне.
Мен - шайтан джелде бурулгъан зыгъыр,
Джазыу - тирменде эзилген бюртюк...
Къыйыным - халал, кесим а - харам,
Бырнак этдиле кючлюле, тюртюб.
Кёл басдыргъаным джаб - джангыз бир зат:
"Джырчы Сымайыл" - халкъ атагъан ат,
Ёлюб кетсем да ол атым къалыр,
Халкъны аузунда джырым айтылыр.
Джырчы Сымайыл-халкъ атагъан атым. Стихи 80-х г. 2
© Copyright: Исмаил Семенов-Джырчы Сымайыл, 2020
Свидетельство о публикации №220111500861
Свидетельство о публикации №220111500861
Рецензии