Патимат. Стихи 40-х г. 20в

Ой, Хырхалада субай Патимат,
Олтура бардыкъ, къараша,
Бизни аллыбызгъа алай чыкъгъан энг,
Кийген кийиминг джараша.

Ой, чериуанча чилле джаулугъунг,
Чачагъы токъмакъ тюйюлюб,
Келишалмасакъ абзырарчама,
Насыб дегенден  тюнгюлюб.

Ой, чериуанча чилле джаулугъунг,
Табанларынгдан къаз ёте,
Джукъ сездирмейин нек тынгылайса,
Умутларымы аз эте?

Къанджалбаш юйле ишлетдим, алан,
Терезе къабла  салдырыб,
Излейме - дей да, керексе - дей да,
Таб къойдум къылыкъ алдырыб.

Келечи Наныкъ иш баджармайды,
Тюз кесим салыб бармасам,
Бу халкъ не айтыр, ийнар, джыр этиб,
Патимат, сени алмасам?

"Хар кёргенине бир джыр этед" - деб,
Гурушханг манга джетгенди,
Ийнан сюймеген, иш этиб санга,
Мени  сёзюмю этгенди.

Ой, чериуанча чилле джаулугъунг,
Эки къанаты чох болуб,
Узакъ ёмюрню алай джашарбыз,
Бир - бирибиз бла шох болуб.

Мен - Семенланы ашыкъ - Сымайыл,
Сен - Ёзденланы Патима,
Къысхаакъыллыкъ этесе - дейме,
Келечи къоймай къатынга.

Къалаханлада - минг кёзлю оймакъ,
Аны Хырхалары туталла,
Ийнеден ийнек этген къоллары -
Деб манга хапар айталла.

Ой, окъа тигиучю саяу къолларынг,
Къурч ийнелени чий этер,
Бу мени кибик, къургъакъсёзню да,
Кечеден кюнге юй этер.

Бир - бирибизге джарашырыкъбыз,
Схарлагъа тыйын салгъанлай,
Бошбоюнлугъум кетиб къаллыкъды,
Патимат, сени алгъанлай.

Ой, имбашымда чыммакъ башлыгъым,
Анга тюйген тюйме тигерсе,
Мен - къызгъан темир, сен - чемер уста,
Къайры сюйсенг да бюгерсе.

1938дж.