Эй, джастыгъым, таб турмайса бойнумда,
Сени къагъыб салыр кюч джокъ къолумда,
Сени къагъыб салыуучумдан бошадым,
Ауруу тутхан ёледжекге ушадым,
Энди сени ким тюзетсин, кёл ашаб?..
Тюзетиучю учду – кетди, аз джашаб…
Къуунг – ары, тышынг – бери бёлюне,
Бир – джумушакъ, бирде хыртды кёрюне,
Рахат берир бир мардада турсанг а,
Сыртымы да аурутмайын тутсанга а,
Узакъ бармаз энди манга къуллугъунг,
Тюшде, тюнде кёрюннгенди боллугъум.
Санга харлы тыш салыучу – келмезден,
Сенде бла менде халны – кёрмезден…
Энди узун кюрешмезсе мени бла,
Мен да узун тартышмазма сени бла,
Сенсиз джатар кюнюм учсуз – къыйырсыз…
Эй, хадаус, къалкъыма къой, къыйынсыз!
1980.Терезе.Къарачай.
Джастыкъгъа. Стихи 80-х г. 20в
© Copyright: Исмаил Семенов-Джырчы Сымайыл, 2020
Свидетельство о публикации №220111800675
Свидетельство о публикации №220111800675
Рецензии