Ашда – бёрю, ишде – ёлю
Эринчекни шартыды,
Дуббукъ, матух, дюрген, тюрт – мюрт
Аны таймаз атыды.
Эринчекле чалалмайла
Дюрюлерин къайырмай,
Бир кесекни туралмайла
Селеке сёз айтдырмай.
Бел ийилтмей чаладыла
Борсукъ сокъмакъ этгелей,
Оруннга терк ташаялла
Солур заман джетгенлей.
Эринчекге джумуш айтсанг
Табсыз къарай кёзлери,
Джуабына тынгыласанг
Тюртер болур сёзлери.
Ох – охлары танга дери
Джукълатмазла джыйынны,
Эринчеклик аруу тийген
Тюзюн айтсакъ – къыйынлы.
Да хайдагъыз, джигит джашла
Джигер юлгю болайыкъ,
Хомухлагъа джылыу бермей
Эс бёлмейин къояйыкъ.
Уруб келген бу туу санланы
Джалкъаулукъгъа бермейик,
Эринчеклик деген халны
Арабызда кёрмейик.
Ойнай – кюле иш этейик,
Халкъдан махдау алырлай,
Шам – Къарачай байракъ алыб
Башчы болуб къалырлай.
1933дж.
Чалкъыда эринчеклеге. Стихи 30-х г. 20в
© Copyright: Исмаил Семенов-Джырчы Сымайыл, 2020
Свидетельство о публикации №220111901544
Свидетельство о публикации №220111901544
Рецензии