Къыш - къыямут боранлатыб, титиретед,
Къуу кюнлени бирем - бирем седиретед,
Джюрегиме кетмез бушуу тюшюргенди,
Ахыр кюнню кёз аллыма келтиргенди.
Кърал-тюрленди, халкъ-тюрленди, мен-тюрлендим,
Заман атхан темир аугъа тыкъ бёлендим,
Джол табалмай арсар болуб кёб айландым,
Умутсузлукъ болум бла бек байландым.
Бичим бар эд, этер къарыу табылмады,
Джол кесгеним джолдан алыб атылмады,
Болур эди бир гюнахым, Аллах билген,
Ансы джашау болмаз эди былай тийген.
Не этейик, болур болду, бояу сингди,
Мен къарагъан джулдуз кёкден джаныб энди,
Энди манга джарыкъ берлик – табылмазлыкъ,
Кёгюме да джангы джулдуз – тагъылмазлыкъ.
Къыш - къыямут боранлатыб, титиретед,
Къуу кюнлени бирем - бирем седиретед,
Джюрегиме кетмез бушуу тюшюргенди,
Ахыр кюнню кёз аллыма келтиргенди.
Къыш кечеде. стихи 80-х г. 20в
© Copyright: Исмаил Семенов-Джырчы Сымайыл, 2020
Свидетельство о публикации №220112301650
Свидетельство о публикации №220112301650
Рецензии