Сары къызыма. стихи 80-х г. 20в
Сары къызым, айтханыма тынгыла,
Джашаууму болгъаныллай ангыла,
Манга, энди болур деген болгъанды,
Ёлюм бла бетлеширим къалгъанды,
Къолунгдагъын терсин, тюзюн тазалаб,
Мен кетгенден бираз заман аралаб,
Итле бла талашыугъа кирмейин,
Башха къолгъа къолунгдагъын бермейин,
Халкъгъа джетдир мени айтхан сёзюмю…
Кёб турмайын мен джумарма кёзюмю,
Ёлюм - хакъды, андан киши къачалмаз,
Ёлмез джашау киши излеб табалмаз,
Тау да, тура, ашала да, тюз болур,
Кетген бары джангы кепде ёз болур,
Ол ёзден да джангы сурат джанланыр -
«Джашау» деген бу кёзбаугъа алданыр…
Ол Аллахны буйругъуду… Джылама,
Гъаршдан келген буйрукъгъа терс къарама.
Джингирик. 1981.
Свидетельство о публикации №220112401145