Тойда. чамларындан. 20-чы ё. аллы

/Исмаилны уллу джашы, шаир, Семенланы Азретни эсгериулеринден./

Бу  1905 джыл  болгъанды. Шидакълагъа келин келеди. Сымайыл да, Семенланы джашла да тойгъа чакъырыладыла.  Да  ау алыу адетде, алгъыш этерге,  джырчыны ортагъа чакъыргъандыла.
Келин келтирген юйде  уа,  тышына чыкъмагъан эки эгеч, юйленген джашны ёсдюргендиле.  Ала аны юйлендире, сора келинни тюйе да къысдай тургъанлары халкъгъа белгили болса да, киши юйюр джашаугъа сугъулалмай, терсликлери сингдирилиб тургъанды.
Сымайылгъа алгъыш аякъ келгенди, сора алгъышны этиб бошаб былай джырлагъанды:

Ой,  Шидакъладан адам келгенди,  тойгъа чакъыра  джашланы,
Арты тюйюшге кетмеге эди, аллы чамладан башланыб.

Ой, Шидакълагъа келин келгенди,  арбазларында той бара,
Къайын анала экеулендиле,  Годжахан бла Габгара.

"Берне излеуде усталла", дейле, къайын анала биригиб,
"Да келген келин кетеди", дейле, ала джаратмай,сюрюлюб.

Ой,  Габгараны шайтан къаргъасын,  Годжаны  тауда  джек сюрсюн,
Бу келинни да тюерикмилле,  къоярыкъмылла, ким билсин?


Былайда адамла харх болгъандыла. Эки эгеч - къайын ана да таргъа тыйылгъандыла. Джыйылгъан халкъ да айыб этиб, терсликлерине сагъайтхандыла. Андан сора эки эгеч атама  «Шибижитил Сарыбаш»  атаб,  джырчыдан джаллаб джюрюучю болгъандыла,  келин да,  уланла  анасы болуб, Сымайылгъа орус къауракъдан къабдал бла къол керек саугъа этгенди.