Чамларындан. 60-е г. 20в

Хрущевну заманында Октябрь элде  къытлыкъ бек эсленнген эди. Хар кюн сайын, биз, къыз  сабийле, тюкенни аллында  ётмек сырагъа сюелиб туруучан эдик, хлебовоз келгенлей бирер ётмек алыр ючюн. Эркиши сабийле уа патеген сатхан  уллу  бёчкени къатында сюелиучен  эдиле, сора патеген келгенлей, хар ким  литрлерин алыб къайта эди. Туура ол заманлада «трудоденлени  ачха бла тюл, бачхада ёсген затла бла (джемиш) берилликди деген хапар чыгъыб,  халкъ  «огъай»  –  деб турса да, къулакъгъа алмай, анам бла атамы, уллу эгечими трудоденлерине  самосвал толу бир быхы берген эдиле. Атам да, бизни къыйнамаз ючюн,  хар болумсуз  затны кюлкюча ангылатханы ючюн, ингир ушакъгъа атама келиучю хоншула джыйылыб, джашау – ашаудан айта тебрегенлеринде, атам да сёзге былай айтыб къошулгъан эди:

ХРУЩЁВНУ ЗАМАНЫНДА

Къара ётмекге къуйрукъ болгъанбыз,
«Бир къолгъа   –  бир» –  деб,  сатыб алгъанбыз,
«Къара  ун  ёзлю,  аламат» –  дейле,
Акъ  унну  бери  келтирмейдиле,
Ачханы  бизге  артыкъ  кёрелле –
Трудоденлеге  быхы  берелле,
Быхыны  –  кемир, ётмекни –  чайна –
Ударник болур талпыу бла къайна!..

Башчыла – семиз, халкъ – ёлмез – къалмаз,
Быллай  джашаудан,  тейри,  кёз  джанмаз.

1962. Къызыл Октябрь.