Эски балтам. стихи 80-х г. 20в

Аргъыш этген, юй ишлетген, эски балтам,
Сени манга къойгъан эди хаджи атам,
Сен  иенги  сыйын бир да тюшюрмединг,
Бир ишде да манга ажым этдирмединг,
Джити  аузунг бичакъ кибик, кесди, керкди,
Айырмадынг  не эменни, не да джеркни,
Джумушагъын, къатысын да бирча – урдунг,
Билеу, эгеу тийдиртмейин алай турдунг.

Къош къурдунгдунг,  ойма салыб  юй ишлетдинг,
Джол джанына ныгъыш тахта тёшелетдинг,
Биз экибиз арба этдик,  джолну тутар, 
Буруу салдыкъ, ётген бары къарам атар,
Сен кесинги билетмединг, эгетмединг,
Табсыз болуб иш болумну кем этмединг,
Сабынг – сыйдам, кесинг – темир асылындан,
Хар ишими этдинг, алай,  эм табындан.

Неле чекдик, не джол ётдюк биз биргелей,
Чегетлеге, чауллагъа кёмюлгенлей!..
Энди сен да, мен да болдукъ ашалгъанла,
Джылла эгей болумлары бошалгъанла,
Сен джатаса тар гёзенде, тот тутханлай,
Мен турама  къуу – шуу  юйде, онг атханлай,
Экибиз да бу джашауну джырыб ётдюк,
Бет уялтмай, ахыргъа да алай  джетдик.

Энди мен да, сен да – джангыз, заман тола,
Сен – тот басыб, мен – тёшекде,  кючсюз бола,
Айырылыу заманыбыз джетиб келе,
Бюгюн санга джюрегимден джылыу бёле,
Атам тутхан сабдан тута, сени сылай,
Ич джау сюртюб бусхулунга алай байлай,
Тюб табхагъа  джерлешдирдим, сакълангын,  деб,
Менден артха къаллыкъла бла джокъланнгын,  деб.

  1981дж. Терезе. Къарачай.