Маммат келген кюн айтханы. Белый стих. 60-е годы 2

Адамлыкъда   Октябр  элни адамы   кишини  алгъа  иймез,
Мында биреу биреуню   малына,  хабджюгюне тиймез,
Бу элде эшикге кирит салыуну да  киши билмез.

Тиширыулары,  джол къоюб, туруучандыла  къыйырда,
Да, джашы десенг барысы  джетиб, ишни къолунгдан сыйыра,
Сабий дегенинг а, айтылгъанны барын тайдырмайын  айыра.

Эй, Октябр элни адамы десенг, адамлыкъдан  юлюшлюдю,
Баргъан джерине  адебге кёре, джери – орну  бла  джюрюшлюдю,
Къолу – ачыкъ, кёлю – джууаш, алышлы – тюл, беришлиди.

Октябр  элни  джери десенг,  Атчабхан тюбю тюзюдю –
Къарачайны,  тау аллы деген, таугъа ачылгъан кёзюдю,
Сабаны, отлауу десенг, а – туура мелхумлукъну кесиди.

Эй, Октябрь элни адамы  десенг – чырайлыды, келбетлиди,
Хоншулукълары, тигимлери – джауда бишгенлиди, этлиди,
Бу чегетлери десенг  а – чынар, чёртлёуюклю, джерклиди.

Кърал атыб къойгъан Сымайылгъа,  Октябр  эл болду дагъан:
Юйюмю салыргъа келди маммат, сейир болурлай къарагъан,
Къарачай миллет – онглуду,  дейме, онгсузгъа, къартха джарагъан?

Юйдеги – уакъ, кесим – къарт болуб,  юй тура эди тирелмей,
Да джигит джашла джетдиле эрлай, не айтдырмай, не тилетмей,
Къарт Сымайылны  узакъ джюрютюб,  кенгден устала излетмей.

Нарт – Къарачайда тутула келгендиле аталадан къалгъан адетле,
Туудукълада да  аз тюйюлдюле  маммат  адетни билген, джигитле,
Да,  бу асыл элге уа  джетсин – дейме, тиленнген бютеу тилекле!

Эй, адамны – юйюр халы танытыр, халкъны – ата – баба сыры,
Октябр элни хар ышанында  кёрюнеди  онглу аталаны  шамы, сыйы,
Да, ахырзаманнга дери кесилмез болсун быллай уланла ёсдюрген   
Шам – Къарачайны  джашау ызы!