Къысха оюмла

*
Хан байрагъы - къарлауундан,
Генджа джоргъа - барыуундан,
Джер асылы - отлауундан,
Адам хали - атлауундан.
*
Оюм байлыкъ - акъыл сёзде,
Тукъум сыры - асыл ёзде,
Сезиу болум - джюрек безде,
Ётгюр джюрек - бёгек кёзде.
*
Таугъа чыкъсанг  тагъай керек,
Кёл джазаргъа шогъай керек,
Таргъа кетсенг "хахай" керек,
Кир иннетге "огъай" керек.
*
Мал чарпыса - къошунг турур,
Сый чарпыса - тыбыр къурур,
Адебсизни  джин-джек урур,
Тюзден терсге джолун бурур.
*
Адеб сыйны тамалыды,
Джарашыуну амалыды,
Чюйреликни балхамыды,
Миллетинги  саламыды.
*
Адебсизден намыс кетер,
Намыс кетсе айыб джетер,
Халкъ аллайны сёзюн этер,
Тёр джеринден артха тюртер.
*
Билгич десенг - себеби бла,
Асыл  десенг - адеби бла,
Миллет десенг - адети бла -
Къаннга синнген келбети бла.
*
Ашхы десенг - иши бла,
Аман десенг - тиши бла,
Джалкъау - чийи-биши бла,
Джигер - сыйгъа тийиши бла.
*
Хан байрагъы - къарлауундан,
Генджа джоргъа - барыуундан,
Джер асылы - отлауундан,
Адам десенг - атлауундан.
*
1970. Къобу-Башы. Къарачай.