Хатхум къысхан кюн

Джаназы сафда турдум къыйырда, кёзге тюртюлмей,
Кёз – къулакъ болуб къарагъанланы эсин бёлдюрмей,
Джахил афенди чарт – гурт окъуду джаназы дуа,
Мен да сюелдим  уллу бушууум  хатхуму буа.

Ёлгеннге толу дуа этилмей, дин шартха кёре,
Динсизле салгъан законну, шартны тюбюне кире,
Къачаннга дери былай турайыкъ, заран джетгенлей,
Динни, миллетни, адамны  сыйын сансыз этгенлей?

Хар джаназыгъа келиучендиле «къызылджагъала»,
Кёзге тюшгенни къаламгъа алыу – адет алада,
Мени  «динчи» деб  тамгъаладыла,  сёлешмез этиб,
Динни шартларын  билмегенлеге,  юретмез этиб.

Орус, клисагъа рахат джюрюудю, къулакъгъа алмай,
Биз а турабыз межгит юйюне аякъны салмай,
Ууакъ къауумгъа  школлада динни къаралайдыла,
Ма алай бла сабий эслени "джаралайдыла".

Иблисни джолун тутханла бизге закон салдыла,
Аллах буюргъан дин кереклени  къолдан алдыла,
Джангы тёлюню тюрлендирдиле,  «Аллахсыз»  этиб,
Батар этдиле  «къара батыугъа»,  тинсизлик джетиб.

Къоркъуу  сингенди шах – тамырлагъа – адамла юркек,
Къуандырмагъан бу джашаудан да илгенди  джюрек,
Даулетни халы – басыудан – басыу, тёзсенг – тёзмезлей,
Миллетни тини  барады тайыб, артха келмезлей.

1961. Къызыл Октябрь. Къарачай.