Самоизоляция ва я куьгьне ц1ийи йис

       (Юмореска)
   Дивандал къатканвай Ханлара патав гвай гъвеч1и столдал алай акъваз тийиз шаир Сажидинан "Вун накь вучиз атаначир" мани язавай телефон къачузва.
   - Алло, вуж я зенг ийизвайди?
   - Ам зун я,Беглер я. Гьик1 кьиле физва ви самоизоляция?
   - Агь, вун сагърай,Беглер.Вунни хьаначирт1а, зун дарих хьана рекьидай. Я са рахадай кас авач,я илифдай дустар авач.Кьилди жуван хушуналди к1валин дустагъ кьиле тухузва.
   - Я Ханлар, бес ви паб авачни к1вале, гьадав рахада ман.
   - Яда, за ваз вуч лугьун.Гьар са ч1ехи сувар алукьайла, ам вичин дидедин патав физвайди я. Ат1а кино авай-е,гьана хьиз зи пабни гьар йисуз 31-декабрдиз дидедин к1вализ фин адет хьанва.За ц1ийи йис кьилди кьабулзава. Вишни кьабулзава, къайи шишни.
   - Бес гилани ви паб хтанвачни, къе 12-январь алукьнава?
   -Я дуст кас, ада пул тагудай отпуск къачунва 15-далди. Без содержания лугьуда-е урусдалди. Заз мешат тахьуй лугьуз.
   - Ак1 ят1а, вун ялгъуз я ман. Куьтягь хьаначни ц1ийи йис къаршиламишна?
   - Куьтягь жезвай-е...Бес мад куьгьне ц1ийи йисни жугъунихъ атана акъвазнава. Гьам ни кьабулда?.. За, за...Ханлара.
   - Кьилди хъваз ксуз жедани? Эхир мус хьуй?
   -Яда, за ваз чинеба лугьун, чарабуруз лугьумир.Кьилди авач-е.К1валин вини кьиле сад мад ава. Гьамани дивандал ала, захъ галаз хъвазва, амма роспотребнадзорди къалурнавай мензил хуьзва.
   - Маскаяр,бегьлеярни алани?
   - Ваъ, яда. Вуна гила ягьанатарзава.Маска алаз эрекь, чехир, пиво хъваз жедани? Адай я т1еквен кьванни авач сиве цадай.
   - Я Ханлар, икьван ч1авалди ваз недайди ни гьазурзава? Заз чизва, вавай са хуьрекни, са ширин чай квачиз, гьазуриз жедайди туш.
   - Сагърай зи паб. Ада, и кар чиз,верчерни, балугъарни чрана, аш-зат1ни авуна, са катулдавай картуфарни рганвайди я.Лап и вацра бес жедайвал.
   - Яда, а ви мугьман вуж я вахъ галаз т1уьн-хъун ийизвай.
   - Валлагь,Беглер, вуна зун айибмир, ам заз чидайди туш. Гьа 31-декабрдилай авайди я.
   - Бес куьн рахазвачни?
   - Рахазва..рахазва... анжах са зун я ман рахазвайди. Чидач, ам лалди яни, тахьайт1а бишиди.За гъиле рюмка кьурвалди, гьадани кьада.За хъвада, гьадани хъвада.За закуситда, гьадани Анжах рахадач. Вуж я, вуж туш чидач.Нез,хъваз ксузва.
   -Бес икьван йикъара чарадан к1вале жедани? Белки ам угъри я жеди. Я тахьайт1а...
   - Ваъ, ваъ,Беглер. Ам пис кас туширди аквазва.Гзаф секин кас я. Мад мугьмандиз "ахлад" лугьуз жедани?
   - Я Ханлар, ерли рахан тийидай инсан жеч эхир.Адан фикир вуч ят1а чирна к1анда.
   - Ингье, гьа за вуч авурт1а, гьадани тикрарзава.Зун къарагъда, гьамни къарагъда, за сад язава - гьадани. Аламатдин мугьман я.
   - Анай манидин ван къвезва хьи!
   - Ам телевизор я, чкадин телевиденидай концерт гузва.Яда мад са аламат ава, ам ерли телевизордиз килигзавайди туш.
   - Бес ам квез килигзава?
   - Залай вилер алудзавайди туш.Чидач, вич галачиз за кьилди хъваз кич1езват1а.
   - Жеч, я стха! Гила ада вучзава?
   - Са зат1ни, килигзава заз кац хьиз. Зи гъил рюмкадал физва, гьаданни.За мубаракзава куьгьне ц1ийи йис, гьадани...
   - Бес вуна ам рахадайди туш лагьаначирни?
   - Адай ван акъатзавач, амма зи ч1алар ахъайзава. Къала кван, зун адан патав фин кван садра... Йоъ...амни зал къвезва.. и гавурдин келледал са путулка гьалчин кван...
   - Ам вуч ван я? Гуьзгуь хайи хьтинди яни?
   -Гуьзгуь хун хъсан яз гьисабда.Анжах и фасикьни, зун икьван йикъара алцурарай фасикьни квахьна. Гуьзгуь шифоньерда авайди тир. И фасикь гьана авай кьван...
   - Гена гьак1 алатайди,Ханлар...
   - Беглер, яда ваз и куьгьне ц1ийи йис мубаракрай, гуьзгуь жегьнемдиз фий. Сагърай чи куьгьне ц1ийи йис..уррра.. Йоъ, гуьзгуь хайивалди пабни хтана гьа...