Кал крадзенага не шкада
– Напачатку трэ “прыляпіцца” к абедзвюм чэргам на здачу крыві, – раіць мне і нагадвае сабе дасведчаны дзядок з казлінай бародкай. – З вены яе цмочуць у 54-ым пакойчыку, а з пальца чавяць у 58-ым. Чэргі – о-го-го! Як пры развітым сацыялізме за мойвай ці, скажам, ліверкай!.. А вось на здачу мачы і кала – люба-дорага зірнуць – затораў ніколі не бывае. Перад акенцам – не больш трох чалавек. Бо ўсё, што трэба здаваць, людзі прыносяць з сабою, з дому.
Што ж, раблю так, як падказаў дзед-барадзед, і ўжо хвілін праз пятнаццаь стаю пад кабінетам з шыльдай “Лабараторыя”, дзе прымаюць слоікі і з адметным пахам. У чарзе – чатыры жанчыны, тоўсты дзяцюк і я.
Мінае хвілін пяць. Каля вакенца застаюцца сухая кабецінка бальзакаўскага ўзросту і дзесяціпудовы дзяцюк. Нечакана апошні моўчкі прапускае мяне наперад, а сам пачынае трасціся, корчыцца ад... смеху.
– Вой, ратуйце, не магу!.. – ікае-енчыць “цяжкавагавік”.
“Мусіць, хто па дарозе ў лякарню анекдот расказаў, а да яго, як да таго жырафа, толькі-толькі дайшла соль, – думаю я. – А мо й подмазку няўрокам на сняданак з’еў?”
Кабеціна ставіць слоік з мачой і, зусім не рэагуючы на дзецюка, чыкіляе да выхаду.
– Выбачайце, дзядзьку!.. – не ўтаймаваўшы смех, звяртаецца да мяне ўкормлены трыццацігадовы чалавек. – У вас, выпадкам, слоіка парожняга не знойдзецца?
“Зразумела, чаму ён ажно пабарвавеў ад смеху: не інакш аналізы свае ўпусціў!” – здагадваюся я, а ў голас спачувальна кажу:
– Непадалёку пункт прыёму шклатары... Ад агароджы паліклінікі крокаў пяцьдзесят.
– Я ведаю, дзякуй... На жаль, не паспею... Што ж, давядзецца прышкандыбаць заўтра... Хе-хе-хе...
Лабарантка ўвішна схапіла мой слоік, паперку з прозвішчам-адрасам і спрытна прычыніла вакенца. Як добра, што паспеў! Цяпер можна і на здачу крыві...
– Дзядзьку, от вы сабе думаеце, я чаго тут, бы паўдурак, танчу ад смеху? Не-е-е, абедзве мае пасудзіны былі ў поўным парадку: я іх газетай абматаў, а паверх – анучай... Мяне, паважаны, абрабавалі! Ага, пад саменннай лякарняй... Нейкі смурод на лісапеце – шэльма голеная! – наляцеў за спіны, шмаргануў з рукі торбу і – шукай ветра ў полі...
– Дык табе не смяяцца, а плакаць трэба! –дзіўлюся я. – Міліцыю хоць тэлефанаваЎ?
–Ат!... Ды і што я тым мянтам скажу? Што торбу са свежай мачой і, звіняйце дзядзьку, г…м свіснулі?
Цяпер рагатаў я. Дзяцюк толькі таньчыў.
Гомель,
2005
Свидетельство о публикации №221091501087