Латарэйнае шчасце
– Ну як? – выглядвае са сваёй пракуранай “шпакоўні” сівы кіяскёр-пенсіянер.
– Зноў пусцеча, макулатура! – і са злом кідаю каляровую паперчынку, якая міг узад была паўрублёўкай, у каробку-ўрну.
– А, можа, паспрабуеш у астатні раз? Усяго шэсць білецікаў засталося… І капут на сёння… Дзесяць пачак – за паўдня! На заўтра закажу больш... Гэта ж так нашы людзі вераць у вокамгненнае цуда...
– І хоць хто нешта вартае выйграў?
– Не! Мусіць, не. Толькі чатыры “паўсотні” і шэсць дваццацьпяткі” тут, на месцы, атаварыў... Па рублю, па пяць – досыць часта выпадала... Зрэшты, пра буйны выйгрыш ніхто на ўсю вуліцу верашчаць не стане. Я вось кожны дзень на “пяцёрку” набіраю... Норма ў мяне такая...
– І як?
– Сёння ў мінусе. Мінус два рублі. А ўчора – наадварот, на “траячку” плюсаваў. Латарэя, браток!
– А я прайграў...
Колькі прайграў 27-гадовы студэнт-завочнік кіяскёр так і не даведаўся, бо акенца кіёска засціць спіна каржакаватага аматара свежай прэсы.
Прытуліўшыся да цёплай гранітнай сцяны нейкай дзяржустановы, закурваю. Лезу ў кішэні – рубель і капейка. Настрой – як у тае Муму над галавою Герасіма.
“Ёлупню – навука: не гуляй з дзяржавай у азартныя гульні! Прайграць пяцьдзесят рублёў, на якія збіраўся купіць дачцэ веласіпед, і нават “чырвонец”, адкладзены на білет дадому, – во, Ротшыльд, хрэнаў!”
– Відаць, ушчэнт прайграўся, хлопча? – чую зычлівы жаночы галасок.
Паварочваюся. З-пад маладой ліпы на мяне глядзіць русявая кабеціна ці не ўдвая старэй за мяне. На галаве – белая ў чорны гарошак хусцінка, на нагах – чырвоныя гумавыя паўбоцікі, у нагах – кашэль з чарніцамі. Ягады ўкрыты ўзорыстымі галінкамі папараці. Не гарадская, ацэньваю ягодніцу, – зямлячка-паляшучка. Па гаворцы – чую, па загарэлым твары і руках – бачу. І кашэль – наш. На два вядры журавін, брусніц, чарніц, жалудоў...
– Дык жа хіба ў дзяржавы выйграеш!
Маладзіца падыходзіць да кіёска, заглядвае ў акенца і павяртаецца да мяне.
– Тут на прылаўку яшчэ тры білеты ляжаць...
– Ужо два: я вазьму адзін, – устаўляе кіяскёр.
– Рызыкні і ты, хлопец, вядома, калі ёсцека чым!
“Ага, рызыкні апошнім рублём!.. Не будзе за што на паштамце і SOS-ку дадому адбіць”, – з горыччу думаю я, а сам – во, што робіць з намі азарт! – ужо торкаю старому кіяскёру апошняга “рыжыка”, – бязгаловаму чуб без патрэбы!
– Ну як? – радасна пытае праз хвіліну прадавец. – Мой білет – выйгрышны! Так што баланс пайшоў, і плюс 50 капеек!
...Мокры спёкі і хвалявання, я раскрываю першы білет: “Дзесяць рублёў”, другі – “Сто рублёў”. Бог жыве сярод нас – на Палессі!
…Колькі ні ўгаворваў зямлячку распалавініць выйгрыш, – не пагадзілася. Тады я ўзяў і “занарадзіў” для яе таксіста: каб завёз на Серабранку, пад самы пад’езд сынавай “маласямейкі”.
Гомель,
2010
Тлумачальны слоўнік
У 1976 г. паявілася першая савецкая імгненная латарэя "Спрынт", дзе выйгрыш указваўся на самім білеце. У латарэю гулялі і піянеры і пенсіянеры, асабліва былыя вайскоўцы.
“Папяровыя” грошы ўзору 1961 г. – сотня, паўсотня, пяцідзесятка, дваццаціпяцірублёўка, пяцёрка, траячка, рубель (ён жа – “рыжык”, “рваны”; з-за бела-рыжага колеру і фізічнаму стану к канцу эксплуатацыі). Сёння тагачасныя грошы можна атаясамліваць з еўра. Месячны аклад радавога інжынера, карэспандэнта ў 1977 г. быў роўны 120 – 130 руб.
Паўрубель, паўрубельчык – 50 капеек, манета.
Не будзе за што на паштамце і SOS-ку дадому адбіць – г. зн., паслаць танную (зусім кароткую) слёзную тэлеграму (“соску” – ад міжнароднага SOS – ратуйце наша душы ), кшталту: “Тэрмінова грошы да запатрабавання”. – Неалагізм аўтара.
Ягодніца – так у некаторых палескіх вёсках называюць вопытных зборшчыц суніц, чарніц, журавін, якія не блудзяць у лесе, на балоце, ведаюць ягадныя мясціны.
Ёлупень – тое, што і асталоп, дурань.
Ротшыльд – прозвішча вялікага і багатага сямейства банкіраў, бізнесменаў.
Свидетельство о публикации №221091501091