Ёткшиень илядь

Изображение: источник - интернет.

/Мокшанский язык/

– Мярьгат ваксозт озамс? – Озак,
Тяльгат коданявок, шять…
Кафта ломатть кати-коза
Ардыхть ёткшиень илять.

Электричкать тевоц сонцень,
Нюрси саворне вагонць.
Алясь сельмонцка аф коньцы,
Кодавок аф сявсы онць.

Шаракофтсы прянц сонь медня
Мархта инезиень таньфсь,
Сяс и сизефсь тя илядня
Солай аф фкя киза канфсь.

Зрнянь коленди ведьгеворкст
Авать копорьганза якайхть.
Озаль ваксозонза кемоньксть,
Афоль топоде сон сяка!

Алять пряса: «Ков аф ванцак
Мяленц тяфтамть, аф лувсак?
Эряфонь кинява кандсак,
Вестьке апак пупордак.

Танцти шяярензон мельге
Мастор петивок срхкат…
Аньцек ули пади кельгиц?
Кенерсь... мезьге аф тият».

Варжакстсь вальмянява авась,
Сонць кудрянзон удерясь.
Мялень кодама уставась:
«Вов и сёксесь… тага фкясь.

Пяярьф лопат-кизот канды,
Мельгаст ваномок ризнан.
Сякось тячи, сякось ванды,
Ськамон тяфта сиредян».

Авась кизефтекшесь алять,
Но ульсь сетяв, виздиня:
Павазда мес фкяти пяле
Шкайнясь максси кукшення?

«Соннеть пяшкодезе пряда,-
Арьси авась,- эряй лац.
Кемонь кизот ётай, сяда –
Васьфтьсы кудса сонь рьвац.

Кода тяфтамти аф арат
Кельгомнякс и аф учсак?
Масторть перьфкя нльне шарат,
Сокор сельмотка мусак».

Палыхть станциянь штатолнят,
Авась – кенкшти, алясь лядсь.
Изь крьвясте ётксост толня
Позда ёткшиень илядьсь.