Кемамань салай

Изображение: источник - интернет.

/Мокшанский язык/

– Тердемак инжикс монь, тердемак тячи,
Эняльдян, тердемак, лажадонь пяк.
Аш учемшказе ни, ванфкяцти вачень,
Ащень веньберьф кенкшцень фтала исяк.

Вайгяльсь то сетьми, то кайгоми одукс,
Коста сон сявовсь, аф содаса мон.
Кельмоза ливозьса начфтыне тодуть,
Кали тя виде, а кали тя он?

– Тердемак инжикс, ужяльдемот саян,
Мзолфцень сетьмоста кунцема карман.
Ванфозот сенемти прянек мон ваян,
Сембода кельговикс ломанькс тейть аран.

Кода ба стямс и штатолнять крьвястемс,
Валдоптомс горенцять – шобда пяк весь.
Эняльди вайгяльть тянь азоронц васьфтемс –
Стака кев-таваткссь монь мяштезон педсь.

– Тердемак инжикс и пелемс аш мезьда,
Няфтьса тейть афкуксонь павазу райть.
Кяшк аньцек ведняцень светяфть монь эздон,
Шкайняцень вельхтяк и крёснень прдайть.

Пефтома весь туцякс срадома кармась,
Аварди шкайнязе нардамать ала.
Панжада кенкшкязень чикорфтсы вармась…
Афли тя сашендсь сонць кемамань салайсь?