Эряк, Сивинь!

/Мокшанский язык/

Изображение: фото Н. Каранова.

Шубрат, матаняй, Сивинь! 
Тага тейть мон сюконян.      
Кельгине ли тяфта кинь?      
Аньцек тядзень. Лисян         
Панчфу сянгяре трвазот,      
Озан ляпе тишеть лангс.       
Мезе тошкат, мезе азат,         
Коза эряскодат фланкс? 
      
Тон аф оцюват, аф ёмлат,
Тон аф мацят, аф крхкат.
Аяш фкявок морня колгат,
Ёфкска колгат аф муят.

Кивок ронгцень тонь аф шнасы,
Аф пяк мазы шамацень.
Кие кульсы, ся юкстасы
Кашкомф сетьме вайгяльцень.

Керыхть велеряйхне узерькс:
«Ну и ляйне шкайнясь макссь…
Мезень прафонди тя шудерькссь?
Ули – пара, коськи – кафксть.

Вага Мокшеть лаца лакаль –
Аф уйсак, кда срхкат!
Кафта пяли ведец якаль –
Ару-ару и крхка».

Шудек, ляйняй, кяжи валхнень
Панить шири рдазу ведькс,
Налхкфтыть вяри-вяри калхнень,
Цифтортт бта панар петькс.

Эряк, ляйняй, кода маштат,
Кенярьфтть эсон эрь шиня.
Ста и ломанць моли-шашты,
Веши шудема киня.