Эй, заман, тур!

Эй, Заман, тур,
Чархынгы артха бур!

Хатер эт да инджилгенге,
Сенден себеб излегеннге,
Ашыкъдырма сюре – сюре,
Кёрмез болма,  кёре – кёре,
Алкъын мен джашаялмадым,
Татыулу ашаялмадым,
Кёкрегими ачыу керек,
Тыйылгъанны чачыу  керек,
Къарачайгъа айтырым бар,
Терсге, тюзге къайтырым бар,
Алкъын джаугъа джуабым бар,
Тосха, тенге суабым бар,

Алкъын тюгенмеди  джюрегим,
Бир кесек ёмюрдю – керегим!

Белгилиди санга сырым:
Тутмакъ болгъан джюрек джырым,
Тюзелмеген джарлы юйюм,
Тюйюм болгъан мыдах кёлюм,
Къралым бюкген мугур бойнум,
Ауур ташый чёкген боюм,
Кёчкюнчюлюк сынагъаным,
Джау къолуна къарагъаным,
Зулму, зоргъа тирелгеним,
Джыгъыла да тирилгеним,
Тюзлюк излей, табмагъаным,
Муратымы атмагъаным,

Алкъын тюгенмеди  джюрегим,
Бир кесек ёмюрдю – керегим!

Энди бираз керилейим,
Сан солутуб кюн кёрейим,
Къартлыгъыма джарашайым,
Къадарым бла къарашайым,
Алкъын барды кёрген кёзюм,
Аджашмайын айтыр сёзюм,
Битер болсун этер ишим,
«Джарылмадан азау тишим»,
Учкуланнга кетерим бар,
Махар суудан ичерим бар,
Минги тауну – тансыкъларым,
Къарачайны – къучакъларым,

Алкъын тюгенмеди  джюрегим,
Бир кесек ёмюрдю – керегим!