Мекольдень ляди

/Мокшанский язык/

Изображение: картина Б. Кустодиева "Косарь".

Мастор мокшень, панар тядянь!
Сёрмадодязь кельгозь тонь.
Мазы казнекс маштыкядень
Ащат инголен тон монь.

Валда сенемсь ожа песа –
Ару ляй и лихтибря.
Якстерсь – кстыхне вирцень эса,
Тюжя сюресь – тя розьбрят.

Тобда-сенемсь – анды модась –
Панарть алга тись китькскат.
Сянгярясь куване ётась –
Венемсть соку нархт, лугат.

Шайгяряйхне лядендсть ламонь,
Кардсна парамда исть лотксе.
Пеелемснон ёфси шямонць,
Тевда катфтысь, ашезь токсе.

Озан ваймама мон тяза –
Мялезон идькс пингстон ляди,
Кода  нинге од и таза,
Тише алязе монь ляди.

Керы келиста, крхкаста,
Вишкста  пеелемоц якай.
Тядязевок лядсь аф стаста,
Сизи – аф иляды сяка.

Ашель усолоц сонь шнафтомс:
«Алякс пеелемоц ляди!»
Мялецоль кудазорть ванфтомс,
Коса кенери  –  ужяльди…

Мирденц кядец наголь тевса,
Корамняса – ниле прят.
Кода лездома аф сявсак
Рьвяцень? Нинге кенярдят!

Ливость шудихть, анцек нарнихть,
Пиди шись ся ёткнень фланкс:
Псинц крхтайть взафтсы марнек
Тишень аноклайхнень лангс.

Мельгаст шабасна-иднясна
Верок лядьфкять эса срафнихть.
Панцихть  пуропт илиняса –
Сускихть, авардемат сафнихть.

Лоткась пеелень вжнамась,
Ваймамс пароль ба аф ламня.
Терди тядяньке, учсамазь –
Кочкась эрязста шраня.

Кода танцти лядем вастса
Ксель мархта равжа кшись!
Модамарьнясь, почетфсь салса,
Алнясь, пятнагодса пифсь!

Коське тишесь капас кочкаф,
Вяренц алязе ни ацай!
Мокшень аля, виде жочка,
Кеме тума, вии кядьса.

Ванононь лангозонза – кирдень
Шнама мяльхть и тага сяда
Кемань, нежесь сембе ширде
Тяфтамкс тейнек и иляды.

Тумоть синдезе аф сизефсь,
Аф куд тефнень ала прась.
Эрьганц сярядемань пиземсь
Штазе, сявозе урмась.

Тяни тоса, аляй ваймат…
Лядьф лугась аф моли кашт.
Керозь тишецень комбайнат,
Лядихть пеелемса аш.